Read Sangtam Naga JOSHUA 8 Bible Online

JOSHUA 8 - Sangtam Naga bible

JOSHUA 8

¹ABÜDONGBAnü Joshua te yocho. “Nü yola rothsarü apüm nüng ko Ai lang wüng. Tüdrü mahkhang müsi tüsüm. Ihnü nü khyang Ai Yangthsaba, abi müyurü ko yangdi michah akoh jünung ko alih tsü nü yo kangnung.

²Nühnü Ai ko Yangthsaba te Jeriko ko abi yangthsaba te nguchicho kyo nguching, ta hilalü kohro ko kanglungrüti khyünung kohle. Yangdi tsü dhrongyengnü ko akhanglangnü betinung küdang.”

³Achotsü Joshuanü Ai lang abi rothsarü atümung nüpü wücho. Abinü athrungrü rothsarü hajar sangre throcheh amala yuzeng hiri jüpü müthehcho:

⁴“Yangdi khüulang tsü dee shura müzapü rang püm; ko mahnung rungnüm.

⁵Ih ko I te rothsarü ro yangdi tsü chihnung. Ko khode Ai-rünü ihrü te khatanung chüronang, Ihsanü akhudi kyo ihrünü ximüla shang tsinung.

⁶Arühnü ihrü khanglang arüh yangdi pehjo iironung. Akhudi kyo ihrü tsü arüh bete dro tsirepü lümnung.

⁷Hütsüde nührünü chüdu yangdi tsü mahng. ABÜDONGBA Tsingrangnü yangdi tsü nührü khyang jünung.

⁸Nührünü yangdi tsü khyüko khanglang, ABÜDONGBAnü yuzeng jücho kyo, Hütsüla michang thsürangjüng. Hiri nührünü nguchinung yuzeng lile.”

⁹Hütsüta Joshuanü arüh wüsohcho ko arühnü wü hütsüla Ai nyüzüdulang Ai e Bethel nyüh kahla rang yingpümcho. Joshuanü hütsü romang tsü arüh müdongchah yüpcho.

¹⁰Nyangnyü khüu mütoh Joshuanü suro arothsarüti dsibülungcho. Hütsüpü abi ko langnürütinü nüpü Ai lang wücho.

¹¹Abi yola rothsarütinü wü yangdi lang züduba lang tungte lahpi Ai e arührü kahla angah khüdu zehpü kihkulang lahpi tsü arüh müdongchah külüpcho.

¹²Abinü nyüh hajar müngao nücho ko wü Bethel e Ai nyüh kahla yangdi nyüzüdulang lahpi rang pümsohcho.

¹³Rothsarüti tsü yangdi kihku lahpi arüh müdongchah ko anyingcho tsü nyüzüdu lahpi khatanung nengdang küdangpü pümsohcho. Joshuanü aromang tsü angah la tsü yüpcho.

¹⁴Khode Ai yangthsabanü Joshua nyitsarü ngucho, abinü zah shemüsucho. Akhanglangnü abi mahnung mümüdhepü abi ko abi rothsarüti apüm Israelrü te khatanung akhulang roh-i Jordan Ngah yang jowücho.

¹⁵Joshua ko abi nyitsarütinü dro tsirü roh-i ngusoh rangmülang tsü münyeh tsicho.

¹⁶Yangdi la adhrerü apüm arüh iiwünung dsibülungcho ko arühnü Joshua iichi wüde, arüh yangdi tenü ashu za tsicho.

¹⁷Ai la adhrerüecho atümung Israelrü khanglang iiwüde yangdilü atsungtirü süsü mülipü pehjücho.

¹⁸Hütsüde ABÜDONGBAnü Joshua te yocho, “Nü thsuh tsü Ai lahpi pieng; Ihnü hütsü nü khyang jüre.” Joshuanü abi te yocho kyo nguchicho,

¹⁹ko abinü akheh dhimüsude, rang pümrütisü zah shemüsu yangdi la tsü züducho ko mahcho. Arühnü zahnü yangdi la tsü michang thsürangjücho.

²⁰Ai-rünü ximüla dhengmüthehde, mikhu tsü ning chii ngucho. Arüh nengdang tsichehnung tulang mülicho, tunüo Israelrü sürü arüh dro tsi ngucho arühnü ximüla arüh becho.

²¹Khode Joshua ko abi nyitsarütinü yangdi tsü mahcho ko mikhu phungcho ngucho, arühnü ximüla Ai-rü tsü kyüsehmüsucho.

²²Adelü yangdi la pümrü Israelrü tsü khatalang jürocho. Hütsüta Ai-rü tsü apümlangnü betipü ngucho, ko hütsüta arüh apüm kyüsehcho. Süsü mütsichehcho ko

²³Ai Yangthsaba chah khu süsü akang mülicho. Abi tsü akangnü rangpü Joshua yanglang nowücho.

²⁴Israelrünü arüh iiroba akunglih la tsü arüh rorüh atümung kyüsehcho. Hütsüpü arühnü Ai langsü thali wü atümung kyüsehcho.

²⁵Joshuanü abi thsuh tsü Ai lahpi pii atümung mükyüsehde mükhyüchocho. Hütsü nyümong Ai la mono apüm kingthrümcho khingkurü adhrerü hajar dhüre-anyüh.

²⁷Israelrünü ABÜDONGBAnü Joshua te yocho kyo, yangdi lanü mahchehcho kanglungrü ko kohro khyücho.

²⁸Joshuanü Ai trüp-pehjücho ko thsangnyang pehjücho. Chünye yingcheh hütsü asusuh lile.

²⁹Abinü Ai yangthsaba tsü singdong khüdu chahnü xohseh süsohcho ko abi fü tsü hütsüla nyüzeh yohpücho. Nyü züdude Joshuanü ame tsü khyüchonung yuzeng jücho ko hütsü yangdi tbükhüm te dhiyohchüpehcho. Arühnü hütsü lung zangbülungnü zangtipehcho, ko chünye yingcheh hütsüla lile.

³⁰Hütsüpü Joshuanü Ebal khang chah ABÜDONGBA, Israel Tsingrang khyang bholu khüdu külüpjücho.

³¹Abinü hütsü Israelrü khyang ABÜDONGBA dikehrü Mosa khu jüba, Mosa yuzeng la yocho kyo külüpcho: “Idhsenü mühamchehcho lungnü külüpcho bholu khüdu.” Hütsü chah arühnü ABÜDONGBA khyang kangmübü jücho ko arühnü arüh akehta mübüsü jücho.

³²Hütsüla, Israelrünü dhengyanü Mosanü thrahba Yuzeng tsü Joshuanü lung chah tsü thrahcho.

³³Israelrü, arüh langnürüti, thsazirüti, yukharüti ko arüh yola liba shuparüsü zeh ABÜDONGBA Yuzeng singdi khüu-khüulang ko hütsü dhirü Levirü bebürü chah dhengkeh yacho. Arüh changsho-o nü Gerizim Zong lahpi arüh khang pipü ko changsho-o tsünü Ebal Zong lahpi arüh khang pipü yacho. Hi ABÜDONGBA dikehrü Mosanü arühnü amüwa khyüchonung shikhe la hita nguchinung mülacho lile.

³⁴Hütsüde Joshuanü Yuzeng vakha la zehcho kyo amüwa ko chokehchola zeh, Yuzeng apüm tsü yuva chüro khicho.

³⁵Mosa Yuzeng apüm tsü Joshuanü khingkurü azarü ko arüh yola liba shuparü mii zeh ashibülungrü apüm te khi yocho.