Read Sangtam Naga JOSHUA 9 Bible Online

JOSHUA 9 - Sangtam Naga bible

JOSHUA 9

¹Israelrü akoh tsü Jordan nyüzüdu lahpi yangthsarüti, akhang la, angah la ko Mediteranean kihdi jüp liba ko Lebanon lih chiinü müdhecho; hiri tsü Hit-rü, Amor-rü Kananrü, Perizrü, Hivrü ko Jebusrü yangthsarüti licho.

²Arüh atümung tsungphung thsapü Joshua ko Israel te khatanung lümtrümcho.

³Ta Gibeonrü sürü Hivrü licho, arühnü Joshuanü Jeriko ko Ai chah nguchicho yuchicho,

⁴ko arühnü abi kihyochünung dhrongchehcho. Arühnü tsuyongnung khürü khyo müyah shüthreh ko yongkha shinga akhümcho la yohpü arüh Gadu chah bha thsacho.

⁵Arühnü shüthreh müpicho ko jingkhüm axüchicho khümcho. Arühnü hiba hümthse tsü akungcho ko aphümcho thsacho.

⁶Hütsüpü arühnü Gilgal lang wü Joshua ko Israelrü te yocho, “Ihrü limih ashu lanü rochoe. Ko ihrü te yangtsa külüpsohnyüre.”

⁷Ta Israelrünü yocho, “Tuepü nührü te yangtsa külüpnung? shündhün lirü thsanung kohle.”

⁸Arühnü Joshua te yocho, “Ihrü nü dikehrü lile.” Joshuanü arüh te tsingdhengcho, “Nührü sürüo? Nührü khüdenü rocho?”

⁹Hütsüde arühnü abi te yukheh hi yocho: “Adirü, ihrü limih ashu lanü rocho, tunüo ihrünü nührü Tsingrang ABÜDONGBA nengdang yuchiko.

¹⁰Abinü Ijip la nguchicho lüpcho ko Jordan nyüchürolang liba Amor-rü yangthsarü anyüh Ashtarot la liba Heshbon Yangthsaba Sihon ko Bashan Yangthsaba Og nyüh chah tu nguchicho hiri apüm yuchiko.

¹¹Ihrü langnürütinü ko ihrü lih la lirüti apümnü langla shulüm tsangdhi küdang hipü wünü nührü mütohnung ihrü te yocho. Ko ihrü te nüh dikehnung ko nü te yangtsa külüpnung yocho.

¹²Ihrü hümthse hi dheng. Ihrünü nüh shirünung kuh lanü shemüsude hümthse hi athsathsa thsacho. Ta dheng, adelü hi kungko ko phümko.

¹³Yongkha liide shinga hi asi thsacho, ta ade dheng, hiri threhpehko. Ihrü shü ko jingkhüm lang tsehchonü threhpehko.”

¹⁴Israelrünü ABÜDONGBA te mükidhengpü arüh chahnü tsuyongba khürü khyücho.

¹⁵Joshuanü Gibeonrü te shangrü yangtsa külüp-pü arüh lisohcho. Israel hung la langnürütinü hiba yangtsa tsü yohpünung anyengchoba jo yuchümcho.

¹⁶Yangtsa tsü külüp-pü nyümong asang khanglang, yuje hiri nyitsarü hi münyehta lirüepü Israelrünü müdhecho.

¹⁷Achotsü Israelrünü shemüsucho ko nyümong asang khanglang hiri nyitsarü liba yangdi Gibeon, Kefirah, Berot ko Kiriat Jearim chihcho.

¹⁸Ta Israelrünü arüh mükyüsehchehcho, tunüo arüh langnürütinü Israel Tsingrang, ABÜDONGBA nengla arüh te yuchüm pehpü thsacho.

¹⁹Hi nengdang müyurü apümnü langnürü te longmüsücho, ta arühnü lalingcho. “Ihrünü Israel Tsingrang ABÜDONGBA nengla arüh te nyengcho yuchümpehko. Adelü Ihsanü arüh müdhsakehjücheh.

²⁰Ihsanü nyengchopehrü tsü arüh lisohbae; mahkhang, Tsingrangbanü Ihsa khingchinung.

²¹Arüh tsü lisohng, ta Ihsa singyukikharü thsasohnung.” Langnürütinü hütsüta lümlong jodhengcho.

²²Joshuanü Gibeonrü tsü abi yanglang noronung yuzeng jücho ko abinü arüh te yocho, “Tuepü nührü hila lipü, ashula lirepü yo ihrü kihyochücho?

²³Nührünü hi nguchicho ngang, Tsingrangbanü nührü mülangjüko. Lede nengdang nührü nyitsarü tsü I Tsingrang kuhla singyurü ko kih kharü thsa ayurü linung.”

²⁴Arühnü lalingcho, “Adirü, ABÜDONGBA nührü Tsingrangnü abi dikehrü Mosa khu nührü rode hiba limih hi apüm nührü khyang jünung ko hütsüla lirü apüm kyüsehnung mülajükopü ihrünü nyisichonü, ihrünü hütsüta nguchicho. Ihrünü nührü dee drücho; ko ihrü akang nengdang lümxüchonü hita nguchicho.

²⁵Ihrü adelü nü khehla lile; nühnü tu athsalangerünang hütsü ihrü chah nguching.”

²⁶Hütsünü Joshuanü hita nguchicho. Abinü arüh tsungticho ko Israelrü khyang arüh mükyüsehsohcho.

²⁷Ta abinü arüh tsü ayurü kangsoh Israelrü ko ABÜDONGBA bholu nengdang singyukikharü kangsohcho. Chünye yingcheh ABÜDONGBAnü mübünung throchehba lih la tsü arühnü hiba nguchi hi mütozah nguchire.