Read Sangtam Naga 2 TESALONIKARÜ 1 Bible Online

2 TESALONIKARÜ 1 - Sangtam Naga bible

2 TESALONIKARÜ 1

¹Paul, Silas ko Timoti chahnü— Au Tsingrang ko Abüdongba Jisu Khrista la Tesalonikarü Lithro jünirüti yang:

²Au Tsingrang ko Abüdongba Jisu Khristanü nührü khyang achomang ko atbachi jüng.

³Jünirüti, nührü nengdang lede Tsingrangba khyang ihrünü anengse jünung kangre. Ihrünü hi nguchinung tsü athsalang du, tunüo nührü yudsi dee zinü, ko nührü khüdunü khüdu te müitaba tsü dee adiu kangle.

⁴Hütsünü Tsingrangba Lithro la nührü khyanglangnü ihrü künyangre. Dhsümthse ko chongcha apüm khu mütozah nührü arangcho ko yudsi nengdangnü ihrü künyangre.

⁵Hi Tsingrangba yuje yukhaba yuzi lile ko nührü chongchacho tsünü abi yanglih la nührü dekheng kangsohnung.

⁶Tsingrangbanü tu yuje hütsü nguchinung: nührü khingchirü abinü khingchinung,

⁷ko nührü sürü chongchacho nührü khyang ko ihrü khyangsü abinü akyahshang jünung. Abinü hi khode Abüdongba Jisu ninglangnü akohba riwürüti te,

⁸mihmüle la ronang, Tsingrangba mükhyüchorü ko Abüdongba Jisu Yuse atsa yocho münyirüti khingchinung.

⁹Khode yudsirü atümung chahnü adhichi ko ahechi khyüchonung Nyümong ronang, nührü arüh yola zehnung, tunüo ihrünü yocho yusi chah nührünü yudsiko.

¹⁰Abüdongba romih tenü ko abi ahechi lanü za arüh müchangkaba athsangnyang akhingchi ngunung.

¹¹Hütsünü ihrünü lede nührü shulüm kihchijüre. Abinü nührü dsicho kyo akang adekheng lichehnungthsa Ihsa Tsingrang te ihrünü kihchijüre. Abi ziinü nührü nguchi atsa lümchung ko yudsi nguchi apüm tikehsohng.

¹²Ihsa Tsingrang ko Abüdongba Jisu Khrista achomangnü Ihsa Abüdongba Jisu neng nührü chah ko nührü abi chah hechinung.