Read Sangtam Naga 2 TESALONIKARÜ 3 Bible Online

2 TESALONIKARÜ 3 - Sangtam Naga bible

2 TESALONIKARÜ 3

¹Achangkathsa Jünirüti, nührü yola nguchicho roh-i Abüdongba yusi tsü mütozah dhsüthsa sobhonung ko jengreng jo khyüchonungthsa ihrü nengdang dangkhidangnangjüng.

²Akhürah ko amünyi nyitsarü chahnü ihrü khümchonungsü dangkhidangnangjüng; tunüo atümung nülü yusi tsü müyudsire.

³Ta Abüdongba tsü longlangchehba lile, abinü nührü rezehsohnung ko amünyibong chahnü nührü khümchonung.

⁴Nührü chah longlangnung Abüdongbanü ihrü khyang jüre, ko ihrünü tu nührü te yocho, hütsü nührünü nguchi yale ko mütozah nguchinungepü ihrünü tsüple.

⁵Tsingrangba amüi ko Khristanü jücho arangcho la Abüdongbanü nührü alaa anyicheh la nüng.

⁶Jünirüti, ihrünü thülacho la mütsehpü sürü dsere liro, jünirüti atümung tenü za linung ihrünü Abüdongba Jisu Khrista nengla yuzeng jüre.

⁷Ihrünü nguchicho dhengcho nguchinung tsü nührübürünü khütang müdhele. Nührü yola lide ihrünü müdsere.

⁸Ihrünü angang müjüpü sü arüku mükhyü. Ta ihrünü müküp nguchicho; ko nührü sü khyangsü bhamüling müjünung ihrünü ama atsingse nguchicho.

⁹Ihrünü chingnung athsalang müthsachonü nguchicho mah, ta nührü khyang ihrü dhengchosohnung adüzüthsa nguchicho.

¹⁰Nührü yola lide ihrünü nührü te hita yocho, “Sünü münguchiro abi tüyangdüp.”

¹¹Nührü yola khürü tu münguchipü bürü nguchi la du longmüzi, adsere akang lilepü yuchichonü hi yore.

¹²Hitari nyitsarü te akang athsalangnü linung, ko palu akang nengdang nguchinung ihrünü Abüdongba Jisu Khrista nengla yuzeng jüre.

¹³Ta jünirüti, atsa nguchinung la tümüthoh.

¹⁴Ihrünü hiba vathrah la yocho yu hi münyinung khürü linung kohle. Hütsütakhang, nyitsarü tsü dhengcheh yohpüng, ko abi ashah khyüsohnungthsa abi yola tümükhong.

¹⁵Ta abi arorüh khüdu roh-i tükhichi; hütsümüli, jünirü khüdu roh-i müzahsohng.

¹⁶Abüdongba, sü atbachi chixibong liro, abinü bekhyah apüm la ko lüpcho la nührü khyang atbachi jüsohng. Abüdongba nührü atümung te lieng.

¹⁷Ih Paul, salüm vathrah hi Ipu khehnü thrahre. I vathrah apüm la Ihnü hiroh-i du thrahre; hiroh-i Ihnü thrahre.

¹⁸Ihsa Abüdongba Jisu Khrista achomang nührü atümung te lieng.