Read Sangtam Naga 1 TIMOTI 3 Bible Online

1 TIMOTI 3 - Sangtam Naga bible

1 TIMOTI 3

¹Hiba hi yuje yu: Nyüh khüdunü Lithro dikehnyükhang, abinü nguchi akhacheh mürure.

²Lithro dikehrü khüdu tsü achomükeh, anitpü khüdu du liba, akichocho, abürü rahsehba, athsalangnü liba; tronyüba ko sihthsa dorü hitari thsabae;

³yongkha yongrü mahkhang shühkhatohrü mah, ta alonglüm ko kangli atsa; thsi müirü mah;

⁴abürü kukhi müshochehba, ko palu tsurünü jengreng jo yocho nyiba nyitsarü thsabae.

⁵Tunüo nyüh khüdunü apu kukhi mümüshochehkhang, abinü khüta Tsingrangba Lithro khüdu xükümchehnung?

⁶Motsing roh-i amüthsehnü jeng mümülangsohnungthsa, yudsi la alümjing thsabae.

⁷Müthsamünyü ko motsing uzathsa la müxohnung, ta Lithro la müzehrünü mii jengreng jüchehba nyitsarü khüdu thsabae.

⁸Lithro la dikon tsü nguchi la müsi jürü, ta müle anyüh kehrü mah, yongkha müxüprü mah mahkhang thsi müxümüngurü mah;

⁹ta lümlong amüsanü yuje yudsi mishacho la yümpungrü thsabae.

¹⁰Arüh tsü akhu thsatsodheng, ko arüh achomükehkhang dikon nguchi nguchisohng.

¹¹Arüh nitpürüsü saying atsa thsabae ko thsüthsünümnümrü mah; ta arüh akichocho ko lüpcho la longlangchehrü thsabae.

¹²Dikon khüdu tsü anitpü khüdu du liba , ko atsurü rahsehchehba ko kukhi tsa müshochehba thsabae.

¹³Dikon sürünü nguchi tsanü nguchiro arühnü aneng atsa ngure, ko Jisu Khrista chah arüh yudsi nengdang rezeh chochehre.

¹⁴Ihnü vathrah hi thrah nye, nüh shirünung Ih zah ronung lümle.

¹⁵Ta Ih münu nye, dongdi ko yujenü dümyehba khüi akang liba Tsingrang Lithro la Ihsanü khüta dikehnung, hiba vathrahnü nü te müdhesohnung.

¹⁶Rang liba Ihsa yangthsa arangcheh hi Ihsanü hoh-re: Abi shutsa la mishacho, Anbü la langsohcho, ninglang riwürünü ngucho. Abi yuchoti apüm la thsingyucho, liküprünü yudsicho, ko ninglang nükeh tsicho.