Read Sangtam Naga 1 TIMOTI 4 Bible Online

1 TIMOTI 4 - Sangtam Naga bible

1 TIMOTI 4

¹Akhanglanglü nyitsarü khürünü arüh yudsi thrüchahchüpehnungepü Anbünü tsitsa yore; arühnü arahkheh anbü yochonyi amünyi adoba khanglang iiwünung.

²Hitari adoba tsü thsüyohchüba arahkhehrü, sürü lümlong idhse adhsanü lehcho roh-i asücho liro, hitarinü sobhore.

³Arühnü kuh kangnung tsü amüthsalangepü yore ko tsuyongnung khürü yatire. Ta Tsingrangbanü hütsüri yudsirü sürünü yuje tsü müdhero, arühnülü dangkhidangnang anengse jüpü tsunung thrijücho.

⁴Tsingrangbanü thricho lüpcho atsa; tusü thsonglinung müle, ta lüpcho dangkhidangnang anengse jüpü khyüchonung athsalang,

⁵tunüo Tsingrangba yu ko dangkhidangnang tsünü müsachehjüre.

⁶Ajünirüti khyang nühnü hiri athülaba jükhang, yudsi yu la nüpu kangba ko nührü bichiba yuje adoba tsünü, nüh Jisu Khrista dikehrü atsa khüdu kangsohre.

⁷Thsütah müliba jümü yu lanü za lieng. Tsingrangba kyonü linung abürü jangjang rahseh lieng.

⁸Nguchicho tsü shutsa nengdang athsütah, ta anbü nguchi tsü lüpcho la amii lile, tunüo hütsünü ade ko aronung nengdang akang jünung nyengchore.

⁹Hiba yu hi yuje ko apümnü khyücho yudsinung adekheng.

¹⁰Ihrünü hi nengdang müküp nguchire, tunüo ihrünü akang Tsingrang, sü nyitsarü atümung alathsa abi chah yudsirüti Kangchehjüba liro abi chah longdire.

¹¹Arüh te hiri athülaba ko adoba young.

¹²Nüh kunu bekhyah sü khyangsü tümükhimüngusoh, ta yudsirü nengdang yula, sayingla, amüila, yudsila ko amüsabala adüzüthsa lieng.

¹³Ih mürode, müyurüti te Amüsa yu khinungla, thsingyunung ko donungla akohchonü nü bekhyah pehng.

¹⁴Azikehrüti ko azibarütinü nü chah arüh khehnü nyümkehjüba, nü chah liba anbü jiyü tsü tüthrüchahchübeh.

¹⁵Nüh zikehcho atümungnü ngunungthsa, nüpu jangjang hütsüri müsijo nguching.

¹⁶Nüpu akang ko nühnü docho nengdang müzahng. Hiri mütozah nguchi lieng, tunüo hiri nguchichonü, nüpu ko nü yu yuchirü anyüding nühnü khümchonung.