Read Sangtam Naga 1 TIMOTI 5 Bible Online

1 TIMOTI 5 - Sangtam Naga bible

1 TIMOTI 5

¹Azirü khüdu te tüyübü, ta nüu te roh-i kihchieng. Azabarü te anirü roh-i,

²azilarü te atpa roh-i, ko lazalarü te anilarü roh-i amüsa lümlongnü bichieng.

³Chomilarü, sü müleng tsatsa liro arüh khyang jengreng jüng.

⁴Ta chomilarü nye atsurü mahkhang ashümtsurü likhang, palu kukhi nengdang mübü yangthsa akhu nyichosohng, hütsüta arüh tpurü ko ajü-amü trosohng; tunüo hütsünü Tsingrangba künyangsohre.

⁵Müleng tsatsa lirü chomilarü, adhengyehnung seh mülirü tsünü Tsingrangba chah alongdi yohpo abükyünü ama atsingse atroba nengdang dangkhidangnangre.

⁶Ta chomirü sünü mabomashiro, akang linye abükyü asücho lile.

⁷Arüh süsü mümülangnung nengdang, hiri athülaba arüh te young.

⁸Ta khürünü tsutpujüni müdhengkhang, alathsa abürü kukhirü, abinü yudsi tsü pehjüre ko abi müyudsirü tenü amütsau.

⁹Chomilarü süsü kang rohre mihlang müthsakhang, chomilarü chung la tükhiyoh, ta abükyü tsü khüdupi axengchocho,

¹⁰nguchi atsa nguchi licho; tsuzarü athsalangnü nümüsucho, shirü tsa kangcho, khristan jünirü nengdang atsa nguchicho, chongcharü trocho, ko atsa nguchinung la akang khakhuchüjücho, hitari du khiyohng.

¹¹Ta chomilarü chung la tsü alongde chomirülü tükhiyoh; tunüo khode arühnü kuh kangnyo ronang arühnü Khrista tenü za tsire,

¹²ko hütsüta arüh akhudi abi te nyengchocho thsangnyangre.

¹³Arühnü kuh thüpi bekhyah pehnungsü nyichore; ta alaa amütsau tsü, thsüthsünümnüm, amüzehla zeh amüchoba yu chonung nyichore.

¹⁴Hütsüeko axengchochorülü xenglinü, azarü nümüsu ko kukhi müsho lisohnyüre, hütsü dunü Ihsa münyehrü khyang Ihsa nyüm chonung thsatsa müthsasohre.

¹⁵Tunüo chomirü khürülü Satan khanglang tsipehko:

¹⁶Lithronü müleng tsatsa liba chomilarü trochehnung nengdang, yudsilarü khürü trahvarü chomirü likhang, abükyünü arüh xükümsohng, ko Lithro bha tümülingsoh.

¹⁷Azibarü sürünü langnürü roh-i nguchi atsa nguchiro, arühnü amii anyüshi alaa ngunung adekhengepü khiching, alathsa thsingyuba ko adoba nguchi la müküp nguchirüti.

¹⁸Tunüo Amüsa yunü yore, “Misü ma nyehsohde abe türahjü,” ko “Anguchirülü nyükheh ngang ngunung alenge.”

¹⁹Azirü khüdu nyüm mülangjüde, yuzi anyüh mahkhang asang müzehkhang tükhyücho.

²⁰Amünyi shitpahrüti misha yübüng, hütsünü du aparünü drünung.

²¹Nühnü nguchichola süsü tükhüm mahkang tsah müdhengpü hiri athülaba nyinung Ihnü Tsingrangba, Jisu Khrista ko amüsa riwürüti jingte nü te khangre.

²²Abüdongba dikehba nguchi nengdang dhsüthsa sü chahsü nü khehnü nyümkeh tümüsachehjü. Aparü münyi la tüzeh; nü jangjang müsa lieng.

²³Nüh mükumüru du lireko, nü mi nengdang kih du tüyong, ta cikih azaza yong.

²⁴Nyitsarü khürü münyilü khohcheh ngure, ko yukhaji lang arüh münyilü tsehleh würe. Ta khürü münyilü khaidu khohchehre.

²⁵Hütsüta nguchi atsa tsü khohcheh ngure, ko dee khohcheh müngunyesü mürangpüchehre.