Read Sangtam Naga 1 TIMOTI 6 Bible Online

1 TIMOTI 6 - Sangtam Naga bible

1 TIMOTI 6

¹Sünüsü Tsingrangba neng ko ihrü adoba nyüm müchonung nengdang, sürü ayurü liro arühnü palu abüdongrü jengreng drüng.

²Ko kulirü sürü yudsirü abüdongrü liro, arühnü arüh tsü jünirü thsachonü arüh te jengreng müdrü tüli. Hütsü mülih, arühnü abüdongrü tsü alaa atsau dikehng; tunüo ayurü chahnü sürü jingchoro arüh tsü yudsirü ko ayurünü abüdongrü müire. Nühnü hiri doung ko thsingyung.

³Sünü Abüdongba Jisu Khrista yuje yu ko Ihsa yangthsa adoba apa thsingyunang

⁴abi amüthsehnü jeng lile ko tusü mümüdhe. Abi yu nengdang ritanung ko yübütala saying amütsa lile, ko hinü nahmoh, yubejarong, nyüpmüseh, longmülangta,

⁵ko lümlong mülirü ko yuje mülirü chahnü lede yubejarong chürosohre. Yangthsa khyüba tsü alirü kangnung nengdangepü arühnü lümre.

⁶Ho, abi tu liro hütsünü longsükhang, yangthsa khyüba tsünü alirü kangsohre.

⁷Limih lang Ihsanü tu mühiro, ko limih lanü tusü mühitsinung.

⁸Hütsüeko, atsunung ko amüpinung likhang, Ihsa nengdang hütsü akükyüh.

⁹Ta sürünü alirü kangnyüro, arüh athsatsüla longre ko amüsithsa zeng ko adrünung mükhyahmürah adrong la xohre, khüinü arüh tphahcho changsohre.

¹⁰Tunüo thsi müiba tsü amünyi apüm ara lile. Ko hütsü yangchidenü nyitsarü khürü yudsi lanü thrümeh alongri adrongnü arüh lasih thsangnyangko.

¹¹Ta nüh, Tsingrangba nyitsarü, hiri atümung lanü za lieng. Amüsaba, Tsingrangba kyoba, yudsi, amüi, arangcho ko alonglüm hiri nengdang müküpm.

¹²Yudsi khata atsa khataang, ko nüpu shulüm müchangkaba akang tsü khyüng; tunüo hiba akang nengdang nühnü yuzi adrong bete nü yudsi chechochonü Tsingrangbanü nüh dsicho.

¹³Atümung khyang akang jüba Tsingrangba jingte ko Pontius Pilat bete yudsi drengdreng nyengchoba Khrista Jisu jingte,

¹⁴Ihsa Abüdongba Jisu Khrista roba Nyümong yingcheh yuzengti tsü bichinung Ihnü nü khyang yuzeng jüre.

¹⁵Abi ronung tsü Tsingrangba, müwajüba ko yangthsabong, yangthsarüti michah yangthsaba ko abüdongrüti michah Abüdongbanü abi becho la hirojünung.

¹⁶Amüsüba tsü abi du; sünüsü müchichehba atsingsela abi lire. Sünüsü abi müngudheng; ko sünüsü abi müngucheh. Adhichi ko müchangkaba yanglih abi yo thsaang! Amen.

¹⁷Sürü hiba akangli la alirü liro arühnü mümüthsehnung, mütsüpba kuthsi la mah, ta Tsingrangba sünü Ihsa khyang thangchi Ihsa künyangsohnung jüro, arüh alongdi abi chah yohpünung thülaang.

¹⁸Atsa nguchinung, nguchi atsa la alirü thsanung, amüi nguchinung, ko aparü te changtanung rungnüm linung arüh te young.

¹⁹Hütsü roh-i arühnü arühbürü aronung shulüm amüdongji adrengdreng la kuthsi zahkehnung. Hütsüta arühnü yujeba akangkhung tsü ngunung.

²⁰Timoti, nü khyang tu nyümkehjücho hütsü nyahng. “Lümlong” ko nyitsarü khürünü thsameh tsiba amümüsa ko amüsithsa rehtaba lanü za lieng.

²¹Tunüo khürü hütsü roh-i thsachonü yudsi lang lanü shehliko. Tsingrangba achomang nührü atümung te lieng.