Read Sangtam Naga 2 TIMOTI 3 Bible Online

2 TIMOTI 3 - Sangtam Naga bible

2 TIMOTI 3

¹Achangka nyümong la athsangthsi shikhe ronungepü müdheing.

²Nyitsarüti müruthsa, müxümüngu, amüthseh, nyüpmüsehba; tpurü yocho münyiba, nengse müjüba, amümüsa;

³amüi müliba, yanglilüm müliba, be süseh, shühkhatoh, adrüba; atsa thrünyiba;

⁴kihyochürü, thsanyücho thsaba, tüzümükhüm, arühnü Tsingrangba mahpü künyangküshi du müiba;

⁵Amichah du müsa bichipü yuje tsülü mükhyüchoba, hirinü jeng linung. Hitari nyitsarü tenü za lieng.

⁶Tunüo arüh khürünü aparü kuhla züdu khingkurüti sürü amünyinü hehthsa ko mükhyahmürahnü liro,

⁷ko sürünü lede nyichonyüro, ta khodesü yuje tsü mümüdhero, hitari suh müzehba khingkurüti nyihsehre.

⁸Janes ko Jambres nyühnü Mosa nyümcho kyo, hiri sürü lümlong amütsa ko yudsi la shohjocho, arühnü yuje tsü yatire.

⁹Ta arüh ashu mütsinung, tunüo atümungnü arüh mongdongcho müdhenung. Janes ko Jambres nyüh chahsü hütsü roh-i tikehcho.

¹⁰Ta nühlü I adoba, I saying ko I akang la alümcho dhengchoko; ko I yudsi, I arangcho, I amüi, I khümchocho,

¹¹I dhsümthsecho ko I chongcha, Antiok, Ikonium ko Lystra la I chah tu tikehcho, ko adhsümthse Ihnü rangchocho nühnü nguko; ta Abüdongbanü hütsüri apüm lanü Ih khümchoko.

¹²Sürünü Jisu Khrista la amüsa akang linyüro arüh dhsümthsenung;

¹³ko nyitsarü amütsati ko kihyochüjürüti aparü thsüyohchü amütsa lanü amütsau kangnung.

¹⁴Ta nühlü, nü te doba ko nühnü khahkhah yudsiba la tsü mütozah lieng. Nü te dorü tsü nühnü müdhele.

¹⁵Jisu Khrista chah akangcheh langi nünung kohba lümlong nü zadenü müdheba amüsa yu tsü nühnü lümkehle.

¹⁶Amüsa yu apüm tsü Tsingrangbanü thsüchi thrahcho lile ko yuje donung, athsamehrü yübünung ko müsa linung thülanung athsütah,

¹⁷ko Tsingrangba dikehrü kükyo kangsoh nguchi atsa lüpcho nguchinung dekhengsohre.