Read Sangtam Naga FILEMON 1 Bible Online

FILEMON 1 - Sangtam Naga bible

FILEMON 1

¹Jisu Khrista nengdang arangyohrü, Paul ko Ihsa jünirü Timoti chahnü, Ihsa shangrü ko müjang dikehrü Filemon,

²nü kuhla shibülungrü, Ihsa jünilarü Afia, ko Ihsa shangrü athrungrü Arkipus yanglang:

³Ihsa Au Tsingrang ko Abüdongba Jisu Khrista chahnü nührü te achomang ko atbachi thsaang.

⁴Ajünirü Filemon, Ihnü dangkhidangnang müipi nü neng dangchi I Tsingrang khyang anengse jüre.

⁵Tunüo Tsingrangba tsurü atümung nengdang nü amüi ko Abüdongba Jisu chah nü yudsi nengdang Ihnü yuchire.

⁶Khrista te Ihsa akang la khüiba akehta liro hütsünü asoh-uba anyichehba amüwa apüm ngunung nengdang nü yola Ihsa müjang yudsirüti nengdang I dangkhidangnang lile.

⁷Amüi jünirü, nü amüinü I khyang akünyang amülah jo ko khütang thsüchiko! Nühnü Tsingrangba nyitsarü atümung künyangsohko.

⁸Hi nengdang, Ihnü Khrista la nü jünirü roh-i, nü te tu anguchinung athsalang, hütsü nengdang yuzeng jünung kohle.

⁹Ta Ihnü nüh müichonü akihchiuthring kihchire. Ih Paul, azirü ko ade mii abi nengdang arangyohrü thsanye, Ihnü hi kihchire.

¹⁰Hütsüeko Ihnü Onesimus, sü Khrista la I tsurükhung liro, abi nengla nü te kihchire; tunüo arangyoh la lide abi anbü la Ih abi Au kangcho.

¹¹Shikhe khüdu nü nengdang abi tu akhyüchah mülicho, ta adelü abi nü nengdang du mah, ta I nengdang mii dee athsütah kangko.

¹²Ade Ihnü abi nü yanglang Ipu cho rosohre.

¹³Yuse Atsa khyanglangnü Ih arangyoh la lide, nü müli abinü Ih tronung nengdang abi I yola yohpünyüre.

¹⁴Ta Ihnü nü te khingchi Ih troung pü müyore; hütsü müli nü tsachonü nguchisohnyüre. Hütsüeko nühnü heho müthsade Ihnü tusü münguchinung.

¹⁵Onesimus nü tenü azachah za liba tsü, nühnü abi lede nengdang khyülisohnung shulüm tikehcho thsae.

¹⁶Ko adelü abi ayurü khüdu du mah, ta ayurü khüdu tenü awüba: Abi Khrista la amüi jünirü khüdu lile. Abi I nengdang khütoh-i thsütahro! Ko ade alathsa abi ayurü khüdu roh-i, ko Abüdongba la jünirü khüdu roh-i nü nengdang khütoh-i alaa thsütahnung.

¹⁷Hütsüeko, nühnü Ih nü te atrümtarü khüduepü lümkhang, nühnü Ih khyüchorü roh-i abi thali künyang khyüchoung.

¹⁸Abinü nü te lango thsameh likhang mahkhang lango tee likhang, hütsü I khyang khikehjüng.

¹⁹Hila Ipu khehnü thrahre: Ih, Paulnü sahnung. (Nüpu tsatsa I khyang jünung liba nengdang Ihnü müyore.)

²⁰Hütsüeko jünirü, Khrista la jünirü khüdu roh-i, yanglilüm Abüdongba nengla hi nguchijüng, ko Ih künyangsohng.

²¹Ihnü tsingdhengba hi du mahpü nühnü alaa nguchinungepü longdi hi nüh yang thrahre.

²²Hütsüte aroh, Ih müdongnung kuh rungnüm ying, tunüo nührü dangkhidangnang khunü Ih nührü khyang thali jünungepü longdire.

²³Jisu Khrista khyanglang müjang arangyoh la liba Epafras, ko müjang dikehrü Mark, Aristarkas, Demas ko Lukrü chahnü nührü yang salüm müdhesohre.

²⁵Abüdongba Jisu Khrista achomang nührü atümung te lieng.