Read Sangtam Naga IBRIRÜ 12 Bible Online

IBRIRÜ 12 - Sangtam Naga bible

IBRIRÜ 12

¹Ihsa nengdanglü, Ihsa mükang sühdi hidoi yuzi lile. Hütsüeko, Ihsa mütsa kangsohba lüpcho ko Ihsa chah khahkhah mareh liba amünyi apüm lanü zanung, ko Ihsanü abi bekhu liba shangmülita tsü adhrongcheh amülahnü shangnung.

²Ihsanü Jisu, sü chah adikeh lanü achangchi Ihsa yudsi ngakeh liro abi chah dhengkeh linung. Aronung liba akünyang tsünü ashah tsü mükhichi khala chongcha tsü abinü rangchocho, ko ade abi Tsingrangba pümji tsalang pümle.

³Nührü mükhenung ko suh müzahnung nengdang abinü münyirü chahnü khütoh-i anyümba rangchocho hütsü lümdheng! Hütsüeko nührü tüsuzah mahkhang tüpehjü.

⁴Nührü amünyi te khataba la ade tashi ashühlü müthreh-e.

⁵Tsingrangbanü atsurü te roh-i athsüchi yu yobasü nührünü nbüchücho mah-o? “Itso, Abüdongbanü nüh mülichijüde lasih jüng, ko abinü yübüde suh tüzah.

⁶Tunüo Abüdongbanü abinü müirü mükhu te müchongchijüre, ko abinü atsurü roh-i khyüchorü müipi rahsehre.”

⁷Hi arahsehnung nengdangepü lüm rangchoung; Tsingrangbanü atsurü te roh-i nührü bichirepü nührü chongchaba tsünü ngusohre. Aunü mürahsehdhengcho tsurü sü liro?

⁸Atsurüti aparü roh-i nüh mürahsehkhang, nüh atsurükhung mah, ta matsu.

⁹Ihsa shutsa autinü Ihsa rahsehre ko Ihsanü arüh jengreng drüre. Khang, Ihsa anbü Au te khüta alaa abi pohki mülinung!

¹⁰Ihsa shutsa autinü, arühnü athsalangepü lümcho akhikyah chah du Ihsa rahsehre; ta Ihsanü abi amüsaba ngunung shulüm, Tsingrangbanü Ihsabürü tsanung nengdang nguchire.

¹¹Arahsehba bekhyah lalü akünyangnung mah, ta awahnung. Ta akhanglang, sürü hütsünü rahsehro arüh amüsaba akang atbachi sih sihre.

¹²Nüh suhmüzeh kheh tsü dhimüsung, hütsüpü nü adhridhri mükhoh tsü rezehsohng!

¹³Jing ajah tsü mülerohpenung, ta kyangnung nengdang lang amüchong la tsehng.

¹⁴Atümung te yangtsa la lieng, ko amüsa akang khüdu linung müküpm, tunüo sünüsü hütsü müzehpü Abüdongba ngunung mükoh.

¹⁵Tsingrangba achomang lanü müximülanung müzahng. Singra akha khüi zide hütsü müyühnü chongcha khütang chürosohro, süsü hütsü tükyo.

¹⁶Süsü, Esau, sünü khüdupi yangtsu ngang abi aukhuba thsiking icho, abi kyo amümüsa ko anbü mükeh akang tükang.

¹⁷Abinü akhanglang Au amüwa khyünyücho; ta iipehcho, tunüo nahshükih threh yangchi nye, abinü akhudi tu nguchicho hütsü mülichinung mükohcho.

¹⁸Israelrü rocho roh-i, mihmüle liba Sinai Zong, ama ko amarürah, tsingxinyübong,

¹⁹rühti mehba, ko yuva khüdu sah kyo nührü müro. Khode müyurütinü yuva tsü yuchicho yu apa tüyuchisoh pü arühnü kihchicho,

²⁰tunüo arühnü yuzeng apa khüinü, “Kanglungrünü mii azong tsü thahpükhang, hütsü mapsehpehng,” pü yoba tsü mürangcho.

²¹Adhengnung tsü khura adrünung thsachonü Mosanü yocho, “Ih dhridhri drüre!”

²²Ta nührülü Zion Zong ko akang Tsingrang yangdi, ninglang Jerusalem yang ninglang riwürü hajar adrong te roko.

²³Nührü Tsingrangba aukhurüti, sürü neng ninglang yanglih la thrah liro, arüh akünyang ashimükhong la ro lile. Nührü amüi tsurü atümung yukhabong ko apisa kangba amüsarü nbüti Tsingrang yanglang roko.

²⁴Nührü azengchotacho asi külüpba ko Abel shüh tenü atsau anyengchocho shüh xahkehba Jisu yanglang ro lile.

²⁵Hütsünü, sünü choro abi yu münyinung lanü müzahng. Sürünü limih la amüsa yusi jübong yu mükhyüchocho arüh mütsiphucho. Akhang, Ihsanü ninglangnü chobong chahnü ximüla tsikhang khüta tsiphunung!

²⁶Abi yuvanü hütsüde limih shühchicho, ta ade abinü hi nyengchoko, “Adesü Ihnü limih du mah, ta ning mii shühchijünung.”

²⁷“Adesü khüdupi” pü yoba adüzü, athrichoti shühnahnung, ko khyümüinung ko tu müshünahchehro hütsü nyingnung.

²⁸Hütsüeko, müshünahchehba Yanglih ngucho nengdang Ihsanü anengse jübae. Ihsanü Tsingrangba nengse, jengreng jo ko drüsehnü abinü künyangnungthsa abi mübonung;

²⁹tunüo Ihsa Tsingrang tsü yuje achangjüba michang lile.