Read Sangtam Naga IBRIRÜ 13 Bible Online

IBRIRÜ 13 - Sangtam Naga bible

IBRIRÜ 13

¹Khristan jünirü roh-i mütozah müitaang.

²Shirü te amüi ngunung tünbüchü. Hütsüta nguchide khürünü mümüdhepü ninglang riwürü nüyohcho.

³Sürü arangyoh la liro, arüh te müjang rangyohcho roh-i arüh lümchehng. Sürü chongcha liro, arüh te müjang chongcharü roh-i arüh lümchehng.

⁴Atümungnü Kuh kangba tsü dhichibae, ko anii anitpü khüdunü khüdu te longlangcheh libae. Sürü mabomashi ko nahtrahnaxengro Tsingrangbanü arüh yukhanung.

⁵Thsi müiba lanü nührü za lieng, ko nü licho la longkyang. Tunüo Tsingrangbanü yore, “Ihnü khodesü nüh müpehjünung; Ihnü khodesü nüh müthrüchahchüpehnung.”

⁶Khang Ihsanü rezeh yonung: “Abüdongba I trorü, Ihnü müdrünung. Sünü I chah tu nguchinung?”

⁷Nührü bekhu langnürüti, sürünü nührü te Tsingrangba yusi chocho arüh lümchehng. Arüh khüta lipü sücho, hütsü lümdheng, ko arüh yudsi dhengchorü kang.

⁸Jisu Khrista atü, chünye ko lede asusuh.

⁹Alang alang adoba asinü yuje lang lanü nührü tünüchotsisoh. Tsuyongba yuzeng nyicho khüinü hütsü bichirüti tu müjingchocho hütsü mah, ta Tsingrangba achomang lanü rang liba tase khyüchonung tsü atsa.

¹⁰Jihudarü mübüji chah dikehrü bebürütinü ihrü bholu chah kangmübü tusü tsunung athsalang mah.

¹¹Jihudarü amichahba Bebürünü kanglungrü shüh tsü Amüsauba Müdüm la amünyi nengdang mübünung hirore; ta kanglungrü afü tsülü dongkhu tahre.

¹²Hütsünü Jisunü apu shüh khu nyitsarüti müsachehsohnung nengdang Yangdi nanglang sücho.

¹³Hütsükhang, Ihsanü abi ashah changtanung dongkhu abi yang wonung.

¹⁴Tunüo hiba lih la Ihsa nengdang lede shulüm yangdi müle; aronung liba yangdi khüdu nengdang Ihsanü yingre.

¹⁵Hütsünü, Ihsanü Jisu khu Ihsa kangmübü roh-i Tsingrangba khyang anengse beküp khu abi Abüdongba epü nyengcho mübonung.

¹⁶Atsa nguchinung ko trotanung tünbüchü, tunüo hiri amübü tsünü Tsingrangba künyangsohre.

¹⁷Nührü langnürüti yochonyi arüh yuzeng bichieng. Arüh dikehba nengdang Tsingrangba te yuzi jünung lichonü, arühnü mükyahshangpü nührü nbü nyahre. Nührünü arüh yocho nyikhang, arühnü arüh nguchi künyangseh nguchinung; hütsü mahkhang, arühnü wahseh du nguchinung ko hütsünü nührü nengdang tu müjingchonung.

¹⁸Ihrü nengdang mütozah dangkhidangnangjüng. Ihrü lümlong müsa licho ihrünü müdhele, tunüo bekhyah apüm la ihrünü athsalang du nguchinyüre.

¹⁹Ko Tsingrangbanü Ih nührü yang zah thali müthehsohnung nengdang alaa dangkhidangnangjüngpü kihchire.

²⁰Tsingrangbanü Ihsa Abüdongba Jisu, sü San nyahrü Adiuba ko sü kangmübü thsa sücho khu müchangkaba azengchota külüpcho, abi asü lanü kanglisohcho.

²¹Atbachi Tsingrangnü apu lümcho nguchinungthsa nührü thsütah atsa apüm nührü khyang jüng, ko abinü Jisu Khrista khu ihrü chah apu lümcho nguchisohng. Ko ahechi tsü Khrista te achangka müli thsaang! Amen.

²²Jünirüti, pa athsüchiba yu hi rangcho nyieng pü Ihnü nührü te kihchire; tunüo Ihnü nührü te thrahba vathrah hi asheng mah.

²³Ihsa jünirü Timoti akhangti kuh lanü müthehko. Abi zah rokhang, abi zehnü Ih nührü te shirütanung.

²⁴Nührü langnürüti ko Tsingrangba tsurüti atümung te Salüm young. Italy la jünirütinü nührü te Salüm müdhesohre.

²⁵Tsingrangba achomang nührü atümung te lieng. Amen.