Read Sangtam Naga IBRIRÜ 7 Bible Online

IBRIRÜ 7 - Sangtam Naga bible

IBRIRÜ 7

¹Hiba Melkizedek hi Salem la yangthsaba ko Amichahba Tsingrangba bebürü licho. Abraham rothsa khüdu la yangthsarü müyü kohpü thali ro yade, Melkizedeknü abi shiro müwajücho.

²Ko Abrahamnü mahcho hirocho apüm lanü dhüre la khüdu jücho. (Melkizedek neng akhudiba adüzü tsü “Amüsaba Yangthsaba; ko abi Salem la Yangthsaba thsachonü abi neng adesü, Yangtsa Yangthsaba püsü dsicho”.)

³Melkizedek atpa Au mahkhang ajü amü süsü müle; abi asurocho ko asücho tu müle. Abi Tsingrangba Tsurü kyo lede bebürü lile.

⁴Abi khütoh-inang lümdheng! Ihsa jümürü anengkhong Abrahamnüsü rothsala mahchocho apüm lanü dhüre nohlüm jücho.

⁵Israel nyitsarüti, abürü nyitsarü ko Abraham chahnü trahchochoti thsanye, arüh chahnü dhüre la khüdu khyübülungnung Levi chahnü trahchochoti bebürü te yuzengnü mülacho.

⁶Melkizedek tsü Levi chahnü trahchocho mah, ta abinü Abraham, sünü Tsingrangba anyengchocho khyüchocho, abi chahnü dhüre la khüdu khyücho ko abi müwajücho.

⁷Ajübong tsü akhyüchobong tenü adiuepü müdhele.

⁸Bebürü yola lü, dhüre la khüdu tsü asüba nyitsarünü khyüchocho; ta Melkizedek lahpilü, dhüre la khüdu tsü amüsa yunü yocho roh-i, amüsübanü khyüchocho.

⁹Ko yonungnü, khode Abrahamnü dhüre nohlüm jücho, Levi (sü hungnü dhüre nohlüm khyüchocho) abinüsü hütsü jücho.

¹⁰Melkizedeknü Abraham shirüde Levi müsuroecho.

¹¹Hiba hi Levirü bebü nguchi khu Israelrü khyang yuzeng tsü jücho. Levirü bebü nguchi tsü pisarelang, Aron chahnü mah, ta Melkizedek müliba tsü jünung müdhsütahcho.

¹²Tunüo khode Bebü mülitanang, yuzeng lasü amülichi chüronung kangre.

¹³Ko Ihsa Abüdongba, sü nengdang hiri yorü, abi hung pa khüdu lanü, ko abi hung lanü süsü bebürü müthsadheng.

¹⁴Abi Juda hung lanü surochoepü atsitsae; ko Mosanü bebürüti nengdang chode hiba hung hi müdangchi.

¹⁵Khode bebü apa khüdu Melkizedek kyo chürocho, hütsünü alaa atsitsau kangsohcho.

¹⁶Abi nyitsarü yuzeng yangthsa khunü mah, ta müchangkaba akang zii khu bebürü khüdu kangcho.

¹⁷Tunüo amüsa yunü yore, “Melkizedek chung la, nüh müchangkaba bebürü.”

¹⁸Hütsünü yuzeng ahiba tsü khyümüicho, tunüo hütsü suh müzeh ko akhyüchah müle.

¹⁹Tunüo Mosa yuzengnü tusü apisa mükangsoh. Ko ade alongdi atsau khüdu khüi khu Ihsa Tsingrangba amünyeh wünung hütsü jo lile.

²⁰Hütsü chah lahkeh, Tsingrangba yuchüm khüdu lile. Aparü bebürü kangsohde hütsütari yuchümba mülicho.

²¹Yuchümnü Jisu Bebürü kangde, Tsingrangbanü abi te hita yocho: “Abüdongbanü yuchümko ko alasih mümülichinung: ‘Nüh lede khyang bebürü kangnung.’ ”

²²Hinü Jisu tsü azengchocho atsauba kangsohre.

²³Atsichola adrong bebürü jehcho, tunüo asübanü arüh nguchi mütozah nguchinung lanü yaticho.

²⁴Ta Jisu lidu lire, ko abi bebü nguchi sü chahsü müphungkehjüre.

²⁵Hütsünü, sürü Tsingrangba yang abi khu khümchonung rorünang, ade ko lede abi akohba lile, tunüo Tsingrangba te arüh nengdang kihchinung abi lede lile.

²⁶Hütsünü, Jisu tsü Ihsa thsütah desahnung Amungthriba bebürü. Abi amüsa; abi chah amünyi mahkhang mülang müle; münyirü yolanü abi pathsa throcheh yohpücho ko ningti michah küdusohcho.

²⁷Abi aparü amungthri bebürü mükyo; abi apu münyi nengdang akhu, ko nyitsarüti münyi nengdang kangmübü nyümong müthe jünung müdhsüdah. Abinü apu akang jüchonü, lede nengdang kangmübü khüdu jüko.

²⁸Mosa Yuzengnü amüpisa nyitsarü amungthriba bebü thsanung throcho; ta yuzeng tenü aka ro Tsingrangba anyengchocho yuchüm zeh, lede nengdang apisa kangsohba Atsudhre throchehcho.