Read Sangtam Naga IBRIRÜ 8 Bible Online

IBRIRÜ 8 - Sangtam Naga bible

IBRIRÜ 8

¹Ihrünü yoba apüm tsü Ihsa Bebü Amichahba khüdu ninglang Ahechibong Yangthsaba pümji tsalang pümba nengdang lile.

²Nyitsarünü mah, ta Abüdongbanü külüpcho yujeba shükuh Amüsauba la abinü bebü nguchi nguchire.

³Amichahba Bebürü müipi jiyünung ko Tsingrangba khyang akang mübünung throchehre, hütsünü Ihsa amichahba bebübasü lango mübünung athsalang kangcho.

⁴Abi limih la lirelang, abi bebürü mükangbae, tunüo yuzengnü mülacho roh-i jiyü mübünung bebürüti lile.

⁵Arühnü nguchiba tsü ninglang liba amübükuh nbükhüm du iithsare. Mosasü hütsü roh-i du licho. Khode abinü shükuh thsanung dikehcho, Tsingrangbanü abi te yocho, “Lüpcho tsü nü te azong chah ngusohcho roh-i du thsaang.”

⁶Ta ade, arüh tenü amichahba bebü nguchi atsauba Jisu khyang jüba tsü, Tsingrangba e nyitsarü nyüh kahla azengtacho atsau khüdu külüpko, tunüo hi atsau anyengchochoti chah müdongkeh lile.

⁷Akhudiba azengchotaba tsü pisarelang, anyüuba tsü müdhsütahba thsako.

⁸Ta Tsingrangbanü abi nyitsarüti chah amülanglang dhengcheh yocho: “Abüdongbanü yore, Ihnü Jihudarü te ko Israelrü te azengchotacho asi külüpnung nyümong tsehle.

⁹Ihnü arüh khehnü shüripü Ijip limih lanü nücheh nyümong, Ihnü arüh jümürü te külüpba azengchotacho roh-i müthsanung. Ihnü arüh te külüpba azengchotacho arühnü müyohbü, hütsünü Ihnü arüh müdhengcho.

¹⁰Abüdongbanü yore, Ihnü aronung la Israelrü te külüpnung azengchota tsü hiroh-i linung: Ihnü arüh thoh la I yuzengti yohjünung ko arüh lasih la hütsü thrahnung. Ih arüh Tsingrang thsanung, ko arüh I nyitsarüti thsanung.

¹¹‘Abüdongba müdheing’ pü arüh sünüsü abürü nyitsarü müdonung, mahkhang ayangrü te müyonung. Tunüo azauba chahnü adiuba chii arüh atümungnü Ih müdhenung.

¹²Ihnü arüh münyiti pehjünung, ko arüh thsamehcho khodesü mülümchehnung.”

¹³Azengchocho asi khüdu yocho tsünü, Tsingrangbanü akhuba tsü ahi kangsohko; ko khüi ahi ko threhro hütsü zah changpehre.