Read Sangtam Naga IBRIRÜ 9 Bible Online

IBRIRÜ 9 - Sangtam Naga bible

IBRIRÜ 9

¹Akhudiba azengchotacho la mübünung yuzeng zehle ko nyitsarünü külüpcho amübü chah nengdang zehle.

²Shükuh khüdu thsacho, ko akhudiba chongsah te Amüsa Müdüm pü dsicho. Hütsüla dsi müdongsing ko Tsingrangba khyang mübücho hümthse kehpüba tsingthsang licho.

³Anyüuba chongsah yonglang chongsah khüdu te Amüsauba Müdüm pü dsicho.

⁴Hütsüla Müchiji tahji hon bholu khüdu ko hon füh la manna zehpü hon-nü müshütiba Amüsa Singdi khüdu, Aron ja chah anu chipü ko yuzeng lungtpah anyüh licho.

⁵Singdi michah tsü Cherubim aqonü achomang pümji tsü phati licho. Ta ade aranü changnah yonung bekhyah mah.

⁶Hütsüri tsü hita küdang lile. Bebürüti tsü arüh dikehba nguchinung nyümong müthe chongsah akhudiba la tsü züdure.

⁷Ta amichahba bebüba du kang la khüdupi müyurünü mümüdhepü shitpahcho münyiti nengdang Tsingrangba mübünung ashüh bipü züdure.

⁸Amüsauba Müdüm la züdunung tsü akhudiba chongsah litashilü lang khangthru mülepü Anbü Amüsanü tsitsa yore.

⁹Hiba tsü shang hiba nengdang adüzü khüdu lile. Hütsü adüzü amübü ko kanglungrünü Tsingrangba khyang mübücho khunü nyitsarü lasih adekheng mükangcheh,

¹⁰tunüo hütsü tsuba, yongba, ko apa ayah müsacheh khüdu due. Hiri apüm amülichiba asi Tsingrangbanü mükülüp-pah-ede amichah ayah yuzeng due.

¹¹Ta hila liba atsa Amichahba Bebü roh-i Khrista ropehko. Abinü dikehba shükuh tsü adiu ko alaa apisaba; hiba hi nyitsarünü thsacho shükuh mah, adüzü hiba athricho limih yola müzeh.

¹²Khristanü shükuh tsü khu amüsauba la tsü lede nengdang khüdupi züdude abinü kangmübü jünung miza ko misüpung shüh mübi; ta abinü apu shüh khu Ihsa nengdang müchangkaba akangcheh ngujücho.

¹³Miza ko misüpung shüh ko misüza tahcho mitru tsü nyitsarü michah xahcho, ko hinü arüh amümüsa lanü müsachehjücho.

¹⁴Khang, Khrista shühnü khüdoi alaa nguchichehpü linung! Müchangkaba anbü khu abinü Tsingrangba khyang apisaba kangmübü khüdu apu akang jücho. Ihsanü akang liba Tsingrang dikehchehnung nengdang abi shühnü akhyüchah müliba ayah mübü lanü Ihsa müsachehjünung.

¹⁵Hütsünü, sürü Tsingrangbanü dsicho, arühnü azengchocho amüwa ngunung nengdang Khrista tsü asi anyengchocho langbürü kangcho. Akhudiba azengchotacho lide nyitsarüti thsamehba lanü za lisohnung nengdang asüba licho.

¹⁶Yuchang khüdu tsitsanung nengdang, nyitsarüba tsü sücho yuzi jünung thsütahre,

¹⁷tunüo abi akang li tashi yuchang tsü amii müle.

¹⁸Hütsünü, akhudiba azengchotacho tsü ashüh zehpü du nguchi kangcho.

¹⁹Akhudi, Mosanü nyitsarüti te yuzeng la zehcho apüm müdhesohcho. Hütsüpü abinü miza ko misüpung shüh kih la yohrütapü hyssop ko anbüh shü amoh la thsangpü yuzeng vakha ko nyitsarüti chah xahkehjo yocho,

²⁰“Hiba hi Tsingrangbanü nührü khyang ashühnü shingcho azengtacho lile.”

²¹Hütsü kyo, Mosanü shükuh ko mübü la bichiba kohro apüm la xahcho.

²²Ajüje, Yuzeng roh-isü, ashühnü lüpcho müsachehjüre, ko ashüh khatohpü du münyi mülang pehre.

²³Ninglang liba dhengchocho kohro tsü hütsüta müsachehnung thsütah licho. Ta ninglang kohroti tsü alaa atsauba mübü thsütahre.

²⁴Tunüo khehnü külüpcho Amüsa khüi adhengchocho liro, hütsüla Khristanü müzüdu. Ta Tsingrangba bete Ihsa nengdang ngunung ninglang yanglih tsatsa la züducho.

²⁵Jihudarü Amichahba bebürünü kang mükhu Amüsauba Müdüm la tsü kanglungrü shüh bipü züdure. Ta Khristanü apu jangjang mübü jünung adrongpi müzüdu,

²⁶hütsütarelang limih thridunü abi adrongpi chongchapü libae. Ta, ade shang bekhyah apüm achangka amünyethsa rode, apu akang mübü khu amünyiti pehjünung lede nengdang khüdupi ngusohcho.

²⁷Nyitsarü müipi khüdupi sübae, hütsüpü Tsingrangbanü yukhanung.

²⁸Hütsüta nyitsarü khütango münyi hinung nengdang Khristanü akang mübü khüdupi jücho. Amünyi nengdang mah, ta abi yingrü khümchonung nengdang abi anyüpili ronung.