Read Sangtam Naga JAKOB 2 Bible Online

JAKOB 2 - Sangtam Naga bible

JAKOB 2

¹Ajünirüti, Ihsa Abüdongba Jisu Khrista, ahechi Abüdongba chah yudsirü kyo, nührünü khodesü tsahdheng-kudheng mübichibae.

²Adüzünü nührü ashibülung la alirü khüdu hon imüshi yohpü ko shü atsa müpipü rokhang, ko shü athreh müpipü ailümrüsü khüdu rokhang,

³ko nührünü tsa jengkiba te tsü alaa jengreng jo, “Pümji atsau hila püm,” ko ailümbong te tsü “hütsüla yaang mahkhang hila I jingjükehji la püm” pü yokhang,

⁴nührünü nührübürü yola throchehthrola bichire ko amütsa lümlongnü yukhare.

⁵Nyieng, amüi jünirüti! Limih la ailümrü tsü Tsingrangbanü yudsi la alirü kangnung ko abi müirüti te nyengchocho yanglih tsü arüh yo kangnung abinü throchehcho.

⁶Ta nührünü ailümrü mükhimünguko! Nührü khingchirü ko yukhaji lang nowürü tsü alirü tsü mahrü do?

⁷Nührü khyang jüba neng atsa nyüm müchümükehrü tsü arüh lile.

⁸Amüsa yu la “Nühnü nü kurümrü te abürü roh-i müing,” pü yoba tsü nührünü ninglangrü yuzeng roh-i bichikhang, nührünü athsalang nguchire.

⁹Ta nührünü tsahdheng-kudheng nguchikhang, nührünü amünyi shitpahre, ko yuzeng thsangnyangrü khüdu roh-i yuzengnü nührü mülangjüre.

¹⁰Sünü yuzeng khüdu thsangnyangro atümung thsangnyangcho amülanglang kangre.

¹¹Tunüo “Nahtrahnaxeng tübichi” pü yode, abinü “Tümapseh” püsü yore. Nühnü nahtrahnaxeng mübichi nye mapsehkhang, nüh yuzeng thsangnyangrü kangre.

¹²Ihsa nyüje kangsohba yuzeng tsünü yukhanungba nyitsarü kyo choung ko nguching.

¹³Tunüo yanglilüm mübichiba nyitsarü yu khade Tsingrangbanü yanglilüm müngusohnung; ta yanglilümnü yukhaba kohre.

¹⁴Jünirüti, nyüh khüdunü abi yudsi lilepü yonye anguchi mülikhang, tu jingchonung? Hütsü yudsi tsünü abi khümchochehnung mah-o?

¹⁵Adüzünü jünirü mahkhang jünilarü khürü shü thsütahrü ko atsunungsü kükyo müle.

¹⁶Arüh te, “Tsingrangbanü müwajüng! nührü langchikhüti lieng! ko mi jeng tsung ko yokhang!” ta nühnü akang thsütah tusü müdesahkhang, tu jingchonung?

¹⁷Yudsi tsü hütsü roh-i nguchi müzehkhang, asücho lile.

¹⁸Ta khürünü yonung, “Nyüh khüdu yudsi lile, ko aparü khüdu nguchi lile. Sünü nguchi müzehpü yudsi khüta lichehnung I te ngusohng.” Ihnü I nguchi khu I yudsi nguchi ngusohnung.

¹⁹Tsingrangba khüdu duepü nührünü yudsirü mado? Tsale! Amünyi nbünüsü yudsire, ko dro dhridhrire.

²⁰Nüh amüsithsa! Nguchi müzehpü yudsi tsü ayüepü ngunyürü mah-o?

²¹Ihsa jümürü Abraham, Tsingrangba jingte khüta longlang kangcho? Hütsü bholu chah atsurü Isak amübü jüba nguchi khu lile.

²²Nühnü müngurü mah-o? Ayudsi ko anguchi müjang nguchicho; ayudsi tsü anguchi khu kükyüsohcho.

²³Ko amüsa yu tikehcho, “Abrahamnü Tsingrangba chah yudsicho, ko abi yudsinü Tsingrangbanü abi amüsa kang khyüchocho. Hütsünü Abraham te Tsingrangba shangrü” pü dsicho.

²⁴Hütsünü, yudsi dunü mah, ta apu nguchinü nyitsarü khüdu tsü Tsingrangba te langsohrepü nührünü ngusohre.

²⁵Hütsüta nahtrahnaxenglatpü Rahab, sü Israelrü füzathsarü nüyoh müdongsohcho ko arüh lang palangnü tsicheh tsisohcho nguchi khu abükyü Tsingrangba te langsohcho.

²⁶Hütsüta, anbü müzehpü afü khüta asücho, hütsü roh-i nguchi müzehpü yudsi asücho lile.