Read Sangtam Naga JAKOB 3 Bible Online

JAKOB 3 - Sangtam Naga bible

JAKOB 3

¹Ajünirüti, nührü drongra adorü mükangbae, tunüo Ihsa adorüti aparü tenü alaa amülingba yu khanungepü nührünü müdhele.

²Ihsa atümungnü adrongpi thsamehre.Ta nyüh khüdunü abi yu la khodesü müthsamehkhang, abi apisae, ko abinü akang apüm mii rahsehchehnung.

³Ihsanü Kuri be la yochonyisohnung laküm yohjüre, ko Ihsa wünyücholang wüsohnung nüchire.

⁴Mahkhang kihkuh khüdu nengdang lümdheng: Hitoh-i dinye ko nyübongnü zii fünye, atbhengsing khüdunü anüchibanü khüilang wüsohnyünang hütsülang würe.

⁵Mülesü hütsü kyo lile: Hitoh-i zaranye, arangcheh nengdang mii tüzümükhümre. Mihmüle azikyahnü khüta rangmü arangcheh mürohro lümdheng!

⁶Ko müle tsü michang kyole. Hiba hi amümüsa amülah khüi Ihsa fü la kehba ko Ihsa akang apüm khu amünyi zisohre. Mümehmi abükyü lanü roba michang tsünü Ihsa akangli ayung la michang thsürangjüre.

⁷Nyitsarünü rahsehnung kohre ko kanglungrü apa atümung rahsehko, rangmü kanglungrü ko uzati, chitsiba ko ngu.

⁸Ta sünüsü khodesü müle mürahsehcheh. Hiba hi mürahsehchehba, asü müyühnü jeng liba amünyi lile.

⁹Ihsanü hi Ihsa Abüdongba ko Au nengse nengdang bichire ko Tsingrangba apu kyocho la thricho nyitsarüsü chokehcholare.

¹⁰Bekah khüdu lanü anengse ko chokehchola yu chürore. Hütsüta müthsabae, jünirüti!

¹¹Kihna khüdu lanü kih anyiyah ko akha müpohchere.

¹²Jünirüti, ngurüsih dongnü olive sih müsihcheh; shükusishünü ngurüsih müsihcheh, mahkhang mihkih-poh lanü kih anyiyah müpohre.

¹³Nührü yola lümlong azeh mahkhang anyicheh khürü lirü mah-o? Abinü apu akang atsa nguchi ko lümlongnü yuzi ngusohbae.

¹⁴Ta nü lasih la mükohdheng, akha, ko abürü nengdang du lümba likhang, nü lümlong nengdang müthsehnü yujeba nyüm amünyi tüshitbah.

¹⁵Hütsütari lümlong tsü ninglangnü rocho mah; hiba hi alimih shutsa ko amünyi yo lile.

¹⁶Khüde mükohdheng ko abürü nengdang du lümba liro, hütsüla yubejarong ko amünyi lüpcho lile.

¹⁷Ta amilangnü roba lümlong tsü akhu amüthseng, atbachi, alonglüm ko tsataba; amüinü jeng ko asih atsa jüre: ko alümxünung ko akhürah müzeh.

¹⁸Ko yangtsa külüprütinü yangtsa khyümba singtse lanü sihba tsü atsa tsü lile.