Read Sangtam Naga 1 PETER 5 Bible Online

1 PETER 5 - Sangtam Naga bible

1 PETER 5

¹Ipusü azirü khüdu thsachonü, nührü yola Lithro azibarüti te thsüchire. Ih Khrista chongchacho yuzi ko mishanung liba ahechi la tsü Ihsü khyünung.

²Tsingrangbanü nührü khyang jüba santi tsü khingnü mah, ta longphisehnü xüküm nyahnung Ihnü nührü te thsüchire. Angang nengdang du mah, ta yujeba dikehnung alongphinü nührü nguchi nguching.

³Nü pohki yohpüjübarü michah tsü akohtitangthsa tünguchi, ta amülung te tsü adüzü kang.

⁴Ko khode san nyahrü ayingba tsü mishanang, nührünü müsehchangba ahechi kuthri tsü ngunung.

⁵Hütsü roh-i, nührü azabarütinü azibarü pohki lieng. Ko nührü atümungnü azikyah kangbanü kihrümpü khüdunü khüdu dikehtang; tunüo amüsa yunü yore, “Tsingrangbanü amüthsehrü yatire, ta alonglümrü khyang achomang jüre.”

⁶Hütsüeko, Tsingrangbanü bekhyah adekheng la nührü dhimüsunung nengdang, Tsingrangba akohba kheh pohki abürü jangjang longlüm kang.

⁷Nührü bhamüling apüm abi khyang jüng, tunüo abinü nührü xükümre.

⁸Xengxengnü lieng! Kukeing! Khong liba kihkhünying kyo, nührü münyehrü motsingnü khürü münyünung yangchile.

⁹Nührü yudsi drengdreng ko abi yatieng, tunüo limih apüm la nührü müjang yudsirüti atümung hiroh-i du chongcha dhsükehlepü nührünü müdhele.

¹⁰Ta nührü azachah chongchapü khanglang achomang Tsingrang, sünü Khrista la lede ahechi changtanung nührü dsicho, abinü nührü pisasohnung, ko nührü drengdreng suzehsohnung ko nührü müshehchisohnung.

¹¹Abi te müchangkaba zii thsaang! Amen.

¹²Ihnü hiba vathrah akhikyah hi, Silas, sü Ihnü longlangchehba khristan jünirü roh-i khichiro, abi arüku khu thrahre. Tsingrangba yuje achomang hila drengdreng yanung Ipu yuzi jo nührü te thsüchire.

¹³Babylon la liba, Tsingrangbanü sü throchehcho, nührü nilarü Lithro ko I tsudhre Marknüsü nührü yang salüm müdhesohre.

¹⁴Khristan amüi la khüdunü khüdu te salüm jütaang. Khrista la liba nührü atümung te atbachi thsaang.