Read Sangtam Naga 2 PETER 1 Bible Online

2 PETER 1 - Sangtam Naga bible

2 PETER 1

¹Jisu Khrista dikehrü ko riwürü Simon Peter chahnü, Ihsa amüsabong Tsingrang ko Kangchehjüba Jisu Khrista sü khu ihrü khyang roh-i thsidi yudsi jücho arüh yanglang:

²Tsingrangba ko Ihsa Abüdongba Jisu nührünü müdheba la achomang ko atbachi ajeng thsaang.

³Sünü apu ahechi ko atsa changtanung la Ihsa dsicho, abi müdhecho khu Ihsa amüsa akang lichehnungthsa Tsingrangba amüsa ziinü langkhüru Ihsa khyang jüko.

⁴Hiri jiyü khunü hiba limih la thsangnyangjüba mükhyahmürah lanü nührü tsiphunung ko amüsa saying changtarü kangnung nengdang abinü hiroh-i anyengchocho arangcheh ko thsidi jiyü Ihsa khyang jücho.

⁵Hi khyanglangnü nührü yudsi atsa zikehnung nengdang nührünü atsauba nguching;

⁶amüdheba chah abürü jangjang rahsehba; abürü jangjang rahsehba chah arangcho; arangcho chah Tsingrangba kyoba,

⁷Tsingrangba kyoba chah jünirü amüita ko amüi lahkehng.

⁸Nührü nengdang hiri atsati thsütahre, ko hirinü nührü thangchi likhang, Ihsa Abüdongba Jisu Khrista müdheba la nührü azahcheh ko anguchi kangsohnung.

⁹Ta sü hütsüri müliro abi amüpisa, hütsünü abinü müngure ko akhulang amünyi lanü müsachehcho mii nbüchopehre.

¹⁰Jünirüti, hütsünü nührünü palu adsicho ko throchehcho alaa müdhenung dee müküpm; nührünü hütsü roh-i thsakhang, khodesü mümüthikehnung.

¹¹Hütsüta Ihsa Abüdongba ko Kangchehjüba Jisu Khrista müchangkaba yanglih la tsü züdunung nührü khyang ajeng mülajünung.

¹²Nührünü hiri atümung müdhe nye ko nührünü khyüchocho yuje la tsü drengdreng rarang linye, hiri nengdang Ihnü lede nührü te lümkehsohnung.

¹³Ih akang lidelü hiri nengdang nührü thsümüsunung tsü I nengdang athsalangepü Ihnü lümre.

¹⁴I shutsa akang zah khyümüinungepü Ihnü müdhele, tunüo Abüdongba Jisu Khristanü I te yopehko.

¹⁵Hütsünü, Ih süpü khanglang hiri nührünü lede lümkehnung nengdang Ihnü I kohchonü lang thongunung.

¹⁶Ihsa Abüdongba Jisu Khrista zii la ronung nengdang nührü te müdhesohde ihrünü akülüpcho yukheh chah müdümpi. Ihrübürü nahtsenü abi dicho nguko.

¹⁷Au Tsingrangnü abi khyang ahechi ko adhichi jüde ihrü hütsü la licho, hütsü amichahba ahechi lanü abi yang yuva rocho, “Hiba hi Ihnü müiba tsurü, sü chah I long kyangre!”

¹⁸Ihrü abi yola amüsa zong chah lide, ninglangnü hiba yuva hi rocho ihrübürünü yuchiko.

¹⁹Hütsünü azikehrütinü sobhoba yusi la tsü ihrü alaa du longlangre. Nührünü dee tsa lasih jo nguchinung, tunüo hiba hi anyangnyü tsingse yingcheh amala vijüba dsi khüdu kyo tsingse püti nührü lasih la vijüba roh-i lile.

²⁰Atanye apüm tenü hi müdheing: Amüsa yula choyoh yu sünüsü palu lümyunü mütphehnahcheh.

²¹Tunüo choyoh yu tu tesü nyitsarü lümchonü müro, ta nyitsarüti tsü Anbü Amüsanü thsüchi Tsingrangba chahnü chocho.