Read Sangtam Naga 2 PETER 2 Bible Online

2 PETER 2 - Sangtam Naga bible

2 PETER 2

¹Atsicho la nyitsarü yola arahkheh azikehrüti chürocho, hütsüta nührü yolasü arahkheh adorüti chüronung. Arühnü athsangnyang, arahkheh adoba chürosohnung, ko arüh rochehba Abüdongba mii münyengchonung, arühbürü michah dhrongyeng achangba hironung.

²Hütsütanye, adrongnü arüh mabomashi akang ithsanung; ko arühnü hütsüta nguchichonü aparünü yujeba Lang nengdang nyüm chonung.

³Nührü te akülüpcho yukheh yochonü hiri müxümüngu arahkheh adorütinü arüh jingchonung. Arüh yukhaba rungnümpü adelü nyahliko ko arüh Achangjübong tsü jesu lile.

⁴Amünyi shitpahba ninglang riwürüti tsü Tsingrangbanü müditpang, ta yukhaba Nyümong yingnü arüh rahpü amarürah mümehmi la dhiyohchücho.

⁵Tsingrangbanü ahiba limih müditpangcho, ta müyudsiba nyitsarüti limih michah kihmülüm rosohcho; ko abinü khümchorüti tsü amüsaba thsingyubong Noa ko aparü nyüh dhünyeh du thsacho.

⁶Tsingrangbanü Sodom ko Gomora yangditi mülangjo michangnü changjücho, ko Tsingrangba chah müyudsirüti nengdang adüzü thsanung arüh yohpüjücho.

⁷Yuzeng müdrüba mabomashi saying khu wahsohba amüsa nyitsarü Lot tsü abinü khümchocho.

⁸Hiba amüsa nyitsarü tsü nyümong müthe arüh münyi nguchi ngu ko yuchi arüh yola wahseh licho.

⁹Tsingrangba nyitsarü atsa khüta khümchonung ko amütsarüti yukhaba Nyümong nengdang khüta khingchi yohpünung,

¹⁰alathsa sürünü arüh athrünyinung shutsa müruba iiwüro ko Tsingrangba tase müthsamünyüro hütsü Abüdongbanü müdhele. Hiri arahkheh adorütinü ahechi ninglangrü khyang jengreng jünung müli, lasih müküp hongzinü arühnü arüh nyüpmüsehre.

¹¹Arahkheh adorüti tenü khütang akoh-u ko re azeh-u ninglang riwürütinü mii Abüdongba jingte nyüpmüseh mümülangjüre.

¹²Ta hiri nyitsarütinü rangmü kanglungrü rangpü mapsehnung suroba kyo arühnü nguchire; arühnü münyichehpü masü nengdang nyüpmüsehre. Arüh rangmü kanglungrü roh-i changjünung,

¹³arühnü amütsa nguchicho ngang arüh chongchanung. Mishanü masü nguchiba tsü arüh nengdang alongnyüpnungepü arühnü khichicho. Nührü yola tsuyongde mii arühnü thsüyohchüba lang nengdang du künyangtaba tsü ashah ko athrünyinung.

¹⁴Arüh nahtse nahtrahnaxengnü jeng amünyinü long münyüpre. Arühnü suh müzehba kihchotsire. Arüh lasih müruthsaba la nanathsa lile. Arüh Tsingrangbanü chokehcholarüti lile!

¹⁵Arühnü lang amüchong tsü pehjüpü thrümeh tsiko; arühnü Beor tsurü Balaam sünü thsi müicho khyanglangnü amüthsalang nguchicho,

¹⁶ko apu amünyi ngang abi khatacho abi khanglang iiwücho. Apu Gadunü nyitsarü yuvanü chonü azikehba amüsithsa nguchi iiticho.

¹⁷Hiri nyitsarüti tsü akungcho yongna ko tsingxinyübongnü fotsiba nyükhi kyole; arüh nengdang Tsingrangbanü amarürah asoh-uba la müdüm khüdu yohpüjüle.

¹⁸Arühnü amüthseh ko amüsithsa yu chonü, amünyi la lirüti yolanü tsicheh tsinungpü lirüti te mabomashi shutsa mükhyahmürah nguchinü nüchotsinung müküpre.

¹⁹Arühbürülü athsangnyangba yurü lipü arühnü bürü te nyüjeba nyengchore, tunüo sü tu khyang kohsohro abi hütsü yurü kangre.

²⁰Ihsa Abüdongba ko Kangchehjüba Jisu Khrista müdhechonü limih athsangnyang lanü tsiphu ropü, anyüpiu xohsoh ko kohsohkhang, hitari nyitsarü tsü akhudi tenü achangka suro deenü amütsau kangre.

²¹Arüh khyang jüba amüsa yuzeng müdhepü thali tsinung tenülü arüh nengdang amüsa lang tsü mümüdhecho deenü atsau thsako.

²²Arüh chah tikehba tsünü choyoh yu tsü yuje-epü ngusohre: “Füzanü abi külücho thali tsure” ko “Shükanü thsangsupü thali wü müyühlire.”