Read Sangtam Naga 1 JOHAN 1 Bible Online

1 JOHAN 1 - Sangtam Naga bible

1 JOHAN 1

¹Adikeh dinü tu akang Yu licho hütsü nengdang ihrünü nührü yang thrahre. Hütsü ihrünü yuchiko, ihrü nahtsenü nguko ko hütsü ihrü khehnü thahpüko.

²Khode hiba akang tsü mishacho, ihrünü hütsü ngucho; hütsünü hütsü nengdang ihrünü sobhore ko nührü te müchangkaba khüiba Au te licho ko khüi ihrü te müdhesohcho hütsü nengdang yore.

³Au ko Atsurü Jisu Khrista te ihrü akehta la tsü nührüsü zehchehnung nengdang ihrünü tu ngucho ko yuchicho hütsü nührü tesü sobhocho.

⁴Ihrü akünyang ajeng kangnung shulüm hi ihrünü thrahre.

⁵Ihrünü yuzi khüi Atsudhre chahnü yuchicho ko nührü te sobhocho hütsü hi: Tsingrangba tsü atsingse, ko abi chah ama thri dusü müle.

⁶Ihsa abi te akehta lilepü Ihsanü yokhang, ta amala likhang, yu la ko nguchi anyüding la Ihsanü arahkheh chore.

⁷Tanye abi atsingse la licho roh-i Ihsanü atsingse la likhang, Ihsa khüdunü khüdu te akehta la lile ko Atsurü Jisu Khrista shühnü Ihsa münyi apüm lanü müsachehjüre.

⁸Ihsanü Ihsa münyi mülepü yokhang, Ihsabürü jangjang thsüyohchüre ko yuje tsü Ihsa chah müle.

⁹Ihsanü Ihsa münyi nyengchokhang, abinü Ihsa münyi pehjünung ko amümüsa apüm lanü müsasohnung, abi longlangchehba ko amüsa lile.

¹⁰Ihsanü amünyi müshitpah pü yokhang, Ihsanü Tsingrangba arahkhehrü kangjüre, ko abi yu Ihsa chah müle.