Read Sangtam Naga 1 JOHAN 2 Bible Online

1 JOHAN 2 - Sangtam Naga bible

1 JOHAN 2

¹I tsurüti, nührü amünyi müshitpahsohnung nengdang Ihnü nührü yang hi thrahre; ta khürünü amünyi shitpahkhang, Ihsa nengdang Au te kihchijürü khürü lile, hütsü amüsaba Jisu Khrista.

²Ko Khrista apu tsü Ihsa münyi mülang pehjübong tsü lile, ko Ihsa münyi du mah, ta atümung mülang pehjürü lile.

³Ihsanü Tsingrangba yuzeng bichikhang, Ihsanü abi müdhelepü Ihsanü tsüpre.

⁴Khürünü abi müdhelepü yokhang, ta abi yuzeng mübichikhang, hitari nyitsarü tsü arahkhehrü ko abi chah yuje tsü müle.

⁵Ta sünü abi yu bichiro abinü yujeba Tsingrangba müicho dekheng ngusohre. Hinü Ihsa Tsingrangba chah lilepü tsüpre.

⁶Sünü abi Tsingrangba chah lilepü yoro abinü Jisu Khristanü nguchicho kyo nguchibae.

⁷Amüi shangrüti, Ihnü nührü yanglang thrahba yuzeng hi asi mah; ta adikeh dinü nührünü bichi rochoba yuzeng ahi du tsü lile. Ahiba yuzeng yu tsü nührünü yuchiko.

⁸Ta ade Ihnü nührü yang thrahba yuzeng hi asi lile, tunüo hütsü yuje tsü Khrista chah ko nührü chahsü nguko. Tunüo ama tsü khu tsile, ko yuje atsingse tsü vi yale.

⁹Sünü abi atsingse la lilepü yoro, ta ajünirü thrünyiro, abi ade yingcheh amala lile.

¹⁰Sünü ajünirü müiro abi atsingse la lile, ko abi chah amüdekheng tu müle.

¹¹Ta sünü ajünirü thrünyiro abi amala lile; abi amala rachire, ko abi khüilang würo hütsü mümüdhe, tunüo ama tsünü abi nahtohsohko.

¹²Ihnü nührü te thrahre, I tsurüti, tunüo Khrista khyanglangnü nührü mülang pehjüko.

¹³Ihnü nührü te thrahre, auti, tunüo nührünü sü adikehdinü licho abi müdhele. Ihnü nührü te thrahre, dhrezarüti, tunüo nührünü amütsaba tsü kohko.

¹⁴Ihnü nührü te thrahre, I tsurüti, tunüo nührünü Au müdhele. Ihnü nührü te thrahre, aurüti, tunüo nührünü sü adikehdinü licho abi müdhele. Ihnü nührü te thrahre, dhrezarüti, tunüo nührü rezeh lile; Tsingrangba yu nührü chah lile, ko nührünü amütsaba tsü kohko.

¹⁵Limih mahkhang hütsüla liba kohro tümüi. Nühnü limih müikhang, Au mümüire.

¹⁶Limih la liba atümung khüi shutsa mükhyahmürah liro, nyitsarünü tu nguro, ko khyünyüro ko hiba limih la lüpcho khüinü nyitsarü müthsehsohro, hiri tusü Au chahnü müro; hiri apüm limih lanü rore.

¹⁷Limih ko hütsüla liba khüi nyitsarünü mükhyahro hütsü khu tsire; ta sünü Tsingrangba lümcho nguchiro abi lede lire.

¹⁸I tsurüti, achangka tsü amünyethsa lile. Khrista rorüh ronungepü nührü te yoko; ko ade Khrista rorüh khütang chüroko, hütsünü achangka tsü amünyethsa lilepü Ihsanü müdhere.

¹⁹Hiri nyitsarü tsü yuje Ihsa yola müzehchoe, hütsünü Ihsa arühnü pehtsicho; arüh tsü Ihsa yola zehrelanglü, arühnü Ihsa te liba thsako. Ta arühnü Ihsa pehtsicho, hütsünü arüh süsü Ihsa yola müzeh pü ngusohre.

²⁰Ta nührülü Khristanü Anbü Amüsa mükhakehjüko, hütsünü nührü atümungnü yuje tsü müdhele.

²¹Hütsünü Ihnü nührü te thrahba tsü nührünü yuje tsü mütsüpchonü mah, ta nührünü hütsü müdhechonü; ko adesü yuje lanü tu arahkheh müchürorepü nührünü müdhele.

²²Akhang, arahkhehrü tsü süo? Hütsü sünü Jisu tsü Mesia mah pü yoro abi tsü lile. Hitari nyitsarü tsü Khrista rorüh lile, abinü Au ko atsurü anyüding mükhyüchore.

²³Tunüo sünü atsurü mükhyüchoro abinü Ausü mükhyüchore; sünü atsurü khyüchoro abinü Ausü khyüchore.

²⁴Hütsütakhang, nührünü adikeh lanü nyisiba yusi tsü nührü lasih la lisohng. Nührü chah hütsüba yusi tsü lisohkhang, lede atsurü ko Au chah nührü linung.

²⁵Ko hiba müchangkaba akang tsü Khrista apunü Ihsa te nyengchoko.

²⁶Ihnü hiba hi nührü thsüyohchünung müküprü nengdang thrahre.

²⁷Ta nührülü, Khristanü abi nbü nührü chah mükhakehjüko. Abi nbü nührü chah litashilü, nührü te donung süsü müdhsüdah. Tunüo abi nbünü nührü te lüpcho donung, ko abinü nührü te tu donang hütsü yuje. Hütsünü, Anbünü tu docho hütsü bichieng, ko Khrista chah chingkeh lieng.

²⁸Ho! I tsurüti, abi chah lieng, hütsünü abi ro Nyümong Ihsa müshahpü mithrungmizi linung.

²⁹Khrista tsü amüsabaepü nührünü müdhele; khang sürünü tu yuje hütsü nguchiro, arüh tsü Tsingrangba tsurüepü nührünü müdhebae.