Read Sangtam Naga 1 JOHAN 3 Bible Online

1 JOHAN 3 - Sangtam Naga bible

1 JOHAN 3

¹Dheng Aunü Ihsa khütoh-i müicho! Abi amüi dirachonü Ihsa te Tsingrangba tsurü pü dsire, hütsü roh-i yuje, Ihsa abi tsurüti lile. Hütsünü liminü Ihsa mümüdhere: tunüo liminü abi mümüdhe.

²Amüi jünirüti, ade Ihsa Tsingrangba tsurüti lile, ta Ihsa tu kangnungnang ade mütsitsae. Ta khode Khrista ronang Ihsa abi kyo kangnungepü Ihsanü müdhele, tunüo Ihsanü apu tsatsa ngunung.

³Khrista chah sünü hiba alongdi liro arühnü khüroh-i Khrista amüsa hütsü roh-i apu jangjang müsa yohpüre.

⁴Sünü amünyi shitpahro abinü Tsingrangba yuzeng thsangnyangre; tunüo amünyi tsü yuzeng thsangnyangba.

⁵Amünyiti hitsinung Khrista rochoepü nührünü müdhele, ko abi chah amünyi müle.

⁶Hütsünü sü Khrista chah liro abinü amünyi mübichire; ta sünü amünyi bichiro abinü abi müngu ko mümüdhe.

⁷Sünüsü nüh tüthsüyohchüsoh, I tsurüti! Sünü yuje tsü nguchiro abi Khrista kyo müsa lile.

⁸Sünü amünyi bichiro abi motsing chahnü lile, tunüo adikeh lanü motsingnü amünyi shitpahko. Motsingnü tu nguchicho hütsü changjünung nengdang Tsingrangba Tsurü rocho.

⁹Sü Tsingrangba tsurü liro abinü amünyi mübichire, tunüo Tsingrangba yangthsa abi chah kehle; ko Tsingrangba tsü Au thsachonü, abinü amünyi mübichire.

¹⁰Hinü Tsingrangba tsurü ko motsing tsurü adukah tsitsajüre: sünü yuje tsü münguchiro ko ajünirü mümüiro abi Tsingrangba tsurü mah.

¹¹Adikeh lanü nührünü yuchiba yusi tsü hi: Ihsanü khüdunü khüdu te müitabae.

¹²Ihsa Kain mükyobae; abi motsing chahnü licho ko anikhung Abel mapsehcho. Tuepü Kain-nü abi mapsehcho? Tunüo abinü nguchiba tsü amüthsalang licho; ko aninü nguchiba tsü athsalang licho.

¹³Hütsüeko jünirüti, limih nyitsarünü nührü thrünyikhang tünyemüyang.

¹⁴Ihsa asücho lanü akang langi rokopü Ihsanü müdhele; ko Ihsanü Ihsa jünirü müichonüepü Ihsanü müdhele. Sünü mümüiro abi ade yingcheh asüba tase pohki lile.

¹⁵Sünü ajünirü thrünyiro abi amapsehrü lile, ko amapsehrü khüdu chah tsü müchangkaba akang tsü mülepü nührünü müdhele.

¹⁶Khristanü Ihsa khyang apu akang jüba hinü amüi tsü tunang Ihsanü müdhere. Hütsütakhang, Ihsanüsü Ihsa jünirüti nengdang Ihsa akang jübae!

¹⁷Alirü khüdunü, jünirü khüdu thsütah ngupü, ta alasih mülehchehkhang, abinü Tsingrangba müirepü khüta yonung?

¹⁸I tsurüti, Ihsa amüi tsü yu ko abe dunü mah, ta nguchinü ngusohba yuje amüi thsabae.

¹⁹Hinü Ihsa yuje yo lilepü Ihsanü müdhenung; ko hinü Ihsa Tsingrangba jingte longlang kangnung.

²⁰Ihsa lasihnü Ihsa mülangjükhang, Tsingrangba tsü Ihsa lasih tenü adiubaepü ko abinü lüpcho müdherepü Ihsanü müdhere.

²¹Hütsüeko, amüi shangrüti, Ihsa lasihnü Ihsa mümülangjükhang, Tsingrangba jingte Ihsa mixüpnung.

²²Ihsanü tuturü chingnang abi chahnü ngure, tunüo Ihsanü abi yuzengti bichire ko abi künyangnungthsa Ihsanü nguchire.

²³Abinü Ihsa khyang yuzeng jüba tsü Khristanü Ihsa khyang yuzeng jücho roh-i, Atsurü Jisu Khrista chah yudsinung ko khüdunü khüdu te müitanung nengdang jücho.

²⁴Sünü Tsingrangba yuzeng bichiro abi Tsingrangba chah lire ko Tsingrangba abi chah lire. Tsingrangbanü Ihsa khyang jüba Anbü khunü Ihsa chah Tsingrangba lirepü Ihsanü müdhere.