Read Sangtam Naga YUKHARÜ 1 Bible Online

YUKHARÜ 1 - Sangtam Naga bible

YUKHARÜ 1

¹Joshua süpü khanglang Israelrünü ABÜDONGBA te tsingdhengcho, “Ihrü sü hungnü akhu wü Kananrü mahnung?”

²ABÜDONGBAnü lalingcho, “Juda hung akhu wünung. Ihnü arüh khehla alih tsü jüko.”

³Judarünü Simonrü te yocho, “Ihrü khyang jüba lih lang tsü ihrü yola rung ko Ihsa müjang Kananrü te khatanung. Hütsüpü nührü khyang jüba lih lang tsü ihrüsü nührü yola ronung.”

⁴Achotsü Judarü ko Simonrü tsü khata lang müjang wücho. Kananrü ko Perizrü michah ABÜDONGBAnü arüh khyang akoh jücho ko arühnü Bezek la nyüh hajar dhüre kohcho.

⁵Arühnü hütsüla Adonibezek ngu abi nyüm khatacho.

⁶Abinü dro tsicho, ta arühnü abi iiwü rangcho ko abi kheh ko ajing müyungkutrehdi khapehjücho.

⁷Adonibezeknü yocho, “Yangthsarü nyühre ajing-akheh müyungkutrehdi khapehpü I tsingthsang pohki alongcho throtsu rachicho. Ihnü arüh te nguchicho kyo ade Tsingrangbanü I chah nguchiko.” Ko abi Jerusalem lang nowücho ko hütsüla abi sücho.

⁸Judarünü Jerusalem mahcho ko hütsü kohcho. Arühnü müyurüti kyüsehcho ko yangdi la tsü michang thsürangjücho.

⁹Hütsüpü, arühnü akhang chah liba, akhang jingdümpi liba ko nyüzüdu lahpi akung lih la liba Kananrü te khatanung wücho.

¹⁰Hütsüpü arühnü Kiriat Arba pü dsiba Hebron yangdi la lirü Kananrü nyüm wücho. Hütsüla arühnü Sheshai, Ahiman ko Talmai hungti kohchehcho.

¹¹Hütsü lanü Judarü tsü hütsütade Kiriat Sefer dsiba Debir yangdi mahnung wücho.

¹²Arüh yola nyüh khüdu Kalebnü yocho, “Sünü Kiriat Sefer kohchehnang Ihnü I tsulatpü Aksa khyüsohnung.”

¹³Ko Kaleb ani Kenez tsurü Othnielnü yangdi tsü kohchehcho, achotsü Kalebnü atsulatpü Aksa abi khyang khyüsohcho.

¹⁴kukang nyümong tsü Othnielnü abükyü te luh khüdu au chahnü chingnung yocho. Achotsü abükyünü gadu chahnü jürocho ko Kalebnü abükyü te tu khyünyüro pü tsingdhengcho.

¹⁵Abükyünü yocho, “Ihnü kihkong khürü khyünyüre, tunüo nühnü jüba alih tsü akungaselih lile.” Achotsü Kalebnü abükyü khyang athahlang ko ajinglang kihna jücho.

¹⁶Ko Mosa aku Kenrü trahnü Judarü yola sedong yangdi Jeriko lanü Juda la Arad kihjing lahpi akungaselih lang wücho. hütsüla arühnü Amalekrü yola lipehcho.

¹⁷Judarünü Simonrü yola arüh müjangnü wü Zefat yangdi la lirü Kananrü kohchehcho. Arühnü yangdi tsü chokehcholacho ko changjüpü hütsü te Horma pü dsijücho.

¹⁸ABÜDONGBAnü Judarü trocho ko arühnü azong lih tsü khyücho. Ta arühnü Gaza, Ashkelon, Ekron ko hütsü mükang lih mükhyüchehcho.

¹⁹Hiri kihjüp lirüti tsü idhse nyübong kari licho, hütsünü Judarünü arüh müii-pehchehcho.

²⁰Mosanü yuzeng jücho kyo, Kaleb sünü Anak hung asang iipehcho, abi khyang Hebron tsü jücho.

²¹Ta Benjaminrünü Jerusalem la lirü Jebusrü müii-pehchehcho ko hütsü tinü Jebusrü tsü hütsüla Benjaminrü yola lirocho.

²²Efraimrü ko Manaserünü hütsütade Luz ko dsiba Bethel yangdi mahnung wücho.

²³ABÜDONGBAnü arüh trocho. Arühnü yangdi la tsü füzathsarü müthehcho,

²⁴ko arühnü yangdi lanü nyüh khüdu chüro ngu abi te yocho, “Yangdi la tsü khüta züdunung ihrü te ngusohng, khang ihrünü nüh müdhsakehjünung.”

²⁵Achotsü abinü arüh te ngusohcho, ko Efraimrü ko Manaserünü hiba nyitsarü ko arüh kukhi chah khu yangdi la lirü atümung kyüsehkhangcho.

²⁶Akhanglang, abinü Hit-rü lih lang tsü wücho ko hütsüla yangdi khüdu külüp hütsü te ade yingcheh liba Luz dsicho.

²⁷Manaserünü Beth, Shan, Tanak, Dor, Ibleam, Megido ko hütsü mükang liba yangditi müii-pehcho; ko Kananrü hütsüla mütozah licho.

²⁸Khode Israelrü rezeh kangcho, arühnü Kananrü tsü arüh yurü kangsohcho, ta arüh atümunglü müii-pehcho.

²⁹Efraimrünü Gezer yangdi la lirü Kananrü müii-pehcho, hütsünü arüh yola Kananrü tsü mütozah licho.

³⁰Zebulunrünü Kitron ko Nahalal yangditi la lirü Kananrü mü-iipehcho, hütsünü mütozah arüh yola licho ko arüh yurü thsa lisohcho.

³¹Asher-rünü Ako, Sidon, Alab, Akzib, Helba, Afek ko Rehob yangditi la lirüti müii-pehcho.

³²Asher-rünü hütsüla Kananrü yola licho, tunüo arühnü arüh müii-pehcho.

³³Naftalirünü Beth Shemesh ko Bethanath yangditi la lirü müii-pehcho. Naftalirünü hütsüla Kananrü yola licho, ta arüh tsü ayurü kang yohpücho.

³⁴Amor-rünü Dan hung azonglang iikehchüpehcho ko angah lih lang müjürosohcho.

³⁵Amor-rü tsü mütozah Aijalon, Shalbim ko Heres zong la licho, ta Manaserü ko Efraimrünü arüh yuzeng pohki yohpücho ko arüh yurü thsa lisohcho.

³⁶Edomrü luhrü tsü kihku lahpi Sela lanü Akrabbim chii wü licho.