Read Sangtam Naga YUKHARÜ 11 Bible Online

YUKHARÜ 11 - Sangtam Naga bible

YUKHARÜ 11

¹Gilead lanü rothsarü yola akurahrü Jeftha tsü nahtrahnaxenglarü khüdu tsurü licho.

²Au Gilead tsü anitpü chahnü atsurü apasü licho ko arüh lümjingde, Jeftha tsü kuh lanü iipehcho. Arühnü abi te yocho, “Ihrü au chahnü nüh tu thsiking müngunung; nüh khingkurü apa chahnü lile.”

³Hütsüta Jeftha tsü arüh tenü tsiwü Tob lih la licho. Hütsüla amükhyu mülung khüdu abinü nübülung abi yola lisohcho.

⁴Tunyah mülipü Amonrünü Israelrü nyüm khata wücho.

⁵Hi tikehde, Gilead la langnürütinü Tob lih lang Jeftha nüli ronung wücho.

⁶Arühnü yocho, “Amonrü te khatanung nüh rung ko ihrü lang nüng.”

⁷Ta Jefthanü lalingcho, “Nührünü Ih hidoi thrünyi Iu kuh lanü Ih iipehcho. Tuepü ade nührü chongchade I yanglang roro?”

⁸Arühnü Jeftha te yocho, “Ade ihrü nü yanglang thali rore, tunüo Amonrü te khatanung nühnü no wüsohnyüre ko Gileadrü atümung nüsohnyüre.”

⁹Jefthanü arüh te yocho, “Amonrü te khatanung nührünü kuh lang Ih thali nowükhang ko ABÜDONGBAnü Ihsa khyang kohsohkhang, Ih nührü Yangthsaba kangnung.”

¹⁰Arühnü lalingcho, “Ihrünü nyengchore. ABÜDONGBA Ihsa yuzi lile.”

¹¹Achotsü Jefthanü Gileadrü langnürü yola wücho ko müyurünü abi arüh Yangthsaba ko langnürü kangsohcho. Jefthanü Mizpa la abi alümcho apüm ABÜDONGBA bete yocho.

¹²Hütsüpü Jefthanü Amon Yangthsaba yanglang hita yonung yusi hirü müthehcho, “Ihrü te tu nengdang khataro? Tuepü nühnü ihrü lih mahro?”

¹³Amon Yangthsabanü Jeftha yusi hirü te yocho, “Israelrü Ijip lanü chüropü, arühnü I lih Arnon Yongkhi lanü Jabbok Yongkhi ko Jordan Yongkhi chii khyüko. Ade hütsü nühnü yangtsa lanü thali jüng.”

¹⁴Jefthanü Yangthsaba Amon yanglang alalingba hi hipü müthehcho:

¹⁵“Israelrünü Moabrü mahkhang Amonrü lih khyüjükoba tsü arahkheh.

¹⁶Ta hiroh-i tikehcho: Israelrü Ijip pehjo tside, arühnü Amoh kihlang akungaselih khu ro Kadesh chihcho.

¹⁷Hütsüpü arühnü Edom Yangthsaba yang abi lih khu tsinung mülajüngpü tsingdhengnung yuhirü müthehcho. Ta Edom Yangthsabanü mümülacho. Arühnü Moab Yangthsaba tesü tsingdhengcho, ta abinüsü abi lih khu tsinung mümülacho. Achotsü Israelrünü Kadesh la licho.

¹⁸Hütsüpü arühnü akungaselih khu Edom ko Moabrü Arnon Yongkhi khüulang, Moab nyüchüro lahpi ro chihcho. Arühnü hütsüla müdongcho, ta Arnon mükhucho tunüo hütsü Moabrü luhrü thsacho.

¹⁹Hütsüpü arühnü Heshbon la Amor-rü Yangthsaba Sihon te arühbürü lih lang wünung abi lih khu tsisohngpü tsingdhengnung yuhirü müthehcho.

²⁰Ta Sihon-nü mümülacho. Abinü abi rothsarü apüm nüpülung Jahaz la müdongnü Israelrü mahcho.

²¹Ta Israel Tsingrang ABÜDONGBAnü Sihon ko abi rothsarü michah Israelrü khyang akoh jücho. Hütsüta Israelrünü hütsüla liba Amor-rü alih apüm khyücho.

²²Arühnü Amor-rü lih apüm kihjinglang Arnon lanü kihku lahpi Jabbok chii ko nyüchüro akungaselih lanü nyüzüdu lahpi Jordan chii khyücho.

²³Hütsüta, ABÜDONGBA, Israel Tsingrangnü Abi müyurü Israelrü nengdang Amor-rü iipehjücho.

²⁴Nühnü hütsü thali khyünung müküprü mah-o? Nü tsingrang Khemoshnü nü khyang jüchoti khyünung kohle. Ta ihrünü ihrü Tsingrang, ABÜDONGBAnü ihrü khyang tuturü jücho hütsü apüm khyünung.

²⁵Nühnü nüh tsü Moab Yangthsaba, Zippor tsurü Balak tenü atsauepü lümrü mah-o? Abinü Israelrü khyangchicho mah-o? Abinü ihrü nyüm khata dhengcho do?

²⁶Israelrünü Heshbon ko Aroer, ko hütsü mükang yangditi ko Arnon yongkhi bekhüm la liba yangditi kang thsih asang khyo rore. Hütsü bekhyah tuepü nührünü hütsüri thali mükhyücho?

²⁷Mah, Ihnü nü te tu müthsameh. I te chitaba tsünü nüh thsamehre. ABÜDONGBA yuzi lile. Israelrü ko Amonrü kahla chünye Abinü yukhanung.”

²⁸Ta Amon Yangthsabanü Jeftha yu tsü münyicho.

²⁹Hütsüde ABÜDONGBA nbü Jeftha chah rocho. Abinü Gilead ko Manase khu wücho ko Gilead la Mizpa lang thalicho ko Amon lang wücho.

³⁰Jefthanü ABÜDONGBA te nyengchocho: “Nühnü I khyang Amonrü kohsohkhang,

³¹Ih akoh ngupü rode, Ih mütohnung I kukhi lanü sü akhu chüronang, Ihnü abi Nü khyang trüp mübünung. Ihnü abi Nü khyang kangmübü jünung.”

³²Hütsüpü Jefthanü Amonrü te khatanung yongkhi tsü keh wücho ko ABÜDONGBAnü abi khyang akoh jücho.

³³Abinü Aroer lanü Minnit mükangnü Abel Keramim chii, apümnü yangdi mükyü khyücho. Hütsü nyümong khütang kingthrümcho ko Israelrünü Amonrü kohcho.

³⁴Khode Jeftha tsü Mizpa lanü kuh lang thali rocho, abi mütohnung atsulatpü tambourin bipü khi thsa tsohchi chürocho. Abi tsurü hütsü du thsacho.

³⁵Abinü abükyü ngude, awahchonü ajengki rehnah yocho, “O I tsulatpü! Nühnü I lasih thsangnyangjüle. Ih thsasohba hi tuepü nüh thsacho? Ihnü ABÜDONGBA te yuchümko Ihnü hütsü thsangnyangnung mükoh!”

³⁶Abükyünü abi te yocho, “Nühnü ABÜDONGBA te yuchümcho thsakhang, nühnü tu nguchinung yochonang I chah nguching, tunüo ABÜDONGBAnü nü rorüh Amonrü michah nü khyang akoh jüko.”

³⁷Ta abükyünü au te tsingdhengcho, “I nengdang lang khüdu hi nguchijüng. I shangrüti yola azonglang tsü wünü Ih lazadenü sünunge ang pü longri rachinung nengdang, I khyang choo anyüh mülajüng”

³⁸Abinü abükyü tsü choo anyüh nengdang mülajo wüsohcho. Abükyü ashangrüti yola azong la tsü wünü abükyü kuh mükangpü ko azarü mülipü sopehnung shulüm longricho.

³⁹Choo anyüh khanglang abükyünü au yang thali rocho. Abinü ABÜDONGBA te nyengchocho kyo nguchicho ko hütsüta abükyü laza denü sücho.

⁴⁰Hiba hi Israel la kang mükhu lazarütinü nyümong müyü nengdang wünü Gileadrü Jeftha tsulatpü nengdang meshüba liyah adikeh licho.