Read Sangtam Naga YUKHARÜ 15 Bible Online

YUKHARÜ 15 - Sangtam Naga bible

YUKHARÜ 15

¹Azachah lipü Samson-nü anitpü xodhengnung litoh xa bekhyah mizaza khüdu nüpü wücho. Abinü aku te yocho, “I nitpü yüpji lang züdunyüre.” Ta akunü abi müzüdusohcho.

²Abinü Samson te yocho, “Nühnü yuje abükyü thrünyirü mütang Ihnü abükyü nü müyangba khyang jüko. Ta ani tsü atsah atsaue. Abükyü tsü khyüng.”

³Samson-nü yocho, “Ade Ihnü Filistinrü chah tu nguchirünang hütsü I bha müthsanung!”

⁴Achotsü abinü wünü shirung thsih asang rang rocho. Ko anyüh-nyüh arüh müying rahrütajücho ko amüying la tsü dsibhong rahkehjücho.

⁵Hütsüpü dsibhong chah tsü michang tahkehjüpü Filistinrü luh lang müthehchücho. Hütsüta xabülung yohpüba fürü du tsü mah ta maxaba madong ko olive luh mii zeh apüm trüp-pehsohcho.

⁶Filistinrünü hütsü sünüopü tsingdhengde, hütsü Samson-nüe, tunüo Timna la nyüh khüdu, Samson akunü anitpü amüyangba khyang jopehcho khu Samson-nü hütsüta nguchichoepü müdhecho. Achotsü Filistinrünü wü khingkutpü tahseh süsohcho ko aurü kuh trüp-pehjücho.

⁷Samson-nü arüh te yocho, “Nührünü nguchiko! Ihnü rühmüyangpü müpehjünung.”

⁸Achotsü abinü arüh becho ko adrong müpsehcho. Hütsüpü abinü wünü Etam la lungkoh khüdu la licho.

⁹Filistinrünü ro Juda la müdongcho ko Lehi yangdi mahcho.

¹⁰Judarünü arüh te tsingdhengcho, “Tuepü nührünü ihrü mahro?” Arühnü lalingcho, “Ihrünü Samson rang wünü abinü ihrü te nguchicho kyo abi chah bichinung rocho.”

¹¹Achotsü Judarü nyüh hajar asang Etam la lungkoh tsü yang wünü Samson te yocho, “Filistinrünü Ihsa michah yangthsarepü nühnü mümüdhe ang? Nühnü hi tu nguchicho?” Abinü lalingcho, “Arühnü I chah nguchicho akyokyo du Ihnü arüh chah nguchicho.”

¹²Arühnü yocho, “Nüh rangnü arüh khehla jünung ihrü hila rocho” Samson-nü yocho, “Nührübürü nülü Ih mümüpsehnungepü I khyang yuzi jüng.”

¹³Arühnü yocho, “He! Ihrünü nüh rahpü arüh khyang du jünung. Ihrü nülü nüh mümüpsehnung.” Achotsü arühnü rangshü asi anyünü abi rahcho ko lungkoh la tsünü thali norocho.

¹⁴Khode abi Lehi chii norocho, Filistinrünü züdenü abi yang shang rocho. Dhrongyengnü ABÜDONGBAnü abi rezeh kangsohcho ko abi rahba rangshü tsü atahcho she kyo tohnahcho.

¹⁵Hütsüde abinü gadu kümjing rüh khüdu jo ngucho. Abinü mükhuyoh hütsü thro ropü hütsünü nyüh hajar khüdu müpsehcho.

¹⁶Hütsünü Samson-nü hita thsacho, “Gadu kümjing rüh khüdunü nyüh hajar müpsehko; Gadu kümjing rüh khüdunü müjung khüti bhümkehsohko.”

¹⁷Hütsüpü abinü gadu kümjing rüh tsü tsayohchüpehcho. Hi tikehba müdüm tsü Ramat Lehi pü dsicho.

¹⁸Hütsüde Samson dee xocho, achotsü abinü ABÜDONGBA te yocho, “Nühnü akoh amülah hi I khyang jüko; ko ade Ih xoseh hiri müyudsirü khyang kohsohnung mah-o?”

¹⁹Hütsüde Lehi la Tsingrangbanü alih kasohcho ko hütsü lanü kih chürosohcho. Ko Samson-nü hütsü yongpü dee tsa kangpehcho. Hütsünü hütsü kihna te Hakkore pü dsicho; hütsü ade yingcheh Lehi la lile.

²⁰Filistinrünü yangthsathsade, Samson-nü Israel kang mükyü nücho.