Read Sangtam Naga YUKHARÜ 16 Bible Online

YUKHARÜ 16 - Sangtam Naga bible

YUKHARÜ 16

¹Nyümong khüdu Samson-nü Filistinrü yangdi khüdu Gaza lang wücho ko hütsüla nahtrahnaxenglarü khüdu shiro abükyü te mükhongcho.

²Gazarünü Samson hütsüla lilepü müdhe arühnü hütsü mükangti müyüp yangdi tbükhüm la jümcho. Arühnü müyüp sahmüthsa arüh lüm la lümcho, “Ihsanü tsingse yingnung ko abi müpsehnung.”

³Ta Samson-nü yüprüptülung du chii hütsüla yüpcho. Ko yürüptülung la tsü abinü shemüsu wü yangdi tbükhüm tsü trahtri, kukhang ko azihtising zehnü chungchehcho. Ko abinü hütsüri apakyarü chah dhikeh dhipü hiwü Hebron nguhba khang chah pehjücho.

⁴Hütsüpü, Samson-nü Sorek ngah la liba khingkurü khüdu anengnü Delila müicho.

⁵Filistinrü yangthsarü münganü wü abükyü te yocho, “Tunü Samson hidoi rezehsohro ko khütapü ihrünü abi kohnü, rahpü khingchinung, hütsü abi kihcho nü te yosohng. Ihrü müipinü nü khyang taripi thsih dhüre-kheh jünung.”

⁶Achotsü Delilanü Samson te yocho. “Yanglilüm tunü nüh hidoi rezehsohro I te young. Khürünü nüh rah amühachi mütsasohnyükhang, tu khüta nguchinung?”

⁷Samson-nü lalingcho, “Kekhüluyo asi dhünyehnü Ih rahkhang, Ih aparü kyo re müzeh kangnung.”

⁸Achotsü Filistin yangthsarütinü kekhülu asi dhünyeh Delila khyang hirojücho ko hütsünü abükyünü Samson rahcho.

⁹Abükyü chongsah apa khüdu la nyitsarüti jümyasohcho ko abükyünü, “Samson! Filistinrü tsehle” pü züdecho. Ta abinü kekhüluyo tsü michangnü she chah thahpüde shenahcho kyo tohnahcho. Hütsünü arühnü abi rezehba arah tsü mümüdhecho.

¹⁰Delilanü Samson te yocho, “Dheng, nühnü Ih kihyocho Ih te yuje tsü müyo. Yanglilüm nüh khüta rahnung I te young.”

¹¹Abinü lalingcho, “Arühnü khodesü mübichicho rangshü asinü Ih rahkhang, Ih aparü kyo remüzeh kangnung.”

¹²Achotsü Delilanü rangshü asi khürü hiro abi rahcho. Hütsüpü abükyünü züdecho, “Samson! Filistinrü tsehle!” Nyitsarüti tsülü chongsah akhüu la jümpümcho. Ta abinü akheh la rangshü tsü she kyo tohnahpehcho.

¹³Delilanü Samson te yocho, “Adesü nühnü Ih kihyocho I te arahkheh choko. Nüh khüta rahnung I te young.” Abinü lalingcho, “Nühnü I kuva müthsüh dhünyeh hi shü la kyahrütapü shükyahji chah khahkhah rahkehkhang, Ih aparü kyo re müzehpehnung.”

¹⁴Achotsü Delilanü abi müsho yüpsehsohcho, ko abi kuva mülung müthsüh dhünyeh tsü shü la kyahrütacho, ko shü kyahji chah khahkhah rahkehcho ko züdecho, “Samson, Filistinrü tsehle!” Ta abinü shemüsucho ko shü la tsünü akuva tsü tphachehcho.

¹⁵Hütsünü abükyünü abi te yocho, “Nü lasihlü I te mülipü, tuepü Ih müirepü nühnü yoro? Nühnü Ih asangpi rahmütsako ko ade yingcheh nühnü I te yuje tsü müyore.”

¹⁶Abükyünü nyümong müthe abi te tsingcho.

¹⁷Hütsü nengdang tsingdhengchonü abi müthohcho, hütsünü achangka la yuje tsü abükyü te yocho. Abinü yocho, “I kuva hi khodesü müheh. Ih surodenü Tsingrangba khyang Ih Nazirit khüdu kang müsacheh jopehko. I kuva hi khode hehnang, I tase changpehnung ko aparü kyo kangnung.”

¹⁸Khode Delilanü abükyü te yuje tsü yokopü müdhecho, abükyünü Filistin yangthsarüti yanglang yuva mütheh yocho, “Khüdupi thali rung. Abinü I te yuje tsü yoko.” Achotsü arühnü thsi tsü bipü rocho.

¹⁹Delilanü aphüm chah Samson müsho yüpsehsohcho ko nyüh khüdu dsiro akuva müthsüh dhünyeh tsü müjüp-pehsohcho. Hütsükolü abükyünü abi khingchinung dikehcho, tunüo abi re müzehpehcho.

²⁰Hütsüpü abükyünü züdecho, “Samson! Filistinrü tsehle” Abinü jesucho ko lümcho, “Lede roh-i Ihnü lehcheh tsinung.” ABÜDONGBAnü abi pehjükopü abinü mümüdhecho.

²¹Hütsüta Filistinrünü abi rangcho ko anah hehcheh pehjücho. Arühnü abi Gaza lang nowücho, imüyeng ixilihnü abi xohcho ko akhangti kuhla abi khyang fürü nyehsohcho.

²²Ta akuva thali chinung dikehcho.

²³Filistinrü yangthsarütinü arüh tsingrang Dagon khyang kangmübü arangcheh jünung ko thsüti khyünung shimükhongcho. Arühnü khi hita thsacho, “Ihsa tsingrangnü Ihsa rorüh Samson michah Ihsa khyang akoh jüko!”

²⁴Arüh künyangtade, arühnü yocho, “Samson dsieng ko Ihsa nengdang lalolashisohng!” Khode arühnü Samson akhangti kuhla tsünü norocho, arüh nengdang abi khyang lalolashisohcho ko dongditi kahla yasohcho. Khode nyitsarütinü abi ngucho, arühnü arüh tsingrang nengse yocho: “Ihsa lih thsangnyangjo Ihsa khütang süsohba Ihsa rorüh michah Ihsa tsingrangnü Ihsa khyang akoh jüko!”

²⁶Samson-nü abi shüriba dhrezaba te yocho, “Kuh thüyehba dongdi chah tsü I khyang thahpüsohng. Ih hütsüri chah ngakehnyüre.”

²⁷Kuh la tsü khingkurü adhrerünü jeng licho. Filistinrü yangthsarü münga ko Samson münyodhengyarü nyitsarü hajar asango hütsüla licho.

²⁸Hütsüde Samson-nü dangkhidangnangcho, “Akohba ABÜDONGBA, yanglilüm Ih lümchehng; Tsingrangba, Filistinrünü I nah hehcheh pehjücho ngang rühyangnung, yanglilüm, khüdupi I tase thali jüng.”

²⁹Hütsüpü Samson-nü kuh longla dongdi anyüh chah tsü akheh khüu-khüulang romehpü abinü düm-mütheh züdecho,

³⁰“Ih Filistinrü yola süsohng!” Abinü ataseh apümnü dümcho ko kuh tsü yangthsarü münga ko aparü atümung chah khülucho. Hütsüta Samson-nü abi akang lide müpsehcho tenü asüde adrongu müpsehcho.

³¹Anirü ko arüh tsutpurü abi me khyünung jürocho. Arühnü abi me hiwü Zora ko Eshtaol kahla au Manoa kong la dhrürangcho. Abi kang mükyü Israel langnürü thsacho.