Read Sangtam Naga YUKHARÜ 17 Bible Online

YUKHARÜ 17 - Sangtam Naga bible

YUKHARÜ 17

¹Efraim azong lih la nyüh khüdu anengnü Mika licho.

²Abinü atpa te yocho, “khürünü nü yo taripi thsih dhüre-kheh fühdesü, nühnü aführü tsü chokehcholacho. Ihnü yuchi nühnü choko. Thsi tsü Ihnü yohpüle. Hütsü Ihnü khyücho.” Atpanü yocho, “Itso, ABÜDONGBAnü nüh müwajüng.”

³Abinü thsi tsü Atpa khyang thali jüde abükyünü yocho, “I tsurü chah chokehchola tsü müküdusohnung I bükyühnü taripi tsü ABÜDONGBA khyang müsacheh jüre. Hütsünü kyothri khüdu taripinü münohti külüpnung. Hütsüeko ade Ihnü taripi tsü nü khyang thali jüre.”

⁴Hütsüta abinü atpa khyang thsi tsü thali jücho. Abükyü taripi thsih anyüh khyo ikengrü khyang jücho ko abinü sing lanü kyühcheh kyothri khüdu külüpcho ko hütsü taripinü münohticho. Ko hütsü Mika kuhla yohpücho.

⁵Hiba nyitsarü Mika apu mübüji khüdu licho. Abinü kyothri khürü ko bebürü jengki külüpcho ko atsurü yola nyüh khüdu bebürü throchehcho.

⁶Hütsü shikhe Israel la yangthsarü mülicho ko nyitsarü müipi palu tsacho nguchi licho.

⁷Hütsü shikhe Juda la Bethlehem yangdi la Levirü dhrezarü khüdu licho.

⁸Abinü Bethlehem pehjüpü ali chah khüdu yangchicho. Abi shitseh rachide, abinü azong lih Efraim la Mika kuhla rocho.

⁹Mikanü abi te tsingdhengcho “Nüh khüdenü rocho?” Abinü lalingcho, “Ih Juda la Bethlehem lanü Levirü khüdu lile. Ih khüdenang alichah khüdu yangchire.”

¹⁰Mikanü yocho, “I yola lieng. I trorü ko bebürü thsaang ko kang la Ihnü nü khyang taripi dhüre, jengki khürü ko tsuyongnung jünung.”

¹¹Dhrezarü Leviba tsünü Mika yola li abi tsurü kang linung nyengchocho.

¹²Mikanü abi tsü abi bebürü thsanung throchehcho ko abi Mika kuhla licho.

¹³Mikanü yocho, “Adelü Levirü I bebürü lirü tsü, ABÜDONGBAnü Ih müwajünung.”