Read Sangtam Naga YUKHARÜ 18 Bible Online

YUKHARÜ 18 - Sangtam Naga bible

YUKHARÜ 18

¹Hütsü shikhe Israel la yangthsarü mülicho. Hütsüri bekhyah Dan hungnü arüh linung alih yangchi yacho, tunüo arühnü Israel hung lanü arüh nohlüm alih münguecho.

²Achotsü Danrünü arüh hung lanü adekheng nyüh münga throchehcho ko Zora ko Eshtaol yangditi lanü alih tsü dhengmükangnung thülapü müthehcho. Khode arühnü Efraim azong lih chihcho, arühnü Mika kuhla müdongcho.

³Arüh hütsüla pümde, hütsüla Levirü dhrezaba liba tsü xümchehcho, achotsü arühnü abi yang wü tsingdhengcho, “Nüh hila tu nguchiro? Sünü nüh norocho?”

⁴Abinü lalingcho, “Mikanü Ih abi bebürü thsanung chotapü angang jo yohpüre.”

⁵Arühnü abi te yocho, “Ihrü wüba hi akoh ngu a müngunang yanglilüm Tsingrangba te tsingdheng jüng.”

⁶Bebüba tsünü lalingcho, “Nührü tu tülümxü. Hiba shitseh la ABÜDONGBAnü nührü xükümle.”

⁷Achotsü arüh münga tsü hütsü lanü shemüsu Laish yangdi lang wücho. Hütsüla lirü tsü Sidonrü kyo dee tbachi li arühnü ngucho. Arüh tsü atbachi, alonglüm ko sütesü yuji mülipü arüh thsütah apüm thangchi licho. Arüh tsü Sidonrü tenü ashu la za ko aparü sütesü mümüdhetapü licho.

⁸Khode arüh münga tsü Zora ko Eshtaol lang thalicho arüh nyitsarütinü arüh te tu khüta nguchonang tsingdhengcho.

⁹Arühnü yocho, “Rung,” Ihsanü Laish mahnung, ihrünü alih tsü nguko ko hütsü dee tsale. Hila hita tüli; dhsüthsang! hütsüla züdung ko hütsü khyüng.

¹⁰Nührünü hütsü chihde, arühnü tu longmülang mülicho nührünü rangchehnung. Hütsü limih amülah lile; hütsüla nyitsarünü thsütahcho lüpcho zehla ko Tsingrangbanü hütsü nührü khyang jüko.

¹¹Achotsü Danrü Zora ko Eshtaol lanü khatanung nyüh thsih dhüroh shemüsucho.

¹²Arühnü tuwücho ko Juda la Kiriat Jearim nyüzüdulang thring müdongcho. Hütsünü hiba müdüm te chünye yingcheh Danrü müdongchah pü dsire.

¹³Arühnü hütsü lanü shemüsucho ko ro azong lih Efraim la Mika kuh chihcho.

¹⁴Hütsüde Laish dhengmükangnü würü arüh münga tsünü arüh müyangrü te yocho, “Hila kuh khüdu la kyothri khüdu taripinü münohtipü licho nührünü mümüdheo? Kyothri apasü ko bebürü jengkisü lile. Ihsanü tu nguchicho tsanungepü nührünü lümro?”

¹⁵Achotsü arühnü Levirü dhrezaba liba Mika kuh lang tsü wünü Leviba tsü khüta liyarünang tsingdhengcho.

¹⁶Hütsüde Danrü rothsarü thsih dhüroh tsü trahtri la yacho.

¹⁷Arüh münga tsünü müchongkhüti kuhla tsü züducho, taripinü münohtipü liba kyothri, apa kyothriti ko bebürü jengki tsü khyücho. (bebüba tsü trahtri la rothsarütinü rangyeh yade.)

¹⁸Nyitsarüti tsünü Mika kuhla züdu amüsa kohro tsü khyüde, bebüba tsünü arüh te tsingdhengcho, “Nührü tu nguchiro?”

¹⁹Arühnü yocho, “Sah tüthsa. Yu khüdu mii tüchüro. Ihrü yola rung ko ihrü trorü ko ihrü bebürü thsaang. Nyüh khüdu kukhi bebürü thsanung tenü Israel hung apüm bebürü müthsanyürü do?”

²⁰Bebüba tsü dee künyangsohcho, hütsünü abinü Amüsa kohro tsü bipü arüh yola wücho.

²¹Arühnü ximüla arüh tsurüti, kanglungrü ko arüh kohro arüh belang thsasohpü shemüsu tsicho.

²²Arüh kuhla tsünü rüm-o tsiyade, Mikanü khatanung akurümrüti dsichehcho.

²³Arühnü Danrü tsü iiphücho ko arüh chah züdekehjücho. Danrü tsünü ximüla Mika te tsingdhengcho, “Tukülüpcho Sühdi hi tu nengdango?”

²⁴Mikanü lalingcho, “Tukülüpchoba adüzü tu o? Nührünü I bebürü ko Ihnü külüpcho tsingrangti hitsiko! Ih tu nying liro?”

²⁵Danrü tsünü yocho, “Nyitsarü hiri zichüronü müsünyükhang tu tücho. Mahkhang nüh ko nü kukhi apüm changnung.”

²⁶Hütsütapü arühnü tsicho. Mikanü abinü arüh mükohnungepü müdhecho, hütsünü abinü kuh lang thalicho.

²⁷Dan lanü rorütinü bebürü ko Mikanü külüpcho kohroti tsü hipü, wünü atbachi ko alonglüm nyitsarüti Bethrehob münyeh angah la liba Laish yangdi tsü mahcho.

²⁸Arühnü hütsüla lirüti kyüsehcho ko yangdi tsü trüp-pehjücho. Arüh khümchorü süsü mülicho, tunüo Laish tsü Sidon lanü ashu ko arühnü aparü sütesü müdheta mülicho. Dan lanü rorütinü yangdi tsü külüpchicho ko arüh hütsüla lipehcho.

²⁹Arühnü Laish neng tsü arüh jümürü Jakob tsurü Dan nengla Dan dsicho.

³⁰Danrünü kyothri tsü müdongcho ko mübücho ko Gershom tsurü ko Mosa shümtsurü Jonathan tsü Danrü hung nengdang bebürü kangsohcho ko müyurüti yangtsilang münotsi yingcheh arüh shümtsurütinü bebü nguchi nguchicho.

³¹Mika kyothri tsü hütsüla lede yohpücho, ta Tsingrangba mübüba Shükuh tsü Shilo la licho.