Read Sangtam Naga YUKHARÜ 2 Bible Online

YUKHARÜ 2 - Sangtam Naga bible

YUKHARÜ 2

¹ABÜDONGBA ninglang riwürü tsünü Gilgal lanü Bokim chii wücho ko Israelrü te yocho, “Ihnü Ijip lanü nührü nücheh nührü jümürü te nyengchocho lih chii noroko. Ihnü yocho, ‘Azengtacho Ihnü khodesü müthsangnyangnung.

²Nührünü hiba lih la lirü te tu azengtaba tükülüp. Nührünü arüh bholu thsangnyangjüng.’ Ta Ihnü yocho nührünü münguchipü lahshü nguchicho.

³Hütsüeko ade nührü wüde, hiri nyitsarüti mü-iipehjünung. Arüh tsü nührü rorüh kangnung ko arüh tsingrangti tsü nührü nengdang zeng kangnung.”

⁴Ninglang Riwürü tsünü hi yode, Israelrü atümung tracho,

⁵hütsünü hiba müdüm te Bokim pü dsicho. Hütsüla arühnü ABÜDONGBA khyang kangmübü mübücho.

⁶Joshuanü Israelrü tsü palu langla shishosohcho ko arüh palu nohlüm lih khyünung wücho.

⁷Joshua akang lide, Israelrünü ABÜDONGBA dikehcho ko abi süpü mii langnürü sürünü ABÜDONGBAnü Israel nengdang thsayahiya nguchicho ngucho, arüh akang lidelü arühnü mütozah abi dikehcho.

⁸Nun tsurü ABÜDONGBA dikehrü Joshua tsü kang thsihpü-dhüre thsade sücho.

⁹Abi me tsü azong lih Efraim kihku lahpi Gaash zong la, apu lih Timnath Sera la dhrürangcho.

¹⁰Hütsüba shang la lirü apüm sücho ko shang asi tsünü ABÜDONGBA ko abinü Israelrü nengdang tu nguchicho, hütsü nbüchücho.

¹¹Hütsüde Israelrünü ABÜDONGBA nyüm amünyi shitpahcho ko Baal tsingrang dikehcho.

¹²Arühnü ABÜDONGBA, arüh jümürü Tsingrang, arüh Ijip lanü nüchehbong Tsingrang mümübücho ko apa tsingrang, arüh mükangmüshü lirü tsingrang, mübünung dikehcho. Arühnü hütsüri mübo ABÜDONGBA rihlong chürosohcho.

¹³Arühnü ABÜDONGBA pehpü Baal tsingrang ko Ashtarot tsingrang mübücho.

¹⁴Hütsünü Israelrü te ABÜDONGBA rihlong chüro arüh rorüh khyang arüh mahso ko kengchosohcho. Abinü arüh mükang liba arorühti khyang arüh kohsohcho ko Israelrünü arühbürü tsungtinung mii adelü mükohcho.

¹⁵Arühnü khata wü müipi, ABÜDONGBAnü yocho kyo, abi arüh nyüm yacho. Arüh dee chongchacho.

¹⁶Hütsüde ABÜDONGBAnü Israelrü khyang langnürü jücho ko arühnü arorüh kheh lanü arüh khümchocho.

¹⁷Ta Israelrünü arüh langnürü yu münyicho. Israelrünü ABÜDONGBA yuzeng nyicho, ta hiba shang asi nülü hütsü münguchicho.

¹⁸Khodederü Israelrü khyang ABÜDONGBAnü langnürü khüdu jonang, abinü abi dro abi akang lidelü arorüh kheh lanü müyurü khümcho licho. ABÜDONGBAnü dee yanglilüm ngusohcho, tunüo arühnü chongcha ko sehchiba surola rühchicho.

¹⁹Ta khode langnürü tsü sonang, müyurünü arüh ahi langla ximüla bekhulang shang tenü amütsaba akang licho. Arühnü aparü tsingrang dikeh mübücho ko arüh amünyi lang müpehjünyücho.

²⁰Hütsüde ABÜDONGBAnü rihlong chüro Israelrü te yocho, “Ihnü arüh jümürü khyang jücho azengtacho hiba yuchonü thsangnyangko. Tunüo arühnü I yocho münyi,

²¹Joshua süde hütsüla liyarü yucho süsü Ihnü müii-pehnung.

²²Ihnü arüh tsü Israelrünü arüh jümürünü kyo I langla tseh a mütsehnang rangchehnung shulüm bichinung.”

²³Hütsünü ABÜDONGBAnü hütsüri yuchoti hütsü lih la lisohcho; abinü arüh michah Joshua khyangsü akoh müngusoh, mahkhang Joshua süpü khanglangsü arüh müii-pehcho.