Read Sangtam Naga YUKHARÜ 3 Bible Online

YUKHARÜ 3 - Sangtam Naga bible

YUKHARÜ 3

¹Hütsünü, Kanan la khata mümüdheba Israelrü thsatsünung hütsüla ABÜDONGBAnü yucho khürü pehjücho.

²Abinü Israelrü shang müipi khyang khata lümlong müdhesohnung, alathsa khata la khodesü müwodhengrü nengdang nguchicho.

³Hütsüla nying pehjürü tsü Filistinrü yangdi münga, Kananrü, Sidonrü, ko Lebanon zong la Baal Hermon zong lanü Hamath chii lirü Hivrü apüm licho.

⁴ABÜDONGBAnü Mosa khu Israelrü jümürü khyang jüba yuzeng tsü arühnü bichinung mübichinung hütsü müdhenung arüh tsü Israelrü nengdang athsatsü linung.

⁵Hütsüta Israelrü tsü Kananrü, Hit-rü, Amor-rü, Perizrü, Hivrü ko Jebusrü yola licho.

⁶Arühnü arüh te kuthri-yangthritacho ko arüh tsingrangti mübücho.

⁷Israelrünü ABÜDONGBA, arüh Tsingrang nbüchücho; arühnü Abi nyüm amünyi shitpahcho ko Baal ko Ashera kyothri mübücho.

⁸Hütsünü Israelrü te ABÜDONGBA zichürocho ko Mesopotamia Yangthsaba Kushan Rishathaim khyang arüh kohsohcho ko abinü arüh michah kang keh yangthsa thsasohcho.

⁹Hütsüde, Israelrünü ABÜDONGBA te kihchicho ko Abinü nyüh khüdu mütheh arüh khümchosohcho. Hütsü Kaleb ani Kenaz tsurü Othniel licho.

¹⁰Abi chah ABÜDONGBA anbü rocho ko Israelrü langnürü kangcho. Othnielnü khata wücho ko ABÜDONGBAnü abi khyang Mesopotamia Yangthsaba michah akoh jücho.

¹¹Yanglih la tsü kang yüre yangtsa licho, hütsüpü Othniel sücho.

¹²Israelrünü anyüpiusü ABÜDONGBA nyüm amünyi shitpahcho. Hütsü khu ABÜDONGBAnü Israel tenü Moabrü Yangthsaba Eglon re azeh-u kangsohcho.

¹³Eglon-nü Amonrü ko Amalekrü yola zehpü Israel ko sedong yangdi Jeriko mahcho.

¹⁴Israelrü tsü Eglon pohki kang dhüre-keh licho.

¹⁵Hütsüde Israelrünü ABÜDONGBA te kihchicho ko abinü arüh tronung nyüh khüdu müthehcho. Hütsü Benjamin hung lanü Gera tsurü fülitsung Ehud licho. Achotsü Israelrünü Eglon Yangthsaba yang jiyü hipü Ehud müthehcho.

¹⁶Ehudnü anyülangpü noh ashenglang kyaa khüdu pü achangsho oshi khüdu külüpcho. Abinü hütsü tsalang thring ashü pohki rahkeh bicho.

¹⁷Hütsüpü abinü jiyü tsü aküwüm Eglon yanglang hiwücho.

¹⁸Khode Ehudnü jiyü tsü jücho, abinü hütsüri hirorü te tsü kuh lang thali tsinung yocho.

¹⁹Ta apulü Gilgal amünyeh lung kyothri liba la tsünü thali Eglon yanglang wü yocho, “O Yangthsaba, nü nengdang arangyu khüdu lile”. Achotsü Yangthsabanü dikehrüti te yocho, “Ihjü müleng pehjüng!” Ko arühnü tsicho.

²⁰Hütsüpü, Yangthsaba tsü abi müleng amichahba chongsah la pümde Ehudnü abi yang wü yocho, “Nü nengdang Tsingrangba chahnü yusi khüdu lile.” Yangthsaba tsü shemüsucho.

²¹Ehudnü akheh fülilangnü abi tsalang liba noh tsü tohcheh Yangthsaba mi la thrarangjücho.

²²Noh ayungshünü abhe zeh züdupehcho ko asunü mütsüptipehcho. Ehudnü Yangthsaba mi lanü nohsheng tsü mütphahchehcho ko hütsü akhanglang khakhucho.

²³Hütsüpü Ehudnü ayonglangnü kukhang khangti chüro tsipehcho.

²⁴Kulirüti rocho ko kukhang tsü khangti ngu arühnü Yangthsaba tsü ayonglang kyahshanglepü du lümcho.

²⁵Arühnü anyahli yingcho, ta kukhang tsü mükhangthruchonü arühnü azihsing khyo münyahthrucho. Ko hütsüla arüh abüdongba tsü singtang chah so jocho.

²⁶Arühnü yingyade Ehudlü tsipehpü thsacho. Abi ahamchehcho lung tsü khu Seira lang tsipehcho.

²⁷Khode Efraim azong lih chihcho, abinü khata wünung rühti meh Israelrü dsicho; ko abinü arüh azong lang tsünü nücho wücho.

²⁸Abinü yocho, “I khanglang rung! ABÜDONGBAnü Moabrü nührü rorüh michah nührü khyang akoh jüko.” Achotsü arühnü Ehud iijowücho ko Moabrünü Jordan kehnung liba müdüm tsü mahchehcho; arühnü nyüh khüdusü mükhusohcho.

²⁹Hütsü nyümong arühnü Moabrü akurahrü nyüh hajar dhüre kyüsehcho; arüh süsü mütsichehsoh.

³⁰Hütsü nyümong Israelrünü Moab mahchehcho ko yanglih la tsü kang qure atbachi licho.

³¹Hütsü tung yukharü tsü Anath tsurü Shamgar licho. Abinüsü misü kümjingnü Filistiarü nyüh thsih dhüroh kyüseh Israelrü khümchocho.