Read Sangtam Naga YUKHARÜ 8 Bible Online

YUKHARÜ 8 - Sangtam Naga bible

YUKHARÜ 8

¹Hütsüpü Efraimrünü Gideon te yocho, “Tuepü Midianrü te khatanung wüde ihrü müdsicho? Tuepü ihrü te hita bichiro?” Arühnü hütsü nengdang dee mükünyangcho.

²Ta abinü yocho, “Ihnü nguchichehnung liba tsü nührünü nguchicho te tulasü mükihtacheh. Nührü Efraimrünü nguchiba azikyah tsü mii ihrü hung apümshünü nguchicho tenü awüu lile.

³Ajüje, Tsingrangba tase khu nührünü Midianrü akurahrü anyüh Oreb ko Zeeb nyüh kyüsehko. Hütsü te kihtachehnung Ihnü tu nguchicho?” Abinü hütsü yode, arüh zichürocho zah pehcho.

⁴Hitadelü Gideon ko abi nyitsarü thsih asang tsü Jordan Yongkhi chii rocho ko hütsü kehpü licho. Arüh kyahsehpü licho, ta mütozah arorüh iiwücho.

⁵Khode arühnü Sukot chihcho, abinü hütsüla lirü te yocho, “Yanglilüm I nyitsarü khyang hümthse khürü tüpm. Arüh kyahsehko ko Midianrü yangthsarü Zebe ko Zalmuna iiwüre.”

⁶Ta Sukot zirünü yocho, “Tuepü ihrünü nü rothsarüti khyang tsuyongnung jünung? Nühnü ade yingcheh Zeba e Zalmuna nyüh mürang.”

⁷Achotsü Gideon-nü yocho, “He! Khode ABÜDONGBAnü Zeba e Zalmuna nyüh I khyang jünang, Ihnü nührü chah lipilih zengnü!” xüpnung!”

⁸Gideon-nü Penuel lang wücho ko hütsüla lirü te hütsüroh-i du kihchicho, ta Penuelrünüsü Sukot-rü nü lalingcho kyo du lalingcho.

⁹Achotsü abinü arüh te yocho, “Ih khümcho thali ronung, ko khode Ih thali ronang, Ihnü nührü rangrangkuh thsangnyangjünung!”

¹⁰Zeba e Zalmuna nyüh arüh rothsarü nüpü Karkor la licho. Azong nyitsarü rothsarü apüm yolanü hajar dhüre-münga oshi du nyingcho; ko rothsarü lakh khüdupü hajar mükyü changpehcho.

¹¹Gideon-nü Noba ko Jogbeha nyüchürolang lipilih lanü langjüp wü rothsarüti tsü thohdhünü mahcho.

¹²Midian yangthsarü Zeba e Zalmuna nyüh tsü rang tsicho, ta abinü arüh iiwü rangcho, ko arüh rothsarü apüm lümdhamasohcho.

¹³Khode Gideon khata langnü Heres lang lanü thalicho,

¹⁴abinü Sukot lanü dhrezarü khüdu rangcho ko abi te yu tsingcho. Dhrezaba tsünü abi khyang Sukot-rü langnürü nyitsarü nyührepü dhünyeh neng thrahjücho.

¹⁵Hütsüpü Gideon-nü Sukot lang wünü arüh te yocho, “Nührünü Ih mütrobasü mülümcheh-o? Ihnü Zeba ko Zalmuna nyüh mürangde kyahseh liba I rothsarüti khyang tu atsunung müjünungepü nührünü yocho. Dheng arüh hila lile.”

¹⁶Hütsüpü abinü rangmü zeng khyo Sukot-rü langnürüti khingchicho.

¹⁷Adesü abinü Penuel la rangrangkuh thsangnyangjücho ko hütsüla lirüti kyüsehcho.

¹⁸Hütsüpü Gideon-nü Zeba e Zalmuna nyüh te tsingdhengcho, “Nührünü Tabor la kyüsehba nyitsarü tsü tu roh-io?” Arühnü lalingcho, “Arüh tsü nührü kyole, arüh atümung yangthsarü khüdu tsurü kyole.”

¹⁹Gideon-nü yocho, “Arüh tsü I nirüti lile, Itpa khung tsurüti lile. Ihnü yuchüm yore, nührünü arüh tsü mükyüsehlang, Ihnü nührü mükyüsehba thsachoe.”

²⁰Hütsüpü abinü atsurü aukhuba Jother te yocho, “Arüh tsü kyüsehng!” Ta azaba tsünü akheh mülehchehcho. Abinü tütohnyünyehcho, tunüo abi azarü du thsacho.

²¹Hütsüde Zeba ko Zalmuna nyühnü Gideon te yocho “Thsaang, nüpu khehnü ihrü kyüsehng. Adhrerü nguchi tsü adhrerünü du nguchire.” Achotsü Gideon-nü arüh kyüsehcho ko arüh ut hong la zehcho thsidi kohroti tsü khyücho.

²²Hütsüpü khanglang, Israelrünü Gideon te yocho, “Nüh ko nü shümtsurü chii nüh ihrü Yangthsaba thsaang. Nühnü Midianrü kheh lanü ihrü khümchoko.”

²³Gideon-nü lalingcho, “Ih ko I tsurütinüsü nührü michah yangthsa müthsanung. ABÜDONGBA tsü nührü Yangthsaba thsanung.”

²⁴Ta abinü adesü yocho, “Ihnü nührü tenü lango tsingdhengnung. Nührü atümungnü nührünü hirocho nangmüshi tsü I khyang jüng.” (Aparü lihpi nyitsarü kyo Midianrü nüsü hon-nü külüpcho nangmüshi nangcho.)

²⁵Müyurütinü lalingcho, “Ihrünü künyangseh nü khyang jünung.” Arühnü shü khyangpü hütsüla palunü hirocho nangmüshi tsü thohyohcho.

²⁶Hon nangmüshi dunü süreh mükyü-o thsacho ko hütsüla thsidi kohro, lah ko Midianrü yangthsarünü khyüba anyahrüm shü mahkhang arüh ut hong la zehba kohro müzeh.

²⁷Hon tsünü Gideon-nü kyothri khüdu külüpcho ko abi yangdi Ofra la abi kuhla yohpücho. Ko Israelrü atümungnü Tsingrangba pehjüpü hütsüba kyothri tsü mübünung wücho. Hütsü Gideon ko abi kukhi nengdang uzathsa khüdu licho.

²⁸Hütsüta Midian tsü Israelrünü kohchehcho ko adelü tu adrünung mülicho. Gideon müsüde kang yüre alih la yangtsa licho.

²⁹Gideon-nü thali apu kuh lang wü hütsüla licho.

³⁰Abi tsurü adhrerü nyühre licho tunüo anitpü adrong licho.

³¹Shekem la abi ashüm sü licho; abükyünü adhrerü khüdu nümüsucho, ko abinü aneng Abimelek dsijücho.

³²Joash tsurü Gideon tsü shiseh sücho ko Abiezer hung yangdi Ofra la au Joash kong la abi dhrürangcho.

³³Gideon süpü Israelrünü thali Tsingrangba te yuje müchocho ko Baal mübücho.

³⁴Arühnü azengtacho Baal tsü arüh tsingrang kangsohcho ko arüh rorüh chahnü khümchoba ABÜDONGBA arüh Tsingrang müdikehpehcho.

³⁵Arühnü Israelrü nengdang atsa hütsüdoi nguchijüba Gideonrü kukhi te künyang mülümcho.