Read Sangtam Naga 3 JOHAN 1 Bible Online

3 JOHAN 1 - Sangtam Naga bible

3 JOHAN 1

¹Aziba chahnü— Ihnü yuje müiba amüi Kaius yanglang:

²Amüi shangrü, nüh anbü la tsa licho kyo nü fü ko lüpcho tsayeng linung nengdang Ihnü dangkhidangnangjüre.

³Khristan jünirü khürü ronü nüh lede yuje la licho roh-i, yuje nengdang nüh longlangchehba khüduepü yode, Ih künyangsecho.

⁴I tsurüti yuje la licho yuchicho tenü tu apanü Ih mükünyangchehsoh.

⁵Amüi shangrü, nühnü khristan jünirüti arüh nyühsi thsanye, arüh nengdang nguchicho tsü khura longlangre.

⁶Arühnü hila Lithro te nü amüi nengdang yuzi jüko. Arühnü lang khüdu la dusü Tsingrangba künyangnung lang la mütozah shitsehnungthsa nühnü arüh troung.

⁷Tunüo arühnü Khrista nengdangnü müyudsirü chahnü tusü mükhyüpü shemüsuko.

⁸Hütsünü, Ihsa khristantinü yuje nengdang arüh nguchi la tronungthsa hitari nyitsarü tronungbae.

⁹Ihnü Lithro yang vathrah akhikyah thrahko: Ta Diotrefes, sünü arüh anüchiba kangnyüro, abinü Ihnü yocho seh münyire.

¹⁰Hütsüeko Ih khode ronang, abinü nguchicho, Ihsa nengdang adrünung chocho, ko abinü arahkheh chocho apüm Ihnü nührü te yonung. Hütsü du mah, ta abinü khristan jünirüti rode mükhyüchore, ko sürünü arüh khyüchonyüro arühsü yatire ko Lithro lanü iipehnung müküpre!

¹¹Amüi shangrü, amütsa tüithsa, ta atsa iithsang. Sünü atsa nguchiro abi Tsingrangba yo; sünü amütsa nguchiro abinü Tsingrangba müngu.

¹²Atümungnü Demetrius tsacho chore; yuje tsünüsü yuzi jüre. Ihrünüsü yuzi jüre, ko Ihrünü tu yoro hütsü yuje-epü nührünü müdhele.

¹³Nü te ayonung yu adrong lile, ta Ihnü pen ko ngakinü müthrahnyüre.

¹⁴Ihnü zah nü te shirütanung longdire, hütsüde du Ihjübünyü chotanung.

¹⁵Nü te atbachi thsaang. Shangrü atümungnü salüm müdhesohre. Ihsa shangrüti atümung te salüm young.