Read Sangtam Naga JUDA 1 Bible Online

JUDA 1 - Sangtam Naga bible

JUDA 1

¹Jisu Khrista dikehrü ko Jakob ani Juda chahnü— Sürü Tsingrangbanü dsicho, sürü Au Tsingrang amüi la liro ko Jisu Khrista atsungtiba la liro arüh yang:

²Achomang, atbachi ko amüi nührü te bholo lieng.

³Amüi shangrüti, Ihsa aroh akangcheh amüsarü khyang Tsingrangbanü lede nengdang khüdupi jüba, khüi yudsi shulüm müküpnung dhengcheh nührü yang akohchonü dhsüthsa thrahnyücho.

⁴Tunüo Tsingrangba müyudsirü nyitsarü khürü, sürünü arüh amümüsa akang langjüsohnung nengdang Ihsa Tsingrangba achomang yudsi chümbhisohro, ko sürünü Ihsa adorü Abüdongba Jisu Khrista mükhyüchoro, arüh Ihsa yola rang züro lile. Arüh mülang nguba tsü papadenü Amüsa yunü münguchehpehko.

⁵Tunüo nührünü hi atümung müdhenye, Ihnü nührü te Abüdongbanü khüta Israelrü khüdupi Ijip lih lanü khümchocho; ta akhanglang arühnü müyudsichonü arüh changjücho, hütsü nengdang Ihnü nührü khyang lümchehsohnyüre.

⁶Ninglang riwürüti sürünü palu azengzah tase pohki mülipü arüh liji pehjücho; arüh tsü apohki amarürah la achangka müliba ixilihnü rah lile, hütsüba nyümong amülah khüi la arüh mülangjünung hütsüba nengdang Tsingrangbanü arüh yohpülepü lümchehng.

⁷Sodom ko Gomora ko hütsüba mükang liba yangditi lümchehng, sürünü hütsüri ninglang riwürüti roh-i nguchicho ko mabomashicho ko ayah chah mükehcho mükhyahmürah atümung nengdang adüzü thsanung müchangkaba michang la arüh khingchinung.

⁸Hütsüroh-i du, hiri nyitsarünü münguchehnü arühbürü fü nyümnü amünyi shitpahre; arühnü Tsingrangba tase müchümükehre ko amunglang kehba ahechiti mükhimüngure.

⁹Riwürü ayingba Maikalnü mii hiroh-i münguchi. Abinü Motsing te Mosa fü khyünung nengdang khatade, Maikelnü Motsing mükhimüngu yu yonung müsi mümülahcho, ta hiroh-i yocho, “Abüdongbanü nüh khataang!”

¹⁰Ta hiri nyitsarü arühbürünüsü münyichehpü kanglungrü roh-i ayah dunü nyichehpü masü mükhimüngure, hiri tsünü arüh changsohre.

¹¹Arüh ahohah! Arühnü Kain khanglang iiwücho. Tunüo thsi ngang Balamnü thsamehcho mülang la arühnü iiwücho, ko Koranü nyümchola arüh changko.

¹²Arüh ashahmükeh müramüro tsü nührü amüi thsüti la lapha kyole. Müring müdrüpü abürü shulüm du lümre. Kih müzehpü nyübongnü fotsiba nyükhi, tsingkang la asih müsih anyüpi süba, aranü rohchehcho singdong.

¹³Arüh ashahmükeh nguchiti tsü adrünung kihdi kilohnü müjümüphi chürosohba tsü kyole. Arüh tsü arümchiba chenghiti kyole, sürü nengdang Tsingrangbanü asoh-uba amarürah la lede nengdang müdüm khüdu yohpüro hütsü kyole.

¹⁴Hiba tsü Adam chahnü trahchocho adhüroh-uba Enok, sünü akhulangnü arüh nengdang hi choyohcho: “Abüdongba tsü abi amüsarü riwürüti hajar adrong yola

¹⁵atümung nengdang yukhanung, arühnü amütsa nguchicho apüm mülang jünung ronung!”

¹⁶Nyitsarü hiri lede jümjümre ko aparü mülangjüre; mükhyahmürahre, müthsehmülare ko arüh ajingcho ngunung arahkheh la aparü kihsehre.

¹⁷Ta shangrüti, atsicho la nührü te Abüdongba Jisu Khrista riwürütinü tu yocho hütsü lümchehng.

¹⁸Arühnü nührü te yocho, “Achangka nyümong la nührü müthsamünyürü ko palu mürucho amünyi lang la rachirü chüronung.”

¹⁹Hiri hi anbü müliba shutsa müruba la li achangnah chürosohrüti lile.

²⁰Ta nührü I shangrüti, nührü amüsacheh nguchi tsü nührü jangjangthsa külüpkehng. Anbü Amüsa zii la dangkhidangnang,

²¹ko Ihsa Abüdongba Jisu Khrista achomang la nü khyang müchangkaba akang jüsohnung ying lide, nührü jangjang Tsingrangba amüi la lieng.

²²Tütohnyünyehrü te achomang ngusohng;

²³aparü mihmüle lanü tphahcheh khümchoung; ko aparü te dronü achomang ngusohng, ta arüh mükhyahmürunü münyicho jengkilü thrünyieng.

²⁴Sünü nührü müngahsehsohnung kohro, ko nührü achomükehpü akünyangnü abi ahechi la yohpünung kohro,

²⁵Ihsa Abüdongba Jisu Khrista khu Ihsa Kangchehjüba Tsingrangba khyang du atsicho shang apüm lanü, ko lede müchangkapü ahechi, adhichi, akoh ko tase thsaang. Amen.