Read Sangtam Naga MISHACHO 11 Bible Online

MISHACHO 11 - Sangtam Naga bible

MISHACHO 11

¹Hütsüpü I khyang akihsing xuyang khüdu jünü yocho, “Wüng ko Tsingrangba amübükuh ko bholu tsü kihng, ko amübükuh la mübürüti khidheng.

²Ta dongkhu tsü tükih, tunüo choo yürepü anyüh Amüsa yangdi tsü dhrümchinung nengdang hütsü yangpirü khyang jopehko.

³Ihnü I yuzi thsarü nyüh anyüh müyahshü müpipü müthehnung, ko arühnü hütsüri 1,260 nyümong la tsü Tsingrangba yu sobhonung.”

⁴Yuzi anyüh tsü limih Abüdongba bete yaba olive singdong anyüh, ko dsimüdongsing anyüh tsü lile.

⁵Khürünü arüh thsakehjünung müküpkhang, arüh be lanü michang chüro arüh rorüti changjüre; hütsüta arüh thsakehjünung müküprü tsü mapsehnung.

⁶Arühnü Tsingrangba yu sobho bekhyah tsing mürosohnung ning khangtinungsü arüh chah zii kehle. Kihnü ashüh kangsohnung, ko arühnü lümde limih chah wara masünü chihsohnungsü arüh chah zii kehle.

⁷Arühnü thsingyukade, ajongnah müliba lanü chüroba kanglungrü tsünü arüh nyüm khatanung. Abinü arüh kohnung ko arüh mapsehnung,

⁸ko arüh me tsü arüh Abüdongba hamkehba yangdi tungte la tsü jonung. Hütsüba yangdi neng adüzü tsü Sodom mahkhang Ijip linung.

⁹Ko limih, ahung, yucho, ko atrah apüm lanü arüh me tsü nyümong asangpü achangsho dhengnung ko arüh me rangnung mümülanung.

¹⁰Hütsünyi sücho nengdang limih nyitsarüti künyangnung. Arühnü jiyü jüta künyangtanung, tunüo azikehrü hütsü nyinü amüi tsurü khütang chongchasohko.

¹¹Nyümong asangpü achangsho khanglang Tsingrangba chahnü akang sah arüh chah züducho, ko arühnü yacho; ko hütsü ngurü atümung drüpehcho.

¹²Hütsüde azikehba nyüh tsünü ninglangnü anyüh te yuva amülahnü, “Hila kürung!” pü yo yuchicho. Arüh rorütinü dheng yade, nyükhi la arüh ninglang tuwücho.

¹³Hütsüde alihyo atrehdi zingcho; yangdi tsü changsho dhüre la khüdu changcho, ko nyitsarü hajar dhünyeh mapsehcho. Anyingcho nyitsarütinü drüseh ninglangrü Tsingrang dicho nengdang secho.

¹⁴Adrünung anyüuba tsü khuko, ta adrünung asanguba tsü zah ronung!

¹⁵Hütsüpü dhünyeh-uba ninglang riwürü tsünü abi rühti mehcho ko ninglangnü yuva amülahnü yocho, “Limih yangthsanung tase tsü adelü Ihsa Abüdongba ko abi Mesia khyang jüko, ko abinü müchangkapü yangthsanung!”

¹⁶Hütsüde Tsingrangba bete pümrü azibarü mükyüpü müyü tsünü mükhukeh Tsingrangba mübo

¹⁷yocho: “Ade ko atsiba la liba, Akohba Abüdongba Tsingrang! Nühnü zii amülah khyo yangthsanung dikehchonü nüh sere!

¹⁸Nü rihlong chüroba becho chihchonü, ko asürüti yukhanung becho chihchonü, müyudsirüti zichürore. Nü dikehrüti, azikehrüti ko nü mübürü atümung, nü jengreng drürüti amülah ko azikyah, jiyünung becho chihko. Limih changjürüti changsohnung becho chihko!”

¹⁹Ninglang Tsingrangba amübükuh khangthrucho, ko azengchotacho singdi tsü hütsüla ngucho. Hütsüde ningmüla, ningki yuva rengreng alihyo ko shurü khütang sühcho.