Read Sangtam Naga MISHACHO 14 Bible Online

MISHACHO 14 - Sangtam Naga bible

MISHACHO 14

¹Hütsüpü Ihnü dhengde, Sanza tsü Zion zong chah yacho; abi yola arüh kikhang chah abi neng ko Au neng thrahkehcho nyüh 144,000 licho.

²Ko Ihnü ninglangnü kihsasa yuva kyo ko ningki yuva kyo yuva khüdu yuchicho. Hütsü khithsarütinü arüh ikhong tiicho yuva kyocho.

³Nyüh 144,000 tsünü Yangthsaba pümji, akang kanglungrü müyü ko azibarüti bete yapü arüh dunü nyichehba khi asi khüdu thsacho. Amüi tsurü atümung yola alihchehrü tsü arüh du thsacho.

⁴Khingkurü te mümükhongpü müthsengcheh lirü tsü arüh thsacho. Sanza tsü khüdederü wonang arühnü abi khanglang iiwücho. Amüi tsurü yolanü arüh tsü lihchehcho ko Tsingrangba ko Sanza khyang akhudiba amübü tsü arüh kangcho.

⁵Arahkheh chonung arühnü khodesü mümüdhecho; arüh mülang müle.

⁶Hütsüpü apa riwürü khüdu nyübong la müchangkaba Yuse Atsa alimih la lirü, atrahti, ahung, yucho, limih atümung te seyohjünung hipü Ihnü ngucho.

⁷Abinü yuva amülahnü yocho, “Tsingrangba drüng ko abi dicho seing! Tunüo amüi tsurü yukhanung becho chihko. Sünü ning, alih ko yongna apüm külüpcho abi mübüng!”

⁸Anyüuba ninglang riwürü chüro yocho, “Khüluko! Arangcheh Babylon tsü khüluko! Abükyünü alimih atümung khyang abükyü yongkha amümüsa mükhyahmürah yongsohko!”

⁹Asanguba ninglang riwürünü akhuba anyüh khanglang chüro yocho, “Sünü kangdi ko abi kyothri mübüro ko akikhang mahkhang akheh la amüdhethsa tsü khyüro,

¹⁰Tsingrangba rihlong yongkha amüyohrütacho abi zichüroba yongkha shing tsü abinü yongnung. Hütsüta nguchirü atümung amüsa ninglang riwürü ko sanza bete michang ko miphohnü khingchinung.

¹¹Arüh khingchiba michang mikhu tsü müchangkapü tuwüre. Kangdi ko hütsü kyothri mübürüti ko hütsü neng amüdhethsa kehrüti nengdang ama atsingse akyahshang müle.”

¹²Hi amüsarü sürünü Tsingrangba yuzeng bichiro ko Jisu te longlangcheh liro, arüh nengdang arangcho shulüm lile.

¹³Hütsüpü ninglangnü yuva khüdu yo Ihnü yuchicho, “Hi thrahng: Ade tinü sürü Abüdongba dikehba la süro arüh amüwanung!” “Yutsatsa! Anbünü lalingcho. Arüh khee nguchiba lanü akyahshang ngunung, tunüo arüh dikehba amii tsü arüh te würe.”

¹⁴Hütsüpü Ihnü dhengde nyükhi athru khüdu ngucho, ko nyükhi la tsü nyitsarü kyopü khüdu athah la hon kuthri thripü ko akheh la yavi akoh bipü ngucho.

¹⁵Hütsüde ninglang riwürü apa khüdu amübü kuhla tsünü chüro nyükhi chah pümba te tsü yuva amülahnü züde yocho, “Nü yavi bichi ma tsü xaang, tunüo akyang chihko; limih maxa kyangko!”

¹⁶Hütsüde nyükhi la pümba tsünü ayavi müthehchücho ko limih xacho.

¹⁷Hütsüpü ninglang amübükuh lanü riwürü apa khüdu chürocho Ihnü ngucho ko abisü yavi akoh khüdu bicho.

¹⁸Hütsüde michang xükümba riwürü apa khüdu bholu chah tsünü chürocho. Abinü yavi akoh biba riwüba te tsü yuva amülahnü züde yocho, “Nü yavi tsü müthehchüng ko limih shükusiluh la tsünü shüsih tsü xaang, tunüo shüsih tsü nyiko!”

¹⁹Achotsü ninglang riwürü tsünü limih chah yavi tsü müthehcho, ko shüsishü chahnü shüsih tsü xabülungcho ko Tsingrangba rihlong chüroba shükusih nyehsing la tsü thohyohcho.

²⁰Shüsih tsü anyehsing lanü yangdi thsilangnü yamcho, ko anyehsing lanü ashüh kihmülüm ashenglang Lutri thsih asang ko khehap asang oshi asoh thsacho.