Read Sangtam Naga MISHACHO 15 Bible Online

MISHACHO 15 - Sangtam Naga bible

MISHACHO 15

¹Hütsüpü Ihnü ning chah amüdhethsa arangcheh ko anyemüyangnung khüdu ngucho. Hütsüla ninglang riwürü dhünyeh achangka wara dhünyeh hipü licho, tunüo arüh tsü Tsingrangba zichüroba achangkaba licho.

²Hütsüpü michang te yohrütacho kyo tsahrising kihdi khüdu Ihnü ngucho. Ko adesü kangdi ko hütsü kyothri ko sü neng shikhinü amülih yacho hütsü michah akohrütisü ngucho. Arüh Tsingrangbanü jücho ikhong bipü tsahrising kihdi bekhüm la yacho,

³ko Tsingrangba dikehrü Mosa khi ko Sanza khi thsa yacho: “Akohba Abüdongba Tsingrang, nü nguchi khüta amülah ko anyemüyangnung! Yangliti Yangthsaba, nü langti khüta yuje ko amüsa!

⁴Sünü nüh müdrünung, Abüdongba? Nü dicho sünü müchechonung? Nüh du amüsa lile. Yanglih apümnü ro nüh mübünung, tunüo nü yuje nguchi tsü atümungnü nguko.”

⁵Hütsüpü ninglang amübükuh amüsa shükuh zehpü khangthrucho Ihnü ngucho.

⁶Wara dhünyeh kehba ninglang riwürü dhünyeh tsü ariri keh jengkipü ko hon-nü arüh dreng dsipü amübükuh lanü chürocho.

⁷Hütsüpü akang kanglungrü müyü yola khüdunü hiri riwürü dhünyeh khyang lede müchangkaba Tsingrangba rihlong chürobanü jeng hon mütpah-tbhü dhünyeh jücho.

⁸Tsingrangba ahechi ko zii lanü chürocho mikhunü amübükuh tsü jengcho, ko riwürü dhünyehnü hiroba wara dhünyeh tsü mükingkade sünüsü amübükuh la tsü müzüduchehcho.