Read Sangtam Naga MISHACHO 16 Bible Online

MISHACHO 16 - Sangtam Naga bible

MISHACHO 16

¹Hütsüpü amübükuh lanü yuva amülah khüdunü riwürü dhünyeh te yocho Ihnü yuchicho: “Wüng ko Tsingrangba rihlong tbhü dhünyeh limih chah mükhakehjüng!”

²Akhudiba riwürü tsü wücho ko limih chah abi tbhü mükhakehjücho. Hütsüde kangdi amüdhethsa kehba ko abi kyothri mübürü chah mathsa adrünung khüdu chürocho.

³Anyüuba riwürünü abi tbhü kihdi la mükhakehjücho. Kih tsü asürü shüh kyo kangcho, ko kihdi la kangzah apüm sücho.

⁴Asanguba riwürünü abi tbhü yongkhi ko yongna la mükhayohjücho, ko hütsü ashüh kangcho.

⁵Kih xükümba riwürü tsünü hita yocho Ihnü yuchicho, “O Amüsaba, nü yukhaba yuje lile, nüh licho ko nüh lire!

⁶Arühnü Tsingrangba nyitsarü ko azikehrüti shühkhatohcho, ko hütsüta nühnü arüh khyang ashüh yongsohcho. Arüh ngunung aleng arühnü ngure!”

⁷Hütsüde bholu chahnü Ihnü yuva khüdu yo yuchicho, “Akohba Abüdongba Tsingrang! Nü yukhaba yuje ko athsalang lile!”

⁸Müyüuba riwürünü abi tbhü nyü chah mükhakehjücho, ko michang adhsa tsünü nyitsarüti tahsehsohcho.

⁹Michang adhsa tsünü arüh tahcho, ko arüh wara michah tase liba Tsingrangba neng chokehcholacho. Ta arühnü lasih müthsamülacho ko abi dicho müsecho.

¹⁰Amüngauba riwürünü abi tbhü kangdi Yangthsaba pümji chah mükhakehjücho. Kangdi yanglih michah amarürah rocho, ko adhsachonü nyitsarütinü müle mükahcho,

¹¹ko arüh mathsa ko adhsa nengdang arühnü ning Tsingrang chokehcholacho. Ta arühnü lasih müthsamülacho.

¹²Adhüroh-u riwürünü abi tbhü Eufrates yongkhi arangcheh la mükhakehjücho. Nyüchüro langnü rorüh yangthsarüti khyang lang vijünung yongkhi tsü kungpehcho.

¹³Hütsüpü kheng kyopü amünyi nbü asang Ihnü ngucho. Arüh tsü dragon be lanü, kangdi be lanü, ko arahkheh azikehrüti be lanü chürochi ngucho.

¹⁴Akohba Tsingrang Nyümong arangcheh khata nengdang arüh nürütanung anbü asang tsü limih yangthsarüti atümung yanglang wücho.

¹⁵“Dheng! Ih aführü khüdu kyo rore! Sünü tbhüdeng mütsehnung ko müyurü yola ashah mükhyünung nengdang kukeing jengki rungnüm yohpüro abi amüwanung!”

¹⁶Anbü tsünü Yangthsarüti atümung Ibri yula Armagedon dsiba müdüm la tsü shibülungsohcho.

¹⁷Adhünyeh-u riwürünü abi tbhü tsü nyübong la mükhakehjücho. Amübükuh la Yangthsaba pümji la yuva arangchehnü yocho, “Rungnümko!”

¹⁸Hütsüde ningmüla, ningki yuva rengreng ko adrünung alihyo zingba licho. Lipoh dinü hidoi alihyo zingba mütikehdheng; apüm yola hiba hi amütsauba licho!

¹⁹Yangdi arangcheh tsü asang kang trehrüpcho, ko limih apüm la yangditi thsangnyangcho. Tsingrangbanü arangcheh Babylon lümchehcho ko abi shing lanü abi rihlong yongkha tsü yongsohcho.

²⁰Mütroti apüm müngupehcho ko azongti apüm changpehcho.

²¹Nyitsarü chah ninglangnü shurü khüdunü amülinglang süreh dhünyang-nyang shohjocho; ko hiba shurü wara khyanglangnü nyitsarünü Tsingrangba chokehcholacho, tunüo hütsü adrünung wara thsacho.