Read Sangtam Naga MISHACHO 18 Bible Online

MISHACHO 18 - Sangtam Naga bible

MISHACHO 18

¹Hütsüpü ninglang riwürü apa khüdu ninglangnü jüro Ihnü ngucho. Abi tase amülah ko abi ahechinü limih apüm vicho.

²Abinü yuva amülahnü züde yocho: “Khüluko! Babylon yangdi arangcheh khüluko! Adelü hütsü motsing ko amünyi nbünü tachiji ko amümüsa lüpcho ko athrünyinung uzati liji kangko.

³Tunüo liküprünü abükyü amümüsa mükhyahmürah yongkha tsü yongko. Limih yangthsarünü abükyü te nahtrahnaxengko, ko limih la shithsabhülehrü abükyü mürahseh mükhyahmürah khu alirü kangkhangko.”

⁴Hütsüpü Ihnü ninglangnü yuva apa khüdunü yo yuchicho: “I nyitsarüti, abükyü chahnü chürung! Abükyü münyi la nührünü tütrümta; Abükyü akhingchi nührünü tüchangta!

⁵Tunüo abükyü münyi ning chii bhümkehko, ko abükyü amünyiti Tsingrangbanü lümchehre.

⁶Abükyünü nührü bichicho kyo abükyü bichieng; abükyü nguchi aichi abükyü khyang anyüshinü thali jüng. Abükyünü nührü khyang rungnümjücho tenü yongkha azicho anyüshinü ashing jeng liijüng.

⁷Abükyünü künyangküshi müzangcho kyo abükyü khyang achongcha ko alongri jüng. Tunüo abükyü jangjangthsa yore: ‘Ih yangthsalarü, hila pümre! Ih chomirü mah, Ih alongri khodesü müngunung!’

⁸Hi ngang, wara, dhsara, alongri ko yangkongnü nyümong khüdu abükyü chah xüpnung. Ko michangnü abükyü trüpnung, tunüo Abüdongba Tsingrang, sünü abükyü yu kharo, abi Akohbong!”

⁹Limih yangthsarü sürünü abükyü mabomashi ko mükhyahmürah la nohlüm khyücho, abükyü trüpcho michüh ngude arühnü yangdi me tranung.

¹⁰Arühnü abükyü khingchicho dro ashu lanü yapü yonung, “Khütoh-i adrünung! Babylon yangdi arangcheh ko ahechi! Rehtseh khüdu lanü yukhako!”

¹¹Limih shithsabhülehrü nüsü abükyü me trare; tunüo

¹²arüh hon, taripi, thsidi lung, bhürüm, anana shü, anyahrüm shü, lungbhi nbüh shü ko amoh shü; Sing amii athsah ko thsüro-ha, sing atsa, imüyeng, idhse ko marblenü külüpcho kohro;

¹³Shingsheng, hiisehyah, axümlichi, tuji ko müchiji; yongkha ko tuji, hüm ko litoh, misü ko san, kuri ko akhülusing, ayurü ko nyitsarü akang mii adelü sünüsü arüh kohro mülihre.

¹⁴Shithsabhülehrünü abükyü te yorü, “Nühnü mükhyahba kohro apüm changpehko, ko nü kuthsi ko atsah atsa tsipehko, ko nühnü khodesü hütsüri müngunung!”

¹⁵Hütsüba yangdi la shithsabhüleh alirü kangrüti atümung ashu la yanung, tunüo abükyü akhingchi arühnü drüre. Arühnü tra meshonü,

¹⁶yonung, Yangdi arangchehsü “Ahohah! Abükyünü anana, anyahrüm ko amoh shü khyücho ko hon, thsidi lung, ko bhürüm afü jeng lahcho!

¹⁷Ko rehtseh khüdu lanü abükyü kuthsi hütsütoi changpehko!” Kihkuh nüchirü ko shitsehrü atümung, anürü ko aparü sürü hiba kihdi lanü akang licho,

¹⁸arüh atümungnü abükyü trüpcho mikhu ngude ashu lanü yapü züdecho: “Hiba yangdi dicho kyo tu yangdi licho!”

¹⁹Arühnü arüh thah chah asongsong phikeh me tranü yocho, “Yangdi arangcheh sü ‘Ahohah!’ Hiba yangdi khu kihkuh kangrü atümung alirü kangko! Ko rehtseh khüdu lanü abükyü kuthsi apüm changpehko!”

²⁰Abükyü changcho nengdang ninglangrü künyang! Amüsarü, riwürü ko azikehrüti künyang! Tunüo abükyünü nührü nyüm nguchicho ngang Tsingrangbanü abükyü mülangjüko!

²¹Hütsüpü rezeh ninglang riwürü khüdunü anyehsing kyo lungtpah arangcheh khüdu dhiro kihdi la dhiyohchonü yocho, “Babylon yangdi arangcheh tsü hi kyo mütsa dhiyohchüpehnung ko khodesü thali müngunung.

²²Ko ikhong tiirü, khi thsarü, honglilah ko rühti mehrüti yuva nü chah khodesü müyuchinung. Sihnguchirü nü chah khodesü müngunung; ko fürü nyeh yuva nü chah khodesü müyuchinung!

²³Nü chah dsi avisa khodesü müngunung; kukangba ko kulangwütpü yuva nü chah khodesü müyuchinung. Limih la shithsabhülehrü ayingba nüh thsacho ko nü zii-mongnü liküprü thsüyohchüko!”

²⁴Azikehrü ko amüsarü limih la mapsehcho shüh hiba yangdi la nguchonü; Babylon tsü khingchicho.