Read Sangtam Naga MISHACHO 19 Bible Online

MISHACHO 19 - Sangtam Naga bible

MISHACHO 19

¹Hütsüpü ninglangnü sühdi yuva khüdunü züde yocho Ihnü yuchicho, “Tsingrangba seing! Akangcheh, ahechi ko zii Ihsa Tsingrang yo lile!

²Abi yukhaba yuje ko athsalang! Mabomashi nguchinü limih münyijütpü, nahtrahnaxenglatpü abinü mülangjüko. Tsingrangbanü abükyü khingchicho, tunüo abükyünü abi dikehrüti mapsehcho.”

³Arühnü adesü züdecho, “Tsingrangba seing! Yangdi trüpcho mikhu tsü müchangkapü tuwüre!”

⁴Azirü mükyüpü müyü ko akang kanglungrü müyü tsünü Yangthsaba pümji la pümba Tsingrangba jingte mükhukeh mübo yocho, “Amen! Tsingrangba seing!”

⁵Hütsüpü Yangthsaba pümji lanü yuva khüdu chüro yocho, “Tsingrangba dikehrü ko nyitsarü aikyah amülah, abi mübürü atümungnü Ihsa Tsingrang seing!”

⁶Hütsüpü sühdi yuva kyo, kihsasa yuva kyo ko ningki yuva rengcho kyo Ihnü yuchicho. “Haliluya! Tunüo Abüdongba, akohba Tsingrang tsü Yangthsabong!

⁷Ihsanü nengse künyangnung; Ihsanü abi mülahcho senung! Tunüo Sanza kukangnung becho chihko, ko hütsü nengdang anüyohtpü rungnüm lile.

⁸Anana, amüsa jengki abükyü khyang khyünung jüko.” (Shü anana tsü amüsarü nguchi atsa lile.)

⁹Hütsüpü ninglang riwürü tsünü I te yocho, “Hi thrahng: Sanza thsüti la sürü dsiyohcho arüh amüwa thsaang. Ko abinü yocho, Hiri Tsingrangba yuje yu lile.”

¹⁰Ihnü abi mübünung ajingte mükhukehcho, ta abinü I te yocho, “Hütsüta tüthsa! Ihsü nüh ko nü jünirüti ko Jisu yuzi bichirü, atümung te müjang dikehrü khüdu lile. Tsingrangba du mübüng!” Tunüo Jisunü mishaba yuje tsünü azikehrüti thsümüsure.

¹¹Hütsüpü ning khangthru hütsüla kuri athru khüdu Ihnü ngucho. Hütsü chah pümba te Longlangcheh ko Yuje dsicho; Yuje la abinü yu khacho ko chitacho.

¹²Abi nahtse mihmüle kyo licho, ko athah chah kuthri adrong thricho. Abi neng apu chah thrahkeh licho, ta hütsü apu chah khu sünüsü mütsüpcho.

¹³Abi jengki tsü ashühnü jeng licho. Abi neng tsü “Tsingrangba Yu”.

¹⁴Ninglangrü rothsarünü shü anana, athru ko amüsa khyüpü, kuri athru chah pümpü abi iiwücho.

¹⁵Limih kohnungba, abe lanü nohsheng akoh khüdu chürocho. Abinü idhse janü arüh michah yangthsanung, ko akohba Tsingrang rihlong chüroba yongkha nyehsing la abinü yongkha tsü dhrümchinung.

¹⁶Ajengki la ko aphüm chah abi neng, “Yangthsarü michah Yangthsabong ko abüdongrü michah Abüdongba” pü thrahkeh licho.

¹⁷Hütsüpü ninglang riwürü khüdu nyü chah ya ngucho. Abinü ningwüm la yechiba uza apüm te yuva amülahnü züde yocho: “Rung ko Tsingrangba thsüti arangcheh nengdang müjang shibülung!

¹⁸Rung ko yangthsarü, anüchirü, athrungrü, kuri ko hütsü chah pümrü, ayurü ko nyüje, amülah ko aikyah, atümung shuh tsung!”

¹⁹Hütsüpü kuri chah pümba ko abi rothsarü nyüm khatanung nengdang, hütsüba kangdi ko limih yangthsarü ko arüh rothsarüti shibülungcho Ihnü ngucho.

²⁰Kangdi tsü abi jingte thsayahiya nguchiba arahkheh azikehba zehnü rang tsicho. (Hütsüri thsayahiya khunü kangdi amüdhethsa kehrüti ko kangdi kyothri mübürüti thsüyohchücho.) Kangdi ko arahkheh azikehba anyüding miphoh zeh truyaba michang shukuh la akangnü rangyohcho.

²¹Ko arüh rothsarü tsü kuri chah pümba be lanü chüroba nohshengnü kyüsehcho; ko arüh me tsü uzatinü tsucho.