Read Sangtam Naga RUTH 2 Bible Online

RUTH 2 - Sangtam Naga bible

RUTH 2

¹Naomi anii Elimelekrü tsutpu lanü alirü nyüh khüdu anengnü Boaz licho.

²Nyümong khüdu Ruthnü Naomi te yocho, “Luh lang mamütrü thronung Ih wüsohng. Sününanglü abi jingte Ih nguchisohnung longdire.” Naominü lalingcho, “Wüng, I tsulatpü.”

³Achotsü Ruthnü luh lang tsü wücho ko maxarü khanglang mamütrü throcho. Ko hütsü Boazrü luh detingcho.

⁴Azachah lipü Boaz apu Bethlehem lanü ro chihcho ko anguchirü te yocho, “ABÜDONGBA nührü te lieng!” Arühnü lalingcho. “ABÜDONGBAnü nüh müwajüng.”

⁵Boaznü anüchiba te tsü tsingdhengcho, “Khingkurü hütsü süo?”

⁶Anüchiba tsünü lalingcho, “Abükyü tsü Moab lanü Naomi te rocho yangpilarüe.

⁷Anguchirü khanglang mamütrü thronung abükyünü I te tsingdhengko. Abükyü chünyang mütohnü nguchire ko ade du akhümki la azachah kyahshangre.”

⁸Hütsüde Boaznü Ruth te yocho, “Ihnü nü te yu khürü yonung. Mamütrü thronung aparü luh lang tüwü. Hila khingkurüti yola nguching;

⁹arüh khüde xarünang dheng arüh khanglang wüng. Nü chah müthahpünung Ihnü I nyitsarüti khyang yuzeng jüko. Ko nüh xode arühnü kha yohpüba kihbong la tsünü wü yong.”

¹⁰Ruthnü alih chii mükhukehnü Boaz te yocho, “Tuthsanung I nengdang hidoi lümxüro? Tuthsanung yangpilarü khüdu hidoi rahtahro?”

¹¹Boaznü lalingcho, “Nühnü nü nii süko tinü nü nii atpa te nguchicho lüpcho Ihnü yuchiko. Nü tpa ko nüu ko suro lih pehjüpü nühnü khodesü mümüdheba nyitsarü yola linung rocho Ihnü müdhele.

¹²Nü nguchicho ngang ABÜDONGBAnü jiyüng. Nüh tsikehnung roba, Israel Tsingrang ABÜDONGBAnü jiyü ajeng jüng!”

¹³Ruthnü lalingcho, “Adirü, nühnü I te khütang tsare. Ih nü kulilarü khüdu mahnye, I te longlüm chotacho khu alaa longkyangsohre.”

¹⁴Yangtsude Boaznü Ruth te yocho, “Rung ko hümthse khyo hikih la thsang.” Achotsü abükyünü anguchirü yola pümcho ko Boaznü aruhcho tsang abükyü khyang yohjücho. Abükyünü mi jeng tsucho ko adesü nyingcho.

¹⁵Abükyü chilang wüsohko khanglang, Boaznü anguchirü te yocho, “Abükyü khyang ma mühiecho lanüsü throsohng ko abükyü te tu tüyo.

¹⁶Hütsü mahpü, mabhongti la tsünüsü khürü tohcheh abükyü throsohnung longsohng.”

¹⁷Hütsüta Ruthnü nyüzeh mamütrü throcho ko hütsü müyehbülungde dsedong khüdu-o thsacho.

¹⁸Abükyünü throbülungcho fürü tsü yangdi lang hi züdunü anii atpa te ngusohcho. Ko abükyü tsunying tsang tsüsü abükyü khyang jücho.

¹⁹Naominü abükyü te tsingdhengcho, “Nüh khüdenü hidodo khyübülungcho? Sü luhla mungcho? Nüh tronyüba nyitsarü tsü Tsingrangbanü müwajüng.” Achotsü Ruthnü Naomi te abükyü mungba luh abüdongba tsü Boaz-epü yocho.

²⁰Naominü yocho, “ABÜDONGBAnü Boaz müwajüng. ABÜDONGBAnü lede akang lirü ko asürü te Abi anyengchocho yohpüre. Hütsüba nyitsarü tsü Ihjü xükümrü khüdu, Ihsa tsutpurü tsatsae.”

²¹Adesü Ruthnü yocho, “Hütsü du mahpü, arüh ma müxakhangde mamütrü tsü throung pü yoko.”

²²Naominü Ruth te yocho, “Ho, I tsulatpü, nü nengdang khingkurü yola Boaz luh mungnung tsü atsauba thsanung. Bürü luh la mungkhang nü chah amütsa nguchinung.”

²³Achotsü Ruthnü lüdi ko Litoh ma müxakhangde: arüh yola mungcho. Ko abükyü anii atpa yola licho.