Read Sangtam Naga RUTH 3 Bible Online

RUTH 3 - Sangtam Naga bible

RUTH 3

¹Rüm-o lipü Naominü Ruth te yocho, “Nüh künyang linungthsa Ihnü nüh kukangsohnung.

²Hiba Boaz, sü kulilarüti yola nüh mungcho, abi Ihsa tsutpurüe. Dheng, shomülang abi manyehnung.

³Hütsüeko mütsahng, axümlichi yohng ko nü jengki atsauba khyüng. Hütsüpü Pungkhyang lang tsü jowüng, ta abi mütsuyongka tashi nüh hütsüla licho abi khyang tümüdhesoh.

⁴Abi khüde yüpro hütsü dhengyoh yohpüng, ko abi yüpsehsohpü wü abi shü lumüsu abi müshüm yüpm. Nühnü tu nguchinung abinü nü te yonung.”

⁵Ruthnü lalingcho, “Nühnü yocho lüpcho Ihnü nguchinung.”

⁶Achotsü Ruthnü pungkhyang lang tsü jowücho ko anii atpanü yocho roh-i du nguchicho.

⁷Khode Boaz tsuyongkacho, abi künyang licho. Ko abinü pungkhyang nangolang yüpnung wücho. Hütsüde Ruthnü rangnü wü abi shü lumüsu ajing te yüpcho.

⁸Abi amala jesu ximülade khingkurü khüdu hütsüla yüpjo ngu nyekacho.

⁹Abinü tsingdhengcho, “Nüh süo?” Abükyünü lalingcho, “Ih Ruth-e, adirü. Tunüo Ihsa tsutpurüeko nühnü Ih xükümbae. Hütsüeko yanglilüm Ih khyüng.”

¹⁰Abinü yocho, “ABÜDONGBAnü nüh müwajüng.” “Nühnü nü nii atpa te nguchicho tenü ade tsutpu amüi tsü I te alaa ngusohre. Ailümrü nye alirü nye dhrezarü khüdu yangchi nühnü tsipehpü linungbae, ta nühnü hütsüta müthsa.

¹¹Hütsüeko, nüh tülümxü, Ruth. Nühnü tsingdhengcho apüm Ihnü nguchinung; tunüo yangdi la lirü atümungnü nüh khingkurü atsaepü müdhele.

¹²Ko Ihsa tsutpurü amünyeh-eba tsü yuje, ta I tenü amünyeh-uba nyüh khüdu lile.

¹³Shomülang hila yüpm, tsingsepü abinü nüh müxükümnyünang tsitsanung. Abinü lümkhang hütsü dee tsale; abinü mülümkhang, akang liba Tsingrangba nengla Ihnü nüh xükümnung nyengchore. Adelü mütsingsede yüpm.”

¹⁴Achotsü abükyünü hütsüla ajingte yüpcho, ta wawa lanü abükyü surocho, tunüo abükyü hütsüla yüpchoepü Boaznü bürü khyang mümüdhesohnyücho.

¹⁵Boaznü abükyü te yocho, “Nü shü hila khyücheh khyang.” Ko ashü khyangcho ko abinü fürü dsedong anyüh thohyohjüpü dhi mühehcho. Hütsüpü abükyünü yangdi lang hütsü hipü thalicho.

¹⁶Abükyü ro kuh chihde, anii atpanü tsingdhengcho, “I tsulatpü, khütacho?” Achotsü Ruthnü Boaznü abükyü te nguchicho lüpcho yocho.

¹⁷Hütsüdu mahpü, “Nüh nü nii atpa yang khehshü müthalinungbaepü yo fürü hi mühehchoe.”

¹⁸Naominü abükyü te yocho, “Hi mütsitsade rangcho ying, Ruth. Hiba khiyu mütsitsade chünye Boaz mükyahshangnung.”