Read Sangtam Naga RUTH 4 Bible Online

RUTH 4 - Sangtam Naga bible

RUTH 4

¹Boaznü tbükhüm chii tuwücho ko hütsüla pümcho. Hütsüde Elimelekrü amünyeh-uba tsutpurü Boaznü yoba tsü rocho ko Boaznü abi dsicho, “I müyang, hila ro püm” Achotsü abinü wü pümcho.

²Hütsüpü Boaznü yangdi lanü azirü dhüre dsiro hütsüla pümsohcho.

³Khode arüh pümcho, abinü ajüni te tsü yocho, “Ade Moab lanü Naomi thali roko, ko abinü Ihsa jünirü Elimelek luh tsü inyüre,

⁴ko hi nühnü müdhe linungepü Ihnü lümre. Hütsüeko, nühnü lih-e khang, ade hila azirüti zeh lidenü lihng. Ta nühnü mükhyünyükhang, young, tunüo hi khyünung athsalang tsü akhudiba nüh, hütsüko du Ih-e.” Nyitsarüba tsünü yocho, “Ihnü lihnung.”

⁵Boaznü yocho, “Dee tsale, ta nühnü Naomi chahnü luh tsü lihkhang, Moablarü chomilarü Ruth tsü sü nühnü lihre, hütsüpü du luh tsü asürü tsutpu khehla linung.”

⁶Nyitsarüba tsünü yocho, “Hütsütakhang Ihnü mülihnung, tunüo hütsü I tsuzarünü thsiking mükhyünung. Nühnü hütsü lihng.”

⁷Ade arüh chichah, kuthsi lihcho mahkhang mülihtacho hünajingyüm tsü, aiba tsünü abi jingkhüm khyücheh alihbong khyang tsü jünung. Israelrünü khiyu tsü tsitsakonung amüdhethsa hütsüta nguchicho.

⁸Hütsünü khode nyitsarüba tsünü Boaz te, Nühnü hütsü lihng pü yocho abinü ajingkhüm khyücheh Boaz khyang jücho.

⁹Hütsüde Boaznü azirüti ko hütsüla yarü atümung te yocho, “Chünye Naomi chahnü Elimelek ko atsurü Chilion ko Mahlonrü yo lüpcho Ihnü lihre ko yuzi nührü atümung lile.

¹⁰Hütsü chah lahkeh, Malon nitpü Moablarü Ruth I nitpü kangre. Hi khu kuthsi tsü asürü tsutpu khehla linung ko yangdi ko anah la arüh tsutpu müchangnung. Hi nengdang chünye nührü yuzi lile.”

¹¹Azibarüti ko aparütinü yocho, “Ho, ihrü yuzi lile. ABÜDONGBAnü Jakob khyang tsuzarü khütang nümüsujüba Rachel ko Lea kyo nü nitpü kangsohng. Efrath hung lanü alirü ko Bethlehem la adangchi kangsohng.

¹²Hiba lazatpü khu ABÜDONGBAnü jünungba tsuzarüti tsü, Juda ko Tamar nyüh tsurü Perez kukhi kyo kangsohng.”

¹³Hütsüpü Boaznü Ruth anitpü kang kuh lang nowücho. ABÜDONGBAnü abükyü müwajücho, fü müdeng kangcho ko azarü khüdu nümüsucho.

¹⁴Khingkurütinü Naomi te yocho, “ABÜDONGBA Seing! Abinü nüh dhengyehsohnung shümtsurü khüdu müwajüko. Akhunga tsü Israel la anengkhong kangsohng!

¹⁵Nü tsunyahlatpünü nüh müile, atsurü dhünyehnü nguchicho tenü alaa nü shulüm nguchijüko. Ade abükyünü shümtsurü khüdu nü khyang jüko, nüh shizide abinü nü khyang akang asi ko atsikehchah jünung.”

¹⁶Naominü akhunga tsü khyo müi-müthsüm nümüsucho.

¹⁷Kurümrü khingkurütinü azaba neng tsü Obed dsijücho. Arühnü atümung te “Naomi khyang azarü khüdu nümüsuko.” pü yocho. Obed tsü Jesse au ko Jesse tsü David au kangcho.

¹⁸Hiba hi Perez chahnü David chii tsutpu chung lile. Perez, Hezron, Ram, Aminadab, Nahshon, Salmon, Boaz, Obed, Jesse, David.