Read Sangtam Naga 1 SAMUEL 14 Bible Online

1 SAMUEL 14 - Sangtam Naga bible

1 SAMUEL 14

¹Nyümong khüdu Jonathan-nü abi thsunohrü hiba dhrezaba te yocho, “Rung, Ihjünü Filistinrü müdongchah tsü lahkhu wonung.”

²Ta hütsü Jonathan-nü au Saul, sü Gibea amünyeh Mikron la tsanümsih dong pohki licho, abi te müyocho; abi yola nyüh thsih dhüroh-o licho.

³(Bebü jengki hiba bebürü tsü Ikhabod amung Ahitub tsurü Ahija, Finehas tsurü ko Shilo la ABÜDONGBA bebürü Eli shümtsurü licho.) Jonathan tsicho sünüsü mümüdhecho.

⁴Jonathan-nü Filistinrü müdongchah lahkhu tsinung Mikmash lang la tsü lung arangchücheh anyüh lang anyüding lanü mükhümti yacho: khüdu te Bozez ko akhüu tsü Seneh dsicho.

⁵Khüdu kihku lahpi Mikmash langthring ko akhüu tsü Geba lang kihjing lahpi abe pipü yacho.

⁶Jonathan-nü dhrezaba te tsü yocho, “Ihjünü müyudsirü Filistinrü müdongchah tsü lahkhu tsinung. ABÜDONGBAnü tronungsü kohle; Abinü lümkhang, Ihsa khüdoi azikyah thsanye tu müthsa, Abinü akoh jünung.”

⁷Dhrezabanü lalingcho, “Nühnü tusü tusü nguchinye, Ih nü te lile.”

⁸Jonathan-nü yocho, “He, khang Ihjünü lahkhu tsinung ko Filistinrü khyang Ihjü ngusohnung.

⁹Arühnü Ihjü te arüh ronung yaang-khang, Ihjü yacho la du tsü yanung.

¹⁰Ta arühnü Ihjü arüh yanglang rungkhang, ihjünü wünung, tunüo hütsü ABÜDONGBAnü Ihjü khyang akoh jücho amüdhethsa lile.”

¹¹Hütsüta anyüh tsü Filistinrü khyang ngusohcho, ko Filistinrünü yocho, “Dheng, Ibrirü khürü arüh rangpümcho khi lanü chürole.”

¹²Hütsüde arühnü Jonathan e dhrezaba nyüh te yocho, “Hilang chürung! Nührü te lango ayonung lile.” Jonathan-nü dhrezaba te tsü yocho, “Ih iirung. ABÜDONGBAnü Israelrü khyang arüh michah akoh jüko.”

¹³Jonathan-nü lang la tsünü akheh ko amükhohnü thung müra küducho ko dhrezaba tsü abi khanglang iiwücho. Jonathan-nü Filistinrü tsü shing khülusohcho ko dhrezaba tsünü arüh kyüsehcho.

¹⁴Hütsüba akhudi rümsohba tsü alih müdüm azikyah lanü Jonathan e dhrezaba nyühnü nyüh mükyü kyüsehcho.

¹⁵Arüh müdongchah nyitsarü apüm drümüyangcho; amahrü ko rothsarü atümung mii adrüchonü dhridhricho; alihnü shühchicho ko nyitsarü atümung drümüyangcho.

¹⁶Benjamin lih Gibea la Saul roshengrünü Filistinrü tsishocho tsü ngucho.

¹⁷Achotsü Saulnü anyitsarü te yocho, “Rothsarüti khidheng ko sü mülirünang dheng.” Arühnü khidhengcho ko Jonathan e abi thsunohrü hiba dhrezaba nyüh mülicho müdhecho.

¹⁸Saulnü bebüba Ahija te yocho, “Yuzeng Singdi tsü hirung.” (Hütsü nyümong Israelrü bete Ahijanü hütsü dhicho.)

¹⁹Hütsüta Saulnü bebüba te chotachi yade, Filistinrü müdongchah suro tsü amütsaba kangcho, hütsünü Saulnü abi te yocho, “ABÜDONGBA te kihtanung bekhyah müle.”

²⁰Hütsüpü khüdupinü lümshütipü arühbürü khata yaba Filistinrü te khatanung abi ko abi nyitsarüti shemüsucho.

²¹Filistinrü lahpi zehnü wüba Ibrirü khürüsü ximüla Saul e Jonathan nyüh yola zehcho.

²²Efraim zong la rang pümrü aparüsü Filistinrünü dro tsilepü yuchi arüh yola zeh Filistinrü mahcho.

²³Bethaven khu hütsüta khatacho. Hütsü nyümong ABÜDONGBAnü Israelrü trocho.

²⁴Israelrü hütsü nyümong ayangchonü tase müzehcho, tunüo Saulnü yuchüm yuzeng hita jücho: “Chünye Ihnü I rorüh chah rühmüyangde sünü lango dusü tsunang abi chokehcholanung.” Achotsü hütsü nyümong ayung süsü tu mütsucho.

²⁵Arüh atümung mürong khüdu la rocho, ko hütsüla apümlang thsakukih ngucho.

²⁶Mürong tsü thsakukihnü jeng licho, ta Saul chokehchola tsü drüchonü sünüsü tu mütsucho.

²⁷Ta aunü chokehcholanü yuchümba tsü Jonathan-nü müyuchicho; achotsü ajanü thsahtrüp la tsü thrarangcho ko hütsü müyahcho. Khüdupinü abi pathsa kangcho.

²⁸Ta nyüh khüdunü yocho, “Ihrü ayangchonü tase müzeh, ta nührünü chünye sünü lango dusü tsunang chokehcholanung yuchümko.”

²⁹Jonathan-nü lalingcho, “Uwanü Ihsa nyitsarü nengdang khüta adrünung nguchicho! Dheng thsakukih tsü tsupü Ih khüta pathsa kangcho!

³⁰Chünye Ihsa nyitsarütinü arorüh kohpü khyüba tsuyongnung tsü tsurelang khüta tsanungba licho. Filistinrü khüdoi alaa kyüsehpü liba thsako.”

³¹Hütsü nyümong Israelrünü Filistinrü kohcho ko Mikmash lanü Aijalon chii khata jowücho. Hütsütadelü Israelrü tsü ayangchonü khütang kyahsepehcho,

³²hütsünü arühnü arorüh chahnü zühchocho la tsü tsohkhuta wünü misü ko miza khyücho ko hütsüla tsünü müpsehcho ko shuh tsü ashüh zeh tsucho.

³³Saul te yocho, “Dheng, müyurünü shuh ashüh zeh tsunü ABÜDONGBA nyüm amünyi shitpahle.” Saulnü züdecho, “Nührü akihyochürü! Hila lung arangcheh khüdu khülu hirung.”

³⁴Hütsüpü abinü apa yuzeng khüdu jücho: “Müyurü yanglang wüng ko arüh yo misü ko miza hila hironung young. Arühnü hütsüri kyüsehpü hila tsunung; arühnü shuh ashüh zeh tsunü ABÜDONGBA nyüm amünyi müshitpahsohnung.” Achotsü hütsü romang arüh apümnü arüh misü hiro hütsüla müpsehcho.

³⁵Saulnü ABÜDONGBA khyang bholu khüdu külüpcho, hütsü abinü akhudiba külüpcho lile.

³⁶Saulnü anyitsarü te yocho, “Ihsanü jowü amala Filistinrü tsü tsingse mahnung ko arüh atümung kyüsehnung.” Arühnü lalingcho, “Nühnü tu tsalenang hütsü nguching.” Ta bebübanü yocho, “Ihsanü Tsingrangba te akhu tsingdhengnung.”

³⁷Achotsü Saulnü Tsingrangba te tsingdhengcho, “Ihnü Filistinrü mahnung. Ihrü khyang kohsohnung mükohsohnung?” Ta hütsü nyümong Tsingrangbanü mülalingcho.

³⁸Achotsü Saulnü langnürüti te yocho, “Hila rung ko chünye tu mülang shitpahchonang rangchehnung.

³⁹Athsamehba tsü Ipu tsurü Jonathansü thsanye süsohnung Ihnü Israel khyang akoh jübong akang liba ABÜDONGBA nengla nyengchore.” Ta sünüsü to müthsacho.

⁴⁰Hütsüpü Saulnü arüh te yocho, “Nührü atümung hütsüla yaang ko Jonathan ihjü hila yanung.” Arühnü yocho, “Nühnü tsalecho nguching.”

⁴¹Saulnü ABÜDONGBA Israel Tsingrang te yocho, “ABÜDONGBA, tuepü chünye Nühnü I te mülalingcho? ABÜDONGBA, Israel Tsingrang, Amüsa lung hiri khu I te laling. Mülang tsü Jonathan ihjü thsakhang, Urimnü laling; ta mülang tsü müyurü thsakhang, Thummimnü laling.” Alalingba tsü Jonathan ko Saul chah küducho ko müyurülü müsachehpehcho.

⁴²Hütsüpü Saulnü yocho, “I tsurü Jonathan ihjü kahla throsahjüng.” Ko Jonathan chah küducho.

⁴³Achotsü Saulnü Jonathan te tsingdhengcho, “Nühnü tu nguchicho?” Jonathan-nü lalingcho, “Ihnü I ja amüle chahnü thsakukih aikyah müyahdhengko. Ih hila lile; Ih sünung rungnüm lile.”

⁴⁴Saulnü yocho, “Nüh müsüsohkhang Tsingrangbanü Ih süsohng.”

⁴⁵Ta Müyurünü Saul te yocho, “Israelrü khyang khata hidoi kohjüba Jonathan süsohnung ang? Doh! Abi thah chahnü kuva püm-o mii mülongnung ihrünü akang liba Tsingrang nengla yuchümre. Chünye abinü tu nguchicho hütsü Tsingrangba arüku khu nguchicho.” Hütsüta Jonathan asünung lanü müyurünü khümchocho.

⁴⁶Hütsüpü khanglang, Saulnü Filistinrü iichiba zahcho ko arühnü arühbürü lih lang thalicho.

⁴⁷Saul Israel la Yangthsaba kangko khanglang, abinü apümlang abi rorüti nyüm khatacho: Moabrü, Amonrü, Edomrü, Zoba ko Filistinrü yangthsarü. Khüdederü abinü khatacho abinü kohcho.

⁴⁸Abinü kurah khatacho ko Amalekrü mii kohcho. Abinü apüm kheh lanü Israelrü khümchocho.

⁴⁹Saul tsurü Jonathan, Ishvi ko Malkishua. Atsulatpü azitpü neng Merab ko azatpü neng Mikal licho.

⁵⁰Anitpü tsü Ahimaz tsulatpü Ahinoam, abi rothsarü anüchiba tsü au azaba Ner tsurü Abner thsacho.

⁵¹Saul au Kish ko Abner au Ner tsü Abiel tsurüti lile.

⁵²Abi akangli ayung, Saulnü Filistinrü te dee tsüroh khatacho. Hütsünü abinü nyükheh tsa ko müsi mülah ngurü atümung abi rothsarü yola throyohcho.