Read Sangtam Naga 1 SAMUEL 18 Bible Online

1 SAMUEL 18 - Sangtam Naga bible

1 SAMUEL 18

¹Saul e David nyüh chotakacho. Hütsüpü khanglang, Saul tsurü Jonathan-nü David dee mürüpcho ko apu roh-i abi müicho.

²Hütsü nyümong tinü Saulnü David tsü kuh lang müwüsohpü arüh kuhla yohpücho.

³Jonathan-nü abi khura mürüpchonü David te akang ayung shangrü thsanung yuchümcho.

⁴Abinü abi khyo yacho fükhüm khyüchehcho ko abi thsunohrü, nohsheng, tbüdeng ko rungrüm hiri apüm David khyang jücho.

⁵Saulnü tuturü nguchisohcho apüm la Davidnü akoh ngucho, hütsünü abi rothsarü mülung la anüchirü kangsohcho. Hinü Saul pohki adirü ko müyurü apüm künyangsohcho.

⁶Davidnü Goliath kyüsehpü rothsarüti kuh lang thali lungde, Israel la khingkurütinü yangditi lanü Saul lang mütohcho. Arühnü akünyangchonü tambourin ko tbenglah tinü nyiichi khi thsacho.

⁷Hütsüde khingkurütinü khi hita thsacho, “Saulnü hajar kyüsehko, ta Davidnü hajar dhüre kyüsehko.”

⁸Saulnü hi münyinyücho ko abi dee mükünyangcho. Abinü yocho, “David nengdang arühnü hajar dhüre, ta I nengdanglü hajar du pü yore. Arühnü hikholü abi Yangthsaba kangsohnung!”

⁹Hütsü nyümong tinü abinü David chah longmülang nahmohnung dikehcho.

¹⁰Nyümong khüu Tsingrangba chahnü amünyi nbünü Saul rangcho, ko abinü kuhla mükyangmüzang chocho. Lede roh-i Davidnü tbenglah tsü ticho ko Saulnü thsuh khüdu hirocho.

¹¹Saulnü alüm la lümcho, “Ihnü züdi chah tsü chiikeh chiinung,” ko abinü anyüpili athsuh müthehcho; ta hütsü müipi Davidnü tsohmünyahcho.

¹²Saulnü David drücho, tunüo ABÜDONGBAnü abi pehjücho ta David te ABÜDONGBA licho.

¹³Hütsünü Saulnü David tsü nyüh hajar michah anüchirü kangsoh müthehchücho.

¹⁴Davidnü abi nyitsarüti chita lang nowücho ko apüm la akoh ngucho, tunüo ABÜDONGBA abi te licho.

¹⁵Saulnü David akoh tsü ngu abi alaa drücho.

¹⁶Ta Israel ko Juda la atümungnü David müicho tunüo abi dee akoh langnürü thsacho.

¹⁷Hütsüpü Saulnü David te yocho, “Hila I tsulatpü azitpü Merab lile. Nühnü I pohki kurah, yocho nyiba rothsarü anüchirü thsa ko ABÜDONGBA rothsa chitae-khang, Ihnü nü khyang nü nitpü thsanung jünung.” (Saulnü lümba tsü hütsüta nguchi apunü mahpü Filistinrü khyang David tsü kyüsehsohnyücho.)

¹⁸Davidnü yocho, “Yangthsaba tsunyahrü kangnungthsa Ih süo, ko I kukhi khütario?”

¹⁹Ta Merab tsü David khyang khyüsohnung bekhyah chihde, abükyü tsü Mehola lanü nyüh khüdu anengnü Adriel khyang khyüsohcho.

²⁰Ta Saul tsulatpü Mikalnü David müipehcho, ko Saulnü hütsü müdhede abi künyangcho.

²¹Abinü lümcho, “Ihnü David khyang Mikal khyüsohnung; Ihnü abükyü khu arah külüpnung, ko Filistinrü khyang abi kyüsehsohnung.” Achotsü anyüpiusü Saulnü David te yocho, “Nüh I tsunyahrü kangnung.”

²²Abinü abi pohki adirü khyang David te hita yosohcho, “Yangthsabanü nü te künyangle ko abi pohki apümnü nüh khyünyüle; ade abi tsulatpü khyünung tsü bekhyah dee atsae.”

²³Achotsü arühnü David te hütsüta yocho ko abinü lalingcho, “Yangthsaba tsunyahrü kangnung tsü aneng atsa. Ih kyo ailümrü ko tulamüyoh hitari nengdang dirale.”

²⁴Adirütinü Saul te Davidnü lalingba tsü yocho,

²⁵ko Saulnü hita David te yosohcho; “Nü chahnü Yangthsabanü mii mülih lango hidu chingre, abi rorüh chah rühyangnü Filistinrü asücho chahnü arüh yo aküp thsih khüdu khyünyüre.” (Saulnü hütsüta David tsü Filistinrü khyang kyüsehsohnung arah külüpcho.)

²⁶Adirütinü David te Saulnü yocho yu tsü yocho, ko Yangthsaba tsunyahrü kangnung tsü Davidnü künyang lümcho.

²⁷Kuh kangnung nyümong müthrocheh-ede, David ko abi nyitsarütinü wü Filistinrü nyüh thsih anyüh kyüsehcho. Hütsüpü abinü abi tsunyahrü kangnung nengdang arüh yo aküp tsü hiro abi bete khi jücho. Hütsüta Saulnü atsulatpü Mikal tsü David khyang khyüsohnungthsa kangcho.

²⁸Saulnü David te ABÜDONGBA zehcho tsitsa müdhecho ko atsulatpü Mikal nüsü abi müicho.

²⁹Hütsünü abinü David alaa drücho ko abi akangli ayung arorühthsa licho.

³⁰Filistin rothsarünü ro chitacho, ta chita müipi la Saul rothsarü anüchirü aparü tenü David akoh alaa thsacho. Hütsüta David tsü khütang anengkhong kangcho.