Read Sangtam Naga 1 SAMUEL 22 Bible Online

1 SAMUEL 22 - Sangtam Naga bible

1 SAMUEL 22

¹Davidnü Gath yangdi lanü rang wü Adulana yangdi shündhün lungkoh khüdu la tsiyohcho. Khode amungrü ko tsutpurünü abi hütsüla lilepü müdhecho, arühnü wü ayola zehcho.

²Sehchi bichirü, thsite teerü mahkhang longmüsürüti abi yang wücho, ko arüh nyüh thsih müyü-o kangcho, ko arüh michah abi anüchiba kangcho.

³Hütsü lanü Davidnü Moab la Mizpa yang wücho ko Moab Yangthsaba te yocho, “I nengdang Tsingrangba alümcho mürangcheh-ede, yanglilüm hila I tpae Uwarü liyasohng.”

⁴Hütsüta Davidnü Moab Yangthsaba te abi tpurü pehjücho ko David lungkoh la rangpüm ayung arüh hütsüla licho.

⁵Hütsüde azikehrü Gathnü David yanglang ro yocho, “Hila tüli; zah Juda lih lang wüng.” Achotsü Davidnü Hereth mürong lang wücho.

⁶Nyümong khüdu Gibea la Saulnü athsuh akheh la bipü tamarisk singdong pohki pümcho ko abi pohki adirüti apüm abi mükang yacho.

⁷David ko abi nyitsarüti nguko pü abi te yocho ko abi adirüti te yocho, “Nyieng, Benjaminrü! Davidnü nührü atümung khyang luh ko shükusiluh jünung do? Ko abi rothsarü yola anüchirü kangsohnungepü nührünü lümrü do?

⁸Hütsüta lüm nührünü Ih nyüm rah külüprü mah-o? I tsurükhungnü abi te shangrü thsarepü nührü sünüsü I te müyo. David, Ipu nyitsarü khüdunü hiba bekhyah Ih kyüsehnung thsatsa tsa yangchile ko hütsü I tsurünü thsüchirepü, nührü sünüsü I te müyo ko Ih khichi müle!”

⁹Hütsüla Saul pohki adirüti yola Doegsü yacho ko abinü yocho, “David, Nob la Ahitub tsurü Ahimelek yang wüde Ihnü nguko.

¹⁰Ahimeleknü ABÜDONGBA te David nengdang nguchinung tsingdhengcho, ko abinü David khyang yangtüp-pü Filistinba Goliath nohshengsü jüko.”

¹¹Achotsü Yangthsaba Saulnü bebüba Ahimelek ko Nob la arüh tsutpurü bebürüti apüm noronung müthehcho ko arüh abi yang rocho.

¹²Saulnü Ahimelek te yocho, “Nyieng, Ahimelek!” Abinü lalingcho, “Ih hila lile.”

¹³Saulnü tsingdhengcho, “Tuepü David nühjünü Ih nyüm rah külüpro? Tuepü nühnü abi khyang yangtüpcho, nohsheng jücho ko abi nengdang Tsingrangba te tsingdhengcho? Ade abinü Ih nyümre ko Ih kyüsehnung thsatsa tsa khüdu yangchire.”

¹⁴Ahimeleknü lalingcho, “David tsü nüyo longlangchehba adirü khüdu lile. Abi nü tsunyahkhung lile, nü jengreng jüba khüdu lile.

¹⁵Ho, Ihnü Tsingrangba te abi nengdang tsingdhengko ko hütsü asi mah. Nüh nyüm rah külüpreba tsü nüh Adibongnü Ih mahkhang I kukhi la süsü tümülangjü. Ihnü hi nengdang tusü mümüdhe.”

¹⁶Yangthsabanü yocho, “Ahimelek, nüh ko nührü tsutpu apüm sünung.”

¹⁷Hütsüpü abi müshüm yarü anyahrüti te yocho, “ABÜDONGBA bebürüti hiri kyüsehng! Arühnü David te khiyu trümko ko arühnü apüm müdhepü I te abi rang tsicho müyo.” Ta anyahrütinü ABÜDONGBA bebürüti chah kheh müthahcho.

¹⁸Achotsü Saulnü Doeg te yocho, “Nühnü kyüsehng!” ko Doegnü arüh apüm kyüsehcho. Hütsü nyümong abinü bebü jengki kohrü arüh qurepü münga kyüsehcho.

¹⁹Abinü bebürü yang, Nob la lirü apüm süsohnung yuzeng jücho: adhrerü, khingkurü azarü, akhungarü, misü, gadu ko san apüm kyüsehcho.

²⁰Ta Ahimelek tsurü yola nyüh khüdu Abiathar tsicheh wü David yola zehcho.

²¹Saulnü bebürüti apüm kyüsehcho David te yocho.

²²Davidnü abi te yocho, “Hütsü nyümong Ihnü hütsüla Doeg ngude, abinü Saul te yoririepü Ihnü lümcho. Hütsüeko nührü tsutpu apüm süba tsü I bha lile.

²³I te lieng ko tu tüdrü. Saulnü Ihjüding kyüsehnyünung, ta nüh I te khümcho linung.”