Read Sangtam Naga 1 SAMUEL 25 Bible Online

1 SAMUEL 25 - Sangtam Naga bible

1 SAMUEL 25

¹Samuel sücho ko Israelrü apüm abi meshünung shimükhongcho. Hütsüpü arühnü abi Rama la apu lih la dhrürangcho. Hütsüpü Davidnü Paran akungaselih lang wücho.

²Hütsüla nyüh khüdu Kaleb tsutpu lanü anengnü Nabal licho; abi Maon yangdi lanü ko abi yo Karmel shündhün alih khüdu licho. Abi yo san hajar asang ko miza hajar khüdu licho ko abi dee alirü thsacho.

³Anitpü Abigail tsü atsah dee tsacho ko athsehthsa, ta apu tsü khütang azithsüthsah thsacho. Nabalnü Karmel la abi san anbüh müjüpcho,

⁴ko Davidnü akungaselih la liyade hütsü yuchicho,

⁵achotsü abinü Nabal yang dhrezarü nyüh dhüre Karmel lang abi salüm hipü wüsohcho.

⁶Abinü Nabal te hita yonung thülacho: “Nü te, nü kukhi te ko nü licho apüm te Davidnü salüm yochüre.

⁷Nüh san nbüh müjüpcho abinü yuchiko ko nü san nyahrü ihrü yola lide ihrünü arüh tsa bichicho nü te müdhesohnyüre. Arüh Karmel la li ayung arüh yo tusü müchah.

⁸Arüh te tsingdheng, arühnü nü te yonung. Ihrü thsüti nyümong khüdu la rore ko ihrü tsa khyüchonung Davidnü kihchire. Yanglilüm ihrü ko nü müyang David khyang nühnü tu kohro, hütsü jüng.”

⁹David nyitsarünü yusi hi hiwü David nengla Nabal te yocho. Hütsüpü arühnü hütsüla yingcho,

¹⁰ko Nabalnü achangka la yocho, “David? abi süo? Ihnü khodesü abi müyuchidheng. Chünye atü atsichirü ayurünü limih jengko!

¹¹Tuepü Ihnü I hümthse, kih ko shunbüh müjüprü khyang müpsehcho shuh khyo khüdenü rochonang mümüdherü khyang tüpnung!”

¹²David nyitsarütinü thali wü David te Nabalnü yoba yu tsü yocho.

¹³Davidnü yocho, “Nührü nohsheng yohng!” ko arüh atümungnü yohcho ko Davidsü abi nohsheng yoh bipü kohro te nyüh thsih anyüh pehjüpü nyüh thsih müyü nüpü küducho.

¹⁴Nabal kulirü khüdunü Nabal nitpü Abigail te yocho, “Nühnü müyuchio? Davidnü anyitsarü khürü akungaselih la tsünü Ihsa abüdongba yang salüm yusi hipü müthehcho, ta abinü nyüpmüsehpü tsisohko.

¹⁵Ta arühnü ihrü te dee tsacho; ihrü rangmü la arüh te lide, arühnü tu mütsa mübichi mahkhang ihrü yo tusü müchah.

¹⁶Ihrü san nyah lide, anyümong ko amala arühnü ihrü tsungticho.

¹⁷Yanglilüm hiri lümdheng ko tu khütanung dhrongchehng. Hi Ihsa abüdongba ko abi kukhi apüm nengdang dhsürü lile. Abi tsürohrarü tsü abinü sü yusü münyinung!”

¹⁸Abigailnü dhsüthsa hümthse thsih anyüh, yongkha di anyüh, san shuh münga aruhcho, aruhcho tsang süreh dhüre-dhünyeh, shükusih müphung thsih khüdu, ko ngurüsih akungchonü külüpcho hümthse thsih anyüh khyübülungpü gadu chah zangcho.

¹⁹Hütsüpü kulirüti te abükyünü yocho, “Nührü akhu thsaang ko Ih iironung.” Ta abükyünü hütsü anii te tusü müyocho.

²⁰Abükyünü gadu chahnü wü akhang pohki langmüshi la woyade, dhrongyengnü David ko anyitsarüti abükyü lahpi rochi ngucho.

²¹Davidnü hita lümchi rocho, “Tuepü rangmü hila hütsüvi kuthsi tsungti rocho? Abi yo tusü müchah ko Ihnü abi trocho mülih abinü hita jücho ang?

²²Ihnü arüh tsü mütsingsede khüdusü münying mükyüsehkhang, Tsingrangbanü Ih süsohng!”

²³Khode Abigailnü David ngucho, abükyünü dhsüthsa jüropü David jingte mükhukeh

²⁴abi te yocho, “Adirü, yanglilüm I te nyieng. Ih mülangjüng.

²⁵Yanglilüm amükhyu Nabal te tu tünyi. Abi tsü aneng chah chokeh ko dsirang, amükyang lile. Adirü, nü dikehrüti rode tsü hütsüla Ih müliko.

²⁶Nü rorüh chah rühmüyangsohba ko mükyüsehsohba tsü ABÜDONGBAnüe. Ko ade Ihnü ABÜDONGBA nengla nü te yuchümre, hütsünü nüh iichirü apüm Nabal kyo khingchinung.

²⁷Adirü, yanglilüm Ihnü nü khyang hirojücho jiyü hi khyüchojüng ko nü nyitsarüti khyang jüng.

²⁸Adirü, yanglilüm Ihnü lango dusü thsameh likhang I khyang mülang pehjüng. ABÜDONGBAnü nüh Yangthsaba kangsohnung ko nü shümtsurü chii, tunüo nüh akangli ayung amütsa tusü münguchinung.

²⁹Khürünü nüh mah kyüsehnung nye, nyitsarünü thsidi kuthsi nyahcho kyo, ABÜDONGBA nü Tsingrangnü nüh nyahnung ko khümchonung. Ta nü rorülü, nyitsarünü lung tsayohchüpehcho kyo abinü arüh pehnung.

³⁰Ko khode ABÜDONGBAnü abinü nyengchocho kyo atsa apüm nguchi ko nüh Israel la Yangthsaba kangsohnang,

³¹hütsüde yuzi mülipü nühnü kyüsehcho ko rühyangcho hiri nengdang nühnü kohsha mülümnung. Ko adirü, khode ABÜDONGBAnü nüh müwajonang, yanglilüm Ih tünbüchü.”

³²Davidnü abükyü te yocho, “ABÜDONGBA, Tsingrang sünü chünye nüh I mütohnung rosohcho, abi seing.

³³Chünye Ihnü rühyang kyüseh amünyi shitpahnung lanü nü lümlong atsanü Ih tphahlicho nengdang Tsingrangba seing.

³⁴Nührü süsohnung lanü ABÜDONGBAnü Ih tphahliko. Ta Ihnü akang liba Israel Tsingrang nengla yore, nühnü dhsüthsa ro Ih mümüdohrelang, mütsingsede Nabal nyitsarü apüm sükhangba thsako!”

³⁵Hütsüpü abükyünü hiroba tsü Davidnü khyüchocho ko abükyü te yocho, “Kuh lang thali wüng ko tu tülümxü. Nühnü khyünyücho kyo Ihnü nguchinung.”

³⁶Khode Abigail kuh lang thali wücho, Nabal-lü kuhla Yangthsaba kyo thsüti tsu pümcho. Abi müchasehpü lichonü, abükyünü nyangnyü khüu yingcheh abi te tu müyocho.

³⁷Hütsüpü abi mütsimütsa kangde, abi te lüpcho tsü yocho. Abi anehchonü afü yümsehcho.

³⁸Nyümong dhüre-o lipü ABÜDONGBAnü Nabal chah xüpcho ko abi sücho.

³⁹Davidnü Nabal sücho yuchi abinü yocho, “ABÜDONGBA seing. Abinü Nabal chah Ih nyüpmüsehcho nengdang rühyangko ko amüthsalang nguchinung lanü abi dikehrü tphahliko. ABÜDONGBAnü Nabal apu nguchi amütsa mülih khingchicho.” Hütsüpü Davidnü Abigail te kukangnung tsingdhengnung müthehcho.

⁴⁰Abi kulirünü Karmel lang wü abükyü te yocho, “Davidnü nüh nowü abi nitpü thsanung ihrü mütheh lile.”

⁴¹Abigailnü alih la mükhukehnü yocho, “Ih abi dikehlarü, abi dikehrü jing thsüthohnung rungnüm lile.”

⁴²Abükyünü dhsüthsa shemüsu abükyü gadu chah küducho. Akulilarü arüh münganü müyang, David kulirüti yola wücho ko abi nitpü kangcho.

⁴³Davidnü Jezrel lanü Ahinoam khyücho ko ade Abigailsü abi nitpü kangcho.

⁴⁴Hütsütade, Saulnü atsulatpü Mikal, sü David nitpü thsacho, abükyü tsü Gallim yangdi la Laish tsurü Palti khyang khyüsohcho.