Read Sangtam Naga 1 SAMUEL 27 Bible Online

1 SAMUEL 27 - Sangtam Naga bible

1 SAMUEL 27

¹Davidnü alüm la lümcho, “Nyümong khüdulü, Saulnü Ih kyüsehnung. I nengdang atsichehnung atsauba tsü Filistia lang tsinung. Hütsükhang, Saulnü Ih müyangchipehnung ko Ih khümcho linung.”

²Achotsü David ko anyitsarü arüh thsih dhüroh tsü Gath Yangthsaba Maok tsurü Akish yanglang wücho.

³David ko abi nyitsarünü Gath la tsü arüh kukhiti nüpü licho. David ko anitpü anyüh: Jezrel lanü Ahinoam ko Karmel lanü Nabal nitpü Abigail.

⁴Khode Saulnü David Gath lang rang tsicho yuchicho, abinü abi müyangchipehcho.

⁵Davidnü Akish te yocho, “Nüh I shangrü thsakhang, alinung I khyang alih aza jüng. Adirü, Ih nü yola yangdiba la linung müdhsüdah.”

⁶Achotsü Akishnü abi khyang Ziklag yangdi jücho. Hütsü khu Ziklag yangdi tsü ade yingcheh Juda Yangthsarü yo kangcho.

⁷Davidnü Filistia la choo dhüre-dhüroh licho.

⁸Hütsü shikhe David ko abi nyitsarütinü hütsü lih la anyahli liyarü Geshur, Girzi ko Amalekrü mahcho. Abinü arüh lih Shur ko Ijip chii jowü,

⁹khingkurü adhrerü kyüseh ko san, misü ko gadu, ut ko shü mii khyücho.

¹⁰Hütsüpü abinü Akish yanglang thali rocho ko abinü abi te tsingdhengcho, “Chünye nührü sürü mah wücho?” Ko Davidnü kihjing lahpi Juda nyüm mahkhang Jeramel nyüm, mahkhang Kenrü nyüm wüchoepü yocho.

¹¹Davidnü khingkurü adhrerü apüm kyüsehkhangcho, hütsü dunü süsü Gath lang müthalinung ko arühnü yuchiba tsü müyonung. Hütsüta Davidnü abi Filistia la liba shikhe ayung nguchicho.

¹²Ta Akishnü David chah longlangcho ko alüm la lümcho, “Abi apu nyitsarü Israelrünü hidoi thrünyirü tsü abi akang ayung Ih dikehsohnung.”