Read Sangtam Naga 1 SAMUEL 28 Bible Online

1 SAMUEL 28 - Sangtam Naga bible

1 SAMUEL 28

¹Azachah lipü, Filistinrünü Israel te chitanung shibülungcho, ko Akishnü David te yocho, “Nüh ko nü nyitsarüti I lahpi thsapü chitanungepü Ihnü müdhele.”

²Davidnü lalingcho, “Ih nü dikehrü ko Ihnü nü nengdang tu nguchirünang nüpunü ngunung.” Akishnü yocho, “Tsale! Ihnü nüh mungkhung I nyahrü thsasohnung.”

³Samuel sücho ko Israelrü apüm shimükhongnü apu yangdi Rama la dhrürangcho. Saulnü amongrüti ko amüchehrüti apüm Israel lanü iipehcho.

⁴Filistinrünü shimükhong Shunem yangdi te müdongcho; ko Saulnü Israelrü nübülung Gilboa zong chah müdongcho.

⁵Khode Saulnü Filistinrü rothsarü ngucho, abinü drücho,

⁶achotsü abinü ABÜDONGBA te tsingcho. Ta ABÜDONGBAnü müngucheh la nye, Urim ko Thummim khunü nye, mahkhang azikehrü khunü nye tu mülalingcho.

⁷Hütsüde Saulnü abi pohki adirüti te yuzeng jücho, “Amonglarü khüdu yangching ko Ihnü wü abükyü te müchehdhengnung.” Arühnü lalingcho, “Endor la khüdu lile.”

⁸Achotsü Saulnü apu tsahthrimüla jengki pa khyüpü ko masohpü abi yola nyüh anyüh nüpü khingkutpü yanglang tsü wücho. Abinü abükyü te yocho, “Tu tikehnungnang müchehdhengjüng. Ko Ihnü yonung nyitsarü nbü tsü dsichehjüng.”

⁹Khingkutpü tsünü yocho, “Yangthsaba Saulnü nguchicho nühnü müdhele, abinü amongrü ko amüchehrü abi lih lanü iipehko. Khang, tuepü Ih kihyochü süsohnung müküpro?”

¹⁰Hütsüde Saulnü Amüsa yuchümcho. Abinü abükyü te yocho, “Ihnü akang liba ABÜDONGBA nengla yore, nühnü hi nguchicho nengdang nüh mükhingchinung.”

¹¹Khingkutpü tsünü yocho, “Ihnü nü khyang sü dsichehjünung?” Abinü yocho, “Samuel.”

¹²Khode khingkutpü tsünü Samuel ngucho, abükyünü züde Saul te yocho, “Tuepü Ih rahmütsaro? Nüh Yangthsaba Saul lile.”

¹³Yangthsabanü abükyü te yocho, “Tüdrü!” “Nühnü tu nguro?” Abükyünü lalingcho, “Alih lanü anbü khüdu chüro ngure.”

¹⁴Abinü tsingdhengcho, “Tu kyoro?” Abükyünü yocho, “Hütsü ashirü khüdu fükhüm khümpü chüro ngure.” Hütsüde Saulnü hütsü Samuel epü müdhe abinü jengreng jo alih la mükhukehcho.

¹⁵Samuelnü Saul te yocho, “Nüh tuepü Ih longmüziro? Tuepü Ih thali rosohcho?” Saulnü lalingcho, “Ih dee chongcha la lile. Khüulang Filistinrü te khatarü ko khüulang Tsingrangbanü Ih thrüchahchü pehjüko. Adelü müngucheh mahkhang azikehrü khunü nye, ABÜDONGBAnü I te mülalingre. Hütsünü Ihnü tu nguchinungnang müdhenung nüh dsicho lile.”

¹⁶Samuelnü yocho, “ABÜDONGBAnü nüh pehjo ko nüh abi rorüh kangpü lide, tuepü nühnü Ih dsiro?

¹⁷ABÜDONGBAnü Ih khu nü te yobasü nguchiko; abinü yanglih tsü khyo David khyang jopehko.

¹⁸Nühnü ABÜDONGBA yocho münyiko ko Amalekrü ko arüh licho apüm müchangjü. Hütsünü ade ABÜDONGBAnü nü chah hi nguchire.

¹⁹Abinü nüh ko Israelrü Filistinrü khehla jünung. Atu nüh ko nü tsurü I te linung ko Israelrü rothsarü Filistinrü khehla jünung.”

²⁰Samuelnü yoba tsü yuchi dhrongyengnü Saul tsü alih la khülutsu zingchi jocho. Abi suh müzeh kangcho, tunüo hütsü nyümong ko romang ayung tu mütsucho.

²¹Khingkutpü tsünü abi yang wüdhengde, abi drümüyangpü li ngucho, achotsü abi te yocho, “Adirü, I kang mii jo nühnü yocho nguchiko.

²²Yanglilüm ade Ihnü yocho nguching. Ihnü nü khyang tsuyongnung azikyah rungnümjünung. Nüh rezehchipü langtseh kohnung shulüm nühnü hütsü tsung.”

²³Saulnü tusü mütsunung thsonglicho. Ta abi pohki adirütinü mii tsunung kihchicho. Abinü akalang alih lanü shemüsu chongnong chah pümcho.

²⁴Thsüthsanü khingkutpünü abükyü kangyacho misüza khüdu müpsehcho. Hütsüpü hüm aza hiro bhüpza müyohpü hümthse aza külüpcho.

²⁵Abükyünü Saul ko abi adirüti nengdang tsuyongba tsü küdang yohpüjücho ko arühnü hütsü tsucho. Hütsüpü arühnü hütsü romangnü shemüsu tsicho.