Read Sangtam Naga 1 SAMUEL 29 Bible Online

1 SAMUEL 29 - Sangtam Naga bible

1 SAMUEL 29

¹Filistinrünü arüh rothsarü apüm Apek la nübülungcho ko Israelrüsü hütsüta Jezrel Ngah kihna la müdong licho.

²Filistinrü yangthsarü münga tsünü arüh mülung nyüh thsih-thsih ko hajarnü chung shicheh rocho; ko David ko abi nyitsarüti tsü Akish yola akhanglang rocho.

³Filistinrü anüchirünü arüh tsü ngu tsingdhengcho, “Ibrirü hiri hila tu nguchiro?” Akishnü lalingcho, “Hiba hi David, Yangthsaba Saul pohki adirü. Adelü abi I te khütang nyahli lii rore. Abi I yola ro litinü Ihnü abi chah mülang müdhengcheh.”

⁴Ta Filistinrü anüchirünü dee mükünyang abi te yocho, “Hütsüvi tsü nühnü jüba yangdi lang tsü thali wüsohng. Khata lang Ihsa yola arüh türosoh; khata long la abinü Ihsa nyüm yanung mii kohle. Ihsa thahrü khyüpü wü abi abüdongba künyangsohnung tenü apa tu atsau liro?

⁵Hitarüma, khingkurütinü arüh nyiichide, Saulnü hajar khüdu ta Davidnü hajar dhüre kyüsehko pü sekehjüba David tsü hi lile.”

⁶Akishnü David dsinü yocho, “Nühnü I te yuje cho licho Ihnü akang liba Israel Tsingrang neng la yuchümre, ko Ihnülü I te wü khata tsü khatasohnyüre. Nüh Ih yang roba nyümong tinü nü chah tu mülang müngure. Ta aparü yangthsarütinü mümülare.

⁷Hütsüeko tbachi kuh lang thali wüng ko arüh wahnungthsa tu tünguchi.”

⁸Davidnü lalingcho, “Adirü, Ihnü tu thsamehcho? Nühnü yocho kyo, Ih nüh dikehba nyümong tinü tu mülang mürangchehkhang, abüdongba ko yangthsaba ko nührü nengdang khatajünung tuepü müwünung?”

⁹Akishnü lalingcho, “Ihnü hoh-re. Ihnü nüh tsü Tsingrangba riwürü roh-i khichire. Ta aparü yangthsarütinü nüh ihrü yola khata lang wünung mükoh pü yore.

¹⁰Hütsüeko David, nührü sürü Saul pehjüpü Ih yang rocho, nührü atümung mütoh surung ko zah tsieng.”

¹¹Achotsü David ko abi nyitsarütinü nyangnyü khüu tsü mütoh suropü Filistia lang ronung shemüsucho ko Filistinrünü Jezrel lang wücho.